Ntoa le Liketsahalo Tse Sehloho li re Ama Joang?

Ka tšohanyetso ntoa e ka qala le libakeng tseo u neng u sa lebella hore e ka ba teng ho tsona hape ntoa e boetse e ama le batho ba sa luleng moo e leng teng.Ha ntoa e se e emisitse litla-morao tsa teng li nka nako e telele li le teng.Nahana ka mehlala e latelang:

• 

  Khaello ea lijo. Ho ea ka mokhatlo oa World Food Programme, “ntoa ke lona lebaka le ka sehloohong le etsang hore ho be le tlala ’me batho ba bangata ba se nang lijo tse lekaneng ba phela linaheng tseo ho nang le ntoa.”

• 

  Ntoa e lematsa batho ’meleng le kelellong. Ha ho bonahala e ka ntoa e tla ba teng, batho ba lulang sebakeng seo ba nahana le ho tšoenyeha haholo.Batho ba lulang sebakeng seo ho loanoang ho sona ha ba lemale fela ’meleng empa ba boetse ba lemala kelellong. Ka masoabi, batho bana hangata ba qetella ba sa fumane thuso lipetlele.

• 

  Batho ba qobelleha ho siea matlo a bona. Ka September 2023, Mokomishinara ea Phahameng oa Machaba a Kopaneng oa Baphaphathehi, o ile a re batho ba fetang limilione tse 114 lefatšeng lohle ba ile ba qobelleha ho siea matlo a bona. Lebaka le ka sehloohong la masisa-pelo ana ebile ntoa le liketsahalo tse sehloho.

• 

  Ho putlama ha moruo. Hangata ha ho e-ba le ntoa moruo oa naha o a putlama ’me seo se etsa hore lintho li be theko e phahameng. Batho ba ka ’na ba sotleha ka lebaka la hore ’muso o sebelisa chelete e ngata ho reka libetsa tsa ntoa, ho e-na le ho e sebelisa bakeng sa hore batho ba fumane thuto le litšebeletso tsa bongaka. Ka mor’a hore ntoa e emise ho ba boima ho lokisa tšenyo e bakiloeng ke ntoa hobane ho hlokahala chelete e ngata.

• 

  Ntoa e senya lefatše. Batho ba sotleha ha sebaka seo ba lulang ho sona se senngoa ka boomo. Metsi a litšila,moea esita le mobu li ka etsa hore batho ba kule ka nako e telele ebile ba ba kotsing ea ho bolaoa ke liqhomane tse siiloeng ka mor’a hore ntoa e emise.