Jesu “o Ile a Ithuta ho Mamela”

Haesale Jesu a mamela Jehova. (Joh. 8:29) Joale, ke hobane’ng ha Bibele e re: “O ile a ithuta ho mamela linthong tse bohloko tse ileng tsa mo hlahela”?—Baheb. 5:8.

Ha Jesu a ntse a le lefatšeng, o ile a tobana le mathata ao a sa kang a tobana le ’ona ha a ne a le leholimong. O holisitsoe ke batsoali ba neng ba rata Jehova empa ba sa phethahala. (Luka 2:51) O ile a mamella ho tšoaroa hampe ke baeta-pele ba bolumeli ba khopo le balaoli. (Mat. 26:59; Mar. 15:15) Hape “o ile a ikokobetsa ’me a mamela ho fihlela a shoa” lefu le bohloko.—Bafil. 2:8.

Kahoo, tsela eo Jesu a ileng a ithuta ho mamela linthong tse ileng tsa mo hlahela ha a le lefatšeng e fapane le tsela eo a ileng a ithuta ho mamela ka eona ha a le leholimong. Ke kahoo a neng a tšoaneleha ho ba Morena le Moprista ea Phahameng ea neng a tla re utloisisa. (Baheb. 4:15; 5:9) Jesu e ile ea e-ba oa bohlokoa le ho feta ho Jehova ka mor’a ho ithuta ho mamela linthong tse bohloko tse ileng tsa mo hlahela. Le rona re ka ba ba bohlokoa le ho feta ho Jehova ’me a re fa mosebetsi leha e le ofe haeba re lula re mamela le tlas’a maemo a thata.—Jak. 1:4.