Lengolo le Tsoang ho Sehlopha se Busang
HA RE kena lilemong tse qalang tsa lekholo lena la bo21 la lilemo, re motlotlo ho le ngolla, lōna “mokhatlo oohle oa barab’abo rōna” lefatšeng lohle, ho le babatsa bakeng sa ho sebetsa ka thata. (1 Pet. 2:17) Lilemong tse ka bang 2 000 tse fetileng, Jesu o ile a botsa: “Ha Mor’a motho a fihla, na ka sebele o tla fumana tumelo lefatšeng?” (Luka 18:8) Mosebetsi oa lōna o chesehang selemong se fetileng sa tšebeletso o araba potso ea Jesu ka e! e utloahalang. Ba bang ba lōna ba ile ba nyelisoa le ho songoa ka lebaka la tumelo ea bona. Libakeng tse ngata, le mamella ho sa tsotellehe lintoa, likoluoa, maloetse kapa tlala. (Luka 21:10, 11) Ka lebaka la ho chesehela ha lōna mesebetsi e metle, Jesu o ntse a ka “fumana tumelo lefatšeng.” Ka sebele sena se bakile thabo leholimong!
Rea tseba hore ha ho bonolo ho mamella. Nahana ka liteko tsa barab’abo rōna naheng e ’ngoe ea Asia ka bophirimela. Pefo khahlanong le Lipaki tsa Jehova e tloaelehile naheng ena. Morao tjena, mapolesa a ile a qhala kopano e nang le khotso ea batho ba ka bang 700. Lithibelo tse etsoang tseleng li ile tsa sitisa ba bang ba 1 300 hore ba be teng. Mokhopi oa batho ba ikhakantseng, ba bang ba bona e le mapolesa, o ile oa itšohlometsa kopanong, oa otla batho ba bangata ba tlileng kopanong, ’me oa chesa lephephe le neng le tlil’o sebelisoa bakeng sa kopano. Liketsahalong tse ling, baitseki ba balumeli ba ile ba otla barab’abo rōna ka sehlōhō ka melamu e khokhothetsoeng lipekere.
Litlhaselo tse joalo lia tšosa empa ha li makatse. Moapostola Pauluse o ile a bululeloa hore a ngole: “Bohle ba lakatsang ho phela ka boinehelo ba bomolimo kamanong le Kreste Jesu le bona ba tla hlorisoa.” (2 Tim. 3:12) Lekholong la pele la lilemo, Bakreste ba ile ba mamella mahloriso a ho hlapaoloa le ho shapuoa, ’me ba bang ba bile ba bolaoa. (Lik. 5:40; 12:2; 16:22-24; 19:9) Ho bile joalo le lekholong la bo20 la lilemo, ’me ha ho pelaelo hore ho tla tsoela pele ka mokhoa ona le lekholong la bo21 la lilemo. Ho sa tsotellehe sena, Jehova o re ho rōna: “Sebetsa leha e le sefe se tla etsoa khahlanong le uena se ke ke sa atleha.” (Esa. 54:17) Ee ke tšepiso e tsotehang hakaakang! Ka sebele re ba bohlokoa ho Jehova hoo ka moprofeta oa hae Zakaria a ileng a re: “Ea le amang o ama leihlo la ka.” (Zak. 2:8) Lira tsa barapeli ba Jehova ha li na monyetla oa ho hlōla qetellong. Borapeli bo hloekileng bo tla hlōla!
Ka mohlala, naheng e boletsoeng pejana, Lipaki tsa Jehova li thabetse ho ba le litlhōrō tse peli tse ncha palong ea bahoeletsi selemong sa tšebeletso sa 2001. E, barab’abo rōna baa tiisetsa sebakeng sena ho sa tsotellehe mathata, joaloka libakeng tsohle. Lefatšeng ka bophara selemong se fetileng sa tšebeletso, ba 5 066 ba ne ba kolobetsoa e le pontšo ea boinehelo ba bona ho Jehova beke e ’ngoe le e ’ngoe. Joale, bana ba bacha ba ikemiselitse, hammoho le rōna kaofela, ho ‘ema ba feletse le ka kholiseho e tiileng thatong eohle ea Molimo.’—Bakol. 4:12.
Nahanang le ka liketsahalo tsa morao-rao Greece. Ho sa tsotellehe khanyetso e matla ea Kereke ea Greek Orthodox ka lilemo tse ngata, hona joale ’muso o amohetse hore Lipaki tsa Jehova ke “bolumeli bo tsejoang.” Tokomane e amohelang sena e tsoela pele ho bolela hore mohaho oa Bethele, Greece, ke “sebaka se halalelang le se nehetsoeng bakeng sa mosebetsi o halalelang, se nehetsoeng bakeng sa borapeli ba Molimo.” Re boetse re thabela ho le tsebisa hore selemong se fetileng sa tšebeletso, makhotla a fetisitse liqeto tsa molao tse re emelang tse amang borapeli ba rōna Bulgaria, Canada, Japane, Jeremane, Romania, Russia le United States. Re leboha Jehova hakaakang ha a lutse a butse monyako o isang tšebetsong linaheng tseo!
Ha re ntse re nahana ka litsela tseo Jehova a tšehetsang batho ba hae ka tsona matsatsing ana a ho qetela, rea hlokomela hore ke Motsoalle ea molemo ka ho fetisisa eo re ka bang le eena. Re thabela kamano ea rōna le eena, rea tseba hore oa re rata, oa re ruta ebile oa re khalemela. E, re tla ’ne re hlaheloe ke liteko tsa tumelo. Empa tumelo e tiileng ho Jehova e tla re matlafatsa. Jakobo o ile a ngola: “Ho nkeng e le thabo feela, barab’eso, ha le thulana le liteko tse sa tšoaneng, joalokaha le hlile le tseba hore tšobotsi ena e lekiloeng ea tumelo ea lōna e hlahisa mamello.” (Jak. 1:2, 3) Ho feta moo, mamello ea rōna e bontša lerato la rōna ho Jehova, ’me sena se re thabisa haholo! Barab’abo rōna ba ratehang, kholisehang hore Jehova o tla tšehetsa e mong le e mong oa rōna. Haeba re lula re tšepahala, ha ho pelaelo hore o tla re thusa hore re kene lefatšeng le lecha. O batla hore re atlehe.
Kahoo, bara le barali babo rōna, bacha le ba hōlileng, rea le phehella hore le lule le hopola litlhohonolofatso tse tsotehang tse larileng ka pele. E se eka boikutlo ba rōna bo ka tšoana le ba moapostola Pauluse, ea ileng a ngola: “Ke lekanya hore litlhokofatso tsa nako ea hona joale hase letho ha li bapisoa le khanya e tlang ho senoloa ho rōna.” (Bar. 8:18) Itšetleheng ka Jehova ha le tobane le mahlomola a mofuta ofe kapa ofe. Tiisetsang, le se ke la tela. Le ka mohla, le ke ke la ikoahlaea. Lentsoe la Molimo lea re tiisetsa: “Ha e le ea lokileng, o tla ’ne a phele ka botšepehi ba hae.”—Hab. 2:4.
Barab’abo lōna,
Sehlopha se Busang sa Lipaki Tsa Jehova