Ke Ile ka Ikemisetsa ho Sebeletsa Jehova

KA 1991, ’na le mosali oa ka Satta re ile ra baleha ha masole a marabele a kena motseng oo re neng re lula ho oona, Koindu, Sierra Leone. Lilemo tse robeli tse latelang re ile ra lula likampong tse fapa-fapaneng tsa baphaphathehi. Ha re le likampong re ne re haelloa ke lijo, re kula re bile re pota-potiloe ke baahelani ba nang le mekhoa e mebe.

Kampong e ’ngoe le ’ngoe eo re neng re fihla ho eona re ne re kōpa ba boholong hore ba re fe setša sa ho haha Holo ea ’Muso. Ka linako tse ling re ne re fumana setša, empa ka linako tse ling re ne re sa se fuoe. Ho ntse ho le joalo, re ne re lula re e-na le sebaka seo re kopanelang ho sona. Re ne re ikemiselitse ho sebeletsa Jehova. Qetellong re ile ra haha Liholo Tsa ’Muso tse ’nè likampong.

Ha ntoa e fela, ha rea ka ra khona ho khutlela lapeng. Koindu e ne e senyehile ka lebaka la ntoa e ileng ea loana lilemo tse ngata. Kahoo re ile ra romeloa kampong e ’ngoe ea baphaphathehi e haufi le Bo. Ha re le moo re ile ra haha Holo ea ’Muso ea bohlano, ka chelete e neng e tsoa ofising ea lekala.