Jehova o Ntlhohonolofalitse Tšebeletsong ea Hae

KE HLAHILE ka 1926, motseng oa Crooksville, Ohio, United States. ’Mè le Ntate ba ne ba sa tsamaee kereke, empa ba re ’na le banab’eso ba supileng re ee kerekeng. Ke ne ke kena Kereke ea Methodiste. Ha ke le lilemo li 14, moruti o ile a mpha khau, kaha ke ne ke qetile selemo sohle ho se mohla nkileng ka lofa kereke ka Sontaha.

Hona nakong eo, ’mè e mong oa Paki ea Jehova ea bitsoang Margaret Walker, eo e neng e le moahisani oa rōna, o ile a qala ho ithuta Bibele le ’mè oa ka. Ka le leng, ke ne ke batla ho ba teng thutong ea bona. Empa kaha ’Mè o ne a nahana hore ke tla ba sitisa, o ile a re ke ee ka ntle. Leha ho le joalo, ke ile ka ’na ka leka ka makhetlo ho mamela puisano ea bona. Ka le leng ha Margaret a etetse ’Mè, o ile a mpotsa a re, “Na u tseba lebitso la Molimo?” Ke ile ka re, “Batho bohle baa le tseba, ke Molimo.” A re, “Tloo le Bibele ea hao ’me u bale Pesaleme ea 83:18.” Ke ile ka e bala, ’me ka utloa hore lebitso la Molimo ke Jehova. Ha ke qeta ho e bala, ka mathela ho metsoalle ea ka ’me ka re ho eona, “Ha le fihla hae le bale Pesaleme ea 83:18, le utloe hore na lebitso la Molimo ke mang.” Ke kamoo ke qalileng ho paka kateng.

Ke ile ka ithuta Bibele, ’me ka kolobetsoa ka 1941. Nakoana ka mor’a moo, ka abeloa ho khanna thuto ea buka ea phutheho. Ke ne ke mema ’Mè le banab’eso hore ba tle thutong ea buka eo ke e khannang, ’me ba tla. Ntate eena o ne a sa li kene.

KHANYETSO KA LAPENG

Ke ile ka fuoa boikarabelo bo eketsehileng ka phuthehong, ’me ka ba le libuka tse ngata tse hatisitsoeng ke Lipaki Tsa Jehova. Ka le leng, Ntate o ile a supa libuka tseo a re: “Ua li bona lintho tsee? Ha ke batle ho li bona mona, le uena u ka ’na ua li sala morao.” Ke ile ka tloha lapeng, ka ea motseng o haufi oa Zanesville, Ohio, empa ke ne ke lula ke ea lapeng ho ea khothatsa ’Mè le banab’eso.

Ntate o ne a leka ho thibela ’Mè ho ea libokeng. Ka linako tse ling ha a ’mona a se a le tseleng, o ne a mo lata, ebe o oa mo hula, o mo khutlisetsa lapeng. Empa ’Mè o ne a tsoa ka monyako o mong, ebe o ea libokeng. Ke ile ka re ho eena: “Mo tlohele. O tla khathala ke ho be esale a u katile.” Ha nako e ntse e ea, Ntate o ile a fela a khathala, joale ’Mè a ikela libokeng a lokolohile.

Ha Sekolo sa Tšebeletso sa Puso ea Molimo se qala ka 1943, ke ile ka qala ho fana ka lipuo phuthehong ea heso. Keletso eo ke neng ke e fuoa moo, e ile ea nthusa hore ke ntlafatse tseleng eo ke fanang lipuo ka eona.

HO SE NKE LEHLAKORE NTOENG

Ka 1944, ha Ntoa ea II ea Lefatše e ntse e kupa, ke ile ka bitsetsoa sesoleng. Kahoo, ka ea Fort Hayes e Columbus, Ohio, hore ke il’o hlahlojoa hore na ke phetse hantle, esita le ho tlatsa liforomo. Ke ile ka bolella liofisiri hore nke ke ka ba lesole. Li ile tsa ntokolla hore ke khutlele hae. Empa ka mor’a matsatsi a seng makae, ofisiri e ’ngoe e ile ea tla moo ke lulang, ’me ea re, “Corwin Robison, ke rometsoe hore ke tl’o u tšoara.”

Libeke tse peli hamorao ke ile ka ea khotla, ’me moahloli a re: “Hoja lintho li ne li etsoa ho ea ka ’na, ke ne ke tla u ahlolela ho hlola bophelo bohle teronkong. Na ho na le seo u ka se buang?” Ke ile ka re: “Mohlomphehi, ke lokela ho nkoa joaloka moruti. Ntlong e ’ngoe le e ’ngoe eo ke eang ho eona, ke ruta batho litaba tse molemo tsa ’Muso oa Molimo.” Moahloli o ile a re ho lekhotla: “Ha rea tla mona ho tla bua ka hore na mohlankana enoa ke moruti kapa che. Re tletse ho tla bua ka hore na o lumetse ho ea sesoleng kapa che.” Lekhotla le ile la nka metsotso e seng mekae ho etsa qeto ea hore ke molato. Moahloli o ile a nkahlolela ho hlola lilemo tse hlano teronkong e Ashland, Kentucky.

JEHOVA O ILE A NTŠIRELETSA HA KE LE TERONKONG

Ke ile ka qeta libeke tse peli ke le teronkong e Columbus, Ohio, ’me ha ke fihla ka qeta letsatsi ke koaletsoe ke le mong. Ke ile ka rapela Jehova ka re: “Nke ke khona ho hoehla lilemo tsena tse hlano ke le mona. Nthuse hle, Ntate!”

Ka le hlahlamang, balebeli ba ile ba ’ntša seleng eo. Ka ea ho motšoaruoa e mong oa senatla ea neng a eme fensetereng a shebile ka ntle, ka fihla ka ema pel’a hae. Eaba o re ho ’na, “U tšoaretsoe’ng, Mashoto?” Ka re, “Ke Paki ea Jehova.” A re, “U Paki? Joale u batla’ng moo?” Eaba ke re, “Lipaki Tsa Jehova ha li ee ntoeng ho ea bolaea batho.” A re, “E le hore ba u tšoere hobane u sa batle ho bolaea batho? Ka mona ba tšoara ba bolaeang batho. Kannete ba ferekane.” Ka re, “Ke lumellana le uena.”

Motšoaruoa eo a re, “Ke qetile lilemo tse 15 ke le teronkong e ’ngoe, ’me ha ke le moo, ke ne ke bala libuka tse ling tsa lōna.” Ha ke utloa seo, ka rapela ka re, “Jehova, ke kōpa o nthuse hore monna enoa a be ka lehlakoreng la ka.” Hona nakong eo, motšoaruoa e mong ea bitsoang Paul o ile a re ho ’na: “Haeba motho leha e le ofe a u tšoenya ka mona, u mpolelle. Ke tla iteanya le eena.” Kahoo, ha ke ntse ke le moo, ha ho mohla batšoaruoa ba moo ba 50 ba ileng ba mpha bothata.

Ha liofisiri li nkisa teronkong e Ashland, ke ile ka fumana ho e-na le barab’abo rōna ba hōlileng tsebong moo. Ba ile ba nthusa hammoho le ba bang hore re lule re le haufi le Jehova. Ba ne ba re bontša hore na re bale Bibele hokae beke ka ’ngoe, ’me re lokisetsa lipotso tseo re tla li tšohla libokeng tsa rōna. Re ne re koaletsoe ka seleng e khōlō e nang le libethe tse iphaphathileng ka lebota. Mor’abo rōna e mong o ne a re abela tšimo. O ne a re: “Robison, o tla nka bethe ena le eane. Bohle ba fihlang libetheng tseo u ba pakele. U etse bonnete ba hore u ua ba pakela pele ba tsamaea.” Tšimo ea rōna e ne e hlophisitsoe ka tsela eo.

HA KE LOKOLLOA TERONKONG

Ntoa ea II ea Lefatše e ile ea fela ka 1945, empa ka tsoela pele ke le teronkong le ka mor’a moo. Ke ne ke tšoenyeha ka ba lelapa leso hobane Ntate o ne a ile a re, “Ha nka tlosa uena tseleng, e tla ba ke qetile.” Ha ke qeta ho lokolloa, ke ile ka utloa litaba tse monate. Ba supileng lapeng leso ba ne ba e-ea libokeng, ’me khaitseli ea ka e ’ngoe e se e kolobelitsoe, ho sa tsotellehe khanyetso ea Ntate.

Ha Ntoa ea Korea e qala ka 1950, ke ile ka laeloa hore ke ee sesoleng ka lekhetlo la bobeli. Ke ile ka bolelloa hore ke itlalehe Fort Hayes hape. Ka mor’a hore ba ntlhahlobe, ofisiri e ’ngoe e ile ea re, “U phetse hantle ho feta bohle sehlopheng sena.” Ke ile ka re, “Kea utloa, feela nke ke ka ea sesoleng.” Ke ile ka qotsa lengolo la 2 Timothea 2:3 ’me ka re, “Ke se ke ntse ke le lesole la Kreste.” Ofisiri eo e ile ea thōla nako e telele, eaba e re, “U ka tsamaea.”

Nakoana ka mor’a moo, ke ile ka ea sebokeng sa ba lakatsang ho ea Bethele, kopanong e neng e tšoaretsoe Cincinnati, Ohio. Mor’abo rōna Milton Henschel o ile a re ho hlokahala barab’abo rōna ba ikemiselitseng ho sebetsa ka thata. Ke ile ka kenya kōpo, ’me ka amoheloa. Ke sebelelitse Bethele e Brooklyn ho tloha ka August 1954.

Haesale ke e-na le mosebetsi o mongata mona Bethele. Ke qetile lilemo tse ngata ke hlokomela litanka tse futhumatsang metsi a sebelisoang sebakeng sa khatiso le liofising, ke lokisa mechine le liloko tsa mamati. Ke ne ke boetse ke sebetsa Liholong Tsa Kopano tse New York City.

Ke thabela tokisetso ea Bethele ea temana ea letsatsi le Thuto ea Molula-Qhooa, haesita le ho ea tšimong ea phutheho. Ha e le hantle, lintho tsena ke tseo malapa ’ohle a Lipaki Tsa Jehova a lokelang ho li etsa kamehla. Ha malapa a tšohla temana ea letsatsi hammoho, a tšoara Borapeli ba Lelapa kamehla, a nka karolo libokeng tsa phutheho le ho bolela litaba tse molemo ka cheseho, bohle ka lapeng ba tla atamela ho Jehova.

Ke ’nile ka ba le metsoalle e mengata Bethele le phuthehong. E meng ea eona e ne e le batlotsuoa ’me e se e le leholimong. E meng e ne e se batlotsuoa. Ke hlokometse hore bahlanka bohle ba Jehova ha baa phethahala, ho akarelletsa le ba Bethele. Haeba ho bile le moo re sa utloaneng teng le mor’abo rōna, ke leka ho bōpa khotso. Ke nahana ka Matheu 5:23, 24 e bontšang kamoo re lokelang ho rarolla liphapang kateng. Ha ho bonolo ho kōpa tšoarelo, empa hangata ke hona ho lokisang litaba.

KE KHOLA LITHOLOANA TSE MOLEMO TŠEBELETSONG

Hona joale ha ke sa khona ho ea ka ntlo le ntlo ka lebaka la botsofali, empa ke ntse ke paka ka litsela tse ling. Ke ithutile ho bua Sechaena sa Mandarin ’me ke thabela ho pakela batho ba se buang ha ke le seterateng. Ka linako tse ling, ke tsamaisa limakasine tse 30 kapa 40.

Ke bile ke na le poelo ea Lechaena! Ka le leng, ngoanana e mong ea mosa ea neng a ntse a fa batho lipampiri tse bapatsang khoebo, o ile a ncheba a bososela. Le ’na ke ile ka bososela ’me ka mo fa Molula-Qhooa le Tsoha! tsa Sechaena. O ile a li nka, ’me a mpolella hore lebitso la hae ke Katie. Ka mor’a moo, neng le neng ha Katie a mpona, o ne a tla hore re tl’o qoqa. Ke ne ke mo bolella mabitso a litholoana le meroho ka Senyesemane, ebe o oa nketsisa. Ke ile ka boela ka mo hlalosetsa litemana tsa Bibele, ’me ka mo fa buka ea Seo Bibele e se Rutang. Ka mor’a libeke tse seng kae, o ile a nyamela.

Likhoeli hamorao, ke ile ka fa ngoanana e mong hape limakasine, ea neng a ntse a fana ka lipampiri tse bapatsang khoebo. Bekeng e latelang, o ile a mpha selefouno ea hae ’me a re, “Bua le motho ke enoa, ea Chaena.” Ka re, “Ha ho na motho eo ke mo tsebang Chaena.” Empa o ile a mphehella, kahoo ka nka fono eaba ke re, “Hello, ke Robison ea buang.” Motho eo a re, “Robby, ke ’na Katie. Ke se ke khutletse Chaena.” Ka re, “Chaena?” Katie a re, “E. Motho eo ea u fileng fono ke ngoan’eso. U nthutile lintho tse ngata tsa bohlokoa. Ke kōpa hore le eena u mo rute.” Ke ile ka re, “Katie, ke tla etsa joalo. Kea leboha ka hore u mpolelle moo u seng u le teng.” Nakoana ka mor’a moo, ngoan’abo Katie le eena o ile a nyamela. Ke tšepa hore banana ba babeli bao ba ntse ba tsoela pele ho ithuta ka Jehova moo ba leng teng.

Ke se ke sebelelitse Jehova ka lilemo tse 73, ’me kea leboha hore ebe o ile a nthusa hore ke lule ke tšepahala ha ke le teronkong. Banab’eso le bona ba re ke ile ka ba khothatsa ka hore ke mamelle khanyetso ea Ntate ke sa tele. Hamorao, ’Mè le banab’eso ba tšeletseng ba ile ba kolobetsoa. Ntate le eena o ile a fetoha hobane ka linako tse ling o ne a ee a chakele libokeng, pele a hlokahala.

Ha Molimo a rata, metsoalle le ba lelapa leso ba ileng ba hlokahala ba tla tsosoa lefatšeng le lecha. Nahana hore na re tla thaba hakaakang, ha re se re sebeletsa Jehova ka ho sa feleng re e-na le baratuoa ba rōna!a—Sheba naletsana.