Mothehi oa Mokhatlo oa Lipaki Tsa Jehova ke Mang?

Mokhatlo oa kajeno oa Lipaki Tsa Jehova o qalile ho elella qetellong ea lekholo la bo19 la lilemo. Ka nako eo, sehlopha se senyenyane sa Liithuti Tsa Bibele tse neng li lula haufi le Pittsburgh, Pennsylvania, United States, li ile tsa qala ho hlahloba Bibele ka tsela e hlophisitsoeng. Li ne li bapisa lithuto tse rutoang likerekeng le seo Bibele e hlileng e se rutang. Li ile tsa qala ho hatisa seo li ithutileng sona libukeng, likoranteng le makasineng eo hona joale e bitsoang Molula-Qhooa—O Tsebahatsa ’Muso oa Jehova.

Sehlopheng seo sa liithuti tsa Bibele ho ne ho e-na le monna ea bitsoang Charles Taze Russell. Le hoja Russell a ile a etella pele mosebetsi oa ho ruta Bibele ka nako eo ’me e bile eena oa pele oa ho hatisa Molula-Qhooa, e ne e se mothehi oa bolumeli bo bocha. Sepheo sa Russell le sa Liithuti tse ling tsa Bibele, e leng kamoo sehlopha seo se neng se tsejoa kateng, e ne e le ho ntšetsa pele lithuto tsa Jesu Kreste le ho latela mekhoa ea phutheho ea Bakreste ba lekholong la pele la lilemo. Kaha Jesu ke Mothehi oa Bokreste, re nka hore ke eena mothehi oa mokhatlo oa rōna.—Bakolose 1:18-20.