Ho Halalela ho Bolela’ng?

Karabo ea Bibele

Ho halalela ho bolela ho ho ikarola linthong tse silafetseng. Lentsoe la Seheberu le fetoletsoeng e le “ho halalela” le bolela “ho ikarola.” Ka hona, ntho e halalelang ha e sebelisoe ke motho e mong le e mong ka lebaka la ho khetheha le ho hloeka ha eona.

Molimo ke eena ea halalelang ka ho fetisisa. Bibele e re: “Ha ho na motho ea halalelang joaloka Jehova.”a (1 Samuele 2:2) Ke ka hona Molimo e leng eena ea tšoanelehang ho beha litekanyetso tsa hore na ntho e halalelang ke e joang.

Lentsoe “ho halalela” le ka sebelisoa ha ho buuoa ka lintho tse amanang le Molimo, haholo-holo tse sebelisoang ka ho khetheha ha re mo rapela. Ka mohlala, Bibele e bua ka:

• Libaka tse halalelang: Molimo o ile a bua le Moshe a le lelakabeng la mollo har’a sehlahla se meutloa, a re: “Sebaka seo u emeng ho sona sea halalela.”​—Exoda 3:2-5.

• Mekete e halalelang: Baiseraele ba ne ba rapela Jehova ka ho lula ba e-ea meketeng ea bolumeli e bitsoang “likopano tse halalelang.”​—Levitike 23:37.

• Lintho tse halalelang: Lintho tse neng li sebelisoa tempeleng e Jerusalema ha ho ne ho rapeloa Molimo li ne li ne li bitsoa ‘lisebelisoa tse halalelang.’ (1 Marena 8:4) Lisebelisoa tsena li ne li lokela ho tšoaroa ka tsela e khethehileng le hoja li ne li sa lokela ho rapeloa.b

Na motho ea sa phethahalang a ka halalela?

Ho joalo hobane Molimo o re Bakreste ‘ba halalele hobane oa halalela.’ (1 Petrose 1:​16) Ke ’nete hore batho ba sa phethahalang ba ke ke ba halalela joaloka Molimo empa haeba ba mamela melao ea hae e lokileng a ka ba nka ba halalela ebile ba amoheleha. (Baroma 12:1) Motho ea loanelang ho halalela o bontša seo ka mantsoe le liketso. Ka mohlala, o mamela keletso ea Bibele e reng ‘a halalele le hore a se ke a etsa boitšoaro bo bobe bo amanang le thobalano’ le hore ‘a halalele linthong tsohle tseo a li etsang.’​—1 Bathesalonika 4:3; 1 Petrose 1:15.

Na motho a ka khaotsa ho halalela?

Ho joalo hobane haeba a ka lahla litekanyetso tsa Molimo tsa boitšoaro, Molimo ha a sa tla mo nka a halalela. Ka mohlala, lengolo la Bibele la Baheberu le ne le ngoletsoe batho ba halalelang ’me le ne le ba lemosa hore “ho se ke ha e-ba le ea bang le pelo e mpe e se nang tumelo ka lebaka la ho suthela hole le Molimo ea phelang.”​—Baheberu 3:​1, 12.

Maikutlo a fosahetseng ka ho halalela

Maikutlo a fosahetseng: Motho a ka halalela haeba a khetha ho se kene lenyalong.

’Nete: Le hoja Mokreste a ka khetha ho se kene lenyalong, seo ha se bolele hore oa halalela mahlong a Molimo. Ke ’nete hore batho ba sa kenang lenyalong ba ka khona ho sebeletsa Molimo ba sa sitisoe ke letho. (1 Bakorinthe 7:​32-​34) Leha ho le joalo, Bibele e re batho ba keneng lenyalong le bona ba ka halalela, ebile e mong oa baapostola ba Jesu e leng Petrose o ne a nyetse.​—Matheu 8:​14; 1 Bakorinthe 9:5.