Naletsana
a Luther o ne a tsitlalletse ka matla khopolong ea “ho lokafatsoa ka tumelo feela” hoo phetolelong ea hae ea Bibele, a ileng a eketsa lentsoe “feela” ho Ba-Roma 3:28. Hape o ne a sa khotsofala ke buka ea Jakobo ka polelo ea eona ea hore ‘tumelo e se nang mesebetsi e shoele.’ (Jakobo 2:17, 26) O ile a hlōleha ho hlokomela hore ho Baroma, Pauluse o ne a bua ka mesebetsi ea Molao oa Sejode.—Ba-Roma 3:19, 20, 28.
27. (a) Ke lithuto life tsa K’hatholike le mekhoa tseo e seng tsa Mangolo tse ileng tsa bolokoa ke Baprostanta? (b) Baprostanta ba ile ba batla liphetoho life?
27 Ho sa tsotellehe sena, The Catholic Encyclopedia e bolela hore Luther “o ile a boloka litumelo tse ngata tsa boholo-holo le litšebeletso kamoo a ileng a bona ho loketse ponong ea hae e khethehileng ka sebe le tokafatso.” Phatlalatso ea Tumelo ea Augsburg e bolela sena mabapi le tumelo ea Maluthere, “ha ho letho le hananang le Mangolo, kapa Kereke ka Kakaretso, kapa le eona Kereke ea Roma, kamoo Kereke eo e tsejoang ke lingoli.” Haele hantle, tumelo ea Maluthere, joalokaha e thathamisitsoe ho Phatlalatso ea Tumelo ea Augsburg, e ne e akarelletsa lithuto tseo e seng tsa Mangolo tse kang Boraro-bo-bong, hore moea ha o shoe, le tlhokofatso ea ka ho sa feleng, hammoho le mekhoa e kang kolobetso ea masea le matsatsi a phomolo a kereke le mekete. Ka lehlakoreng le leng, Maluthere a ne a batla liphetoho tse itseng, tse kang hore batho ba lumelloe ho amohela veine le bohobe ’Miseng le hore ho se nyale ha baprista, likano tsa boitlami, le maipolelo a qobelloang li felisoe.