Joaloka Liapole tsa Khauta

LIAPOLE—ke tse thabisang mahlo le mahalapa hakaakang! Bibele e sebelisa tholoana ena e latsoehang ka tsela ea papiso e susumetsang monahano ha e re: “Polelo e builoeng ka motsotso o tšoanelehang, e joalo ka liapole tsa khauta pitsaneng ea silefera.” (Liproverbia 25:11) Ho boleloa eng ka polelo ena?

“Liapole tsa khauta pitsaneng ea silefera” li ka ’na tsa bolela mesebetsi e betliloeng, joaloka terei e betliloeng ea silefera e nang le tholoana ea khauta holim’a eona. Kaha litemana tsa pejana khaolong ena li bua ka ho atamela morena, temana ena e ka ’na ea bolela limpho tse filoeng ’musi—mekhabiso ea khauta ka sebōpeho sa liapole tse behiloeng holim’a literei tsa silefera. (Liproverbia 25:6, 7) Botle bo tsotehang ruri!

Ho na le botle bo tšoanang mantsoeng a loketseng, a hlomphehang, a leng nakong, ebang a ngotsoe kapa a builoe. Ke a thabisang, a khothatsang, le a molemo ka litsela tse ngata. Haholo-holo litaba tsa bomolimo tse bululetsoeng ka Bibeleng li ntle joaloka “liapole tsa khauta pitsaneng ea silefera.”

Joalokaha ho tšoantšelitsoe ka polelo e bohlale ea Morena Salomone ho Liproverbia 25:11, o “’nile a phehella ho ngoloa ha mantsoe a khahlehang le ho ngoloa ha mantsoe a nepahetseng a ’nete.” (Moeklesia 12:10, NW; Liproverbia 25:1) Makholo a lilemo hamorao, moapostola oa Mokreste Pauluse o ile a ngola: “Lengolo lohle le bulutsoeng ke Moea oa Molimo, le na le molemo.” (2 Timothea 3:16) E, Bibele e fupere keletso e molemo, boprofeta, litšoantšo tsa seo ho buuoang ka sona, ’me linnete tse khanyang le tsa botle bo joalo li fetisa hōle mesebetsi ea baetsi ba hloahloa ka ho fetisisa ba mesebetsi ea matsoho. Ho feta moo, e mong le e mong ea fumanang bohlale Lentsoeng la Molimo, Bibele, o fumana letlotlo la bohlokoahali ’me a ka thabela tšepo ea bophelo bo sa feleng.—Liproverbia 4:7-9; Johanne 17:3.