10. Lipaki tse tšepahalang tsa Jehova li lokela ho etsa eng ha li ntse li hatakeloa?

¹⁰ Leha bana ba tšepahalang ba ntse ba hatakeloa, ha ba khaotse ho ba lipaki tse tšepahalang tsa Jehova. Ka hona, boprofeta boo bo tsoela pele ho re: “‘Ke tla etsa hore lipaki tsa ka tse peli li profete ka matsatsi a sekete le makholo a mabeli le mashome a tšeletseng li apere lesela la mokotla.’ Li tšoantšetsoa ke lifate tse peli tsa mohloaare le liluloana tse peli tsa mabone ’me li eme ka pel’a Morena oa lefatše.”—Tšenolo 11:3, 4.

13. (a) Taba ea hore Bakreste ba tlotsitsoeng ba ne ba tšoantšetsoa ke lipaki tse peli e bontša’ng? (b) Ke boprofeta bofe ba Zakaria boo re bo hopolang ha Johanne a re lipaki tse peli ke “lifate tse peli tsa mohloaare le liluloana tse peli tsa mabone”?

¹³ Taba ea hore ba ne ba tšoantšetsoa ke lipaki tse peli e re tiisetsa hore molaetsa oa bona o ne o nepahetse ebile e le o nang le motheo o tiileng. (Bapisa le Deuteronoma 17:6; Johanne 8:17, 18.) Johanne o ba bitsa “lifate tse peli tsa mohloaare le liluloana tse peli tsa mabone,” o re ba ‘eme ka pel’a Morena oa lefatše.’ Mona ho hlakile hore o ne a bua ka boprofeta ba Zakaria, ea ileng a bona seluloana sa lebone se makala a supileng le lifate tse peli tsa mohloaare. Ho ile ha thoe lifate tsa mohloaare li tšoantšetsa “batlotsuoa ba babeli,” ke hore, ’Musisi Zorobabele le Moprista ea Phahameng Joshua, “ba emeng haufi le Morena oa lefatše lohle.”—Zakaria 4:1-3, 14.

14. (a) Pono ea Zakaria ea lifate tse peli tsa mohloaare e ne e bontša’ng? hona seluloana sa lebone se ne se bontša’ng? (b) Bakreste ba tlotsitsoeng ba ne ba tla feta har’a maemo afe nakong ea ntoa ea pele ea lefatše?

¹⁴ Zakaria o phetse nakong ea ho tsosolosa, ’me pono ea hae ea lifate tse peli tsa mohloaare e ne e bolela hore Zorobabele le Joshua ba ne ba tla hlohonolofatsoa ka moea oa Jehova ha ba matlafatsa batho bakeng sa mosebetsi. Pono ea seluloana sa lebone e ile ea hopotsa Zakaria hore a se ke ‘a nyelisa letsatsi la lintho tse nyenyane’ hobane merero ea Jehova e ne e tla phethahatsoa—“‘eseng ka lebotho la sesole, kapa ka matla, empa ka moea oa ka,’ ho boletse Jehova oa mabotho.” (Zakaria 4:6, 10; 8:9) Sehlotšoana sa Bakreste se ileng sa phehella ho tlisetsa batho leseli la ’nete nakong ea ntoa ea pele ea lefatše se ne se tla sebelisoa ka ho tšoanang mosebetsing oa tsosoloso. Le bona e ne e tla ba mohloli oa khothatso ’me le hoja ba ne ba fokola hakaalo ka palo, ba ne ba tla ithuta ho itšetleha ka matla a Jehova, ba sa nyelise letsatsi la lintho tse qalang tse nyenyane.