Na U ka Tšepa Mehlolo e Tlalehiloeng ka Bibeleng?

HAEBA motho ea itseng a u bolella pale e hlollang, ho hlakile hore ntho e neng e ka etsa hore u kholoe pale eo kapa u se ke ua e kholoa ke hore na motho ea u bolellang eona oa tšepahala na. Ntho e etsang hore u mo tšepe hase feela tsela eo a u phetelang pale eo ka eona empa hape ke hore na motho eo o tumme hakae ka ho bua ’nete. Etsoe haeba ka lilemo a ile a u bolella ’nete ebile ho se mohla a kileng a u thetsa ka boomo, u tla ba le lebaka le utloahalang la hore u mo kholoe.

Hoa tšoana le ka mehlolo e tlalehiloeng ka Bibeleng. Kaofela ha rōna re ne re le sieo ha e ne e etsahala. Empa re ka khona ho tseba hore pale ea Bibele ea tšepahala haeba Bibele e tsebahala ka ho bua ’nete. Joang? Mehlala e latelang ke e meng e bontšang hore mehlolo e tlalehiloeng ka Bibeleng ke ’nete.

Mehlolo e mengata e ne e etsetsoa libakeng tsa sechaba. Ka linako tse ling mehlolo eo e ne e bonoa ke batho ba likete kapa ba limilione. (Exoda 14:21-31; 19:16-19) E ne e sa etsetsoe sephiring, moo batho ba sa e boneng.

Mehlolo eo e ne e sa rarahana. Ho ne ho se na lintho tse itseng tse khethehileng tse neng li sebelisoa ho etsa mehlolo kapa mabone a sebelisoang ho qhekella batho. Boholo ba mehlolo e tlalehiloeng ka Bibeleng e ne e etsoa e sa reroa empa e ne e le ka lebaka la ho hlaha ha boemo bo itseng bo sa lebelloang kapa ka lebaka la hore batho ba ne ba kōpa thuso. (Mareka 5:25-29; Luka 7:11-16) Maemong a joalo, ho ne ho ke ke ha etsahala hore ebe motho ea etsang mohlolo o ile a rera ho etsa mehlolo eo esale pele.

Morero oa batho ba neng ba etsa mehlolo e ne e se hore ba iphumanele botumo, thoriso le maruo. Ho e-na le hoo, morero e ne e le ho isa thoriso ho Molimo. (Johanne 11:1-4, 15, 40) Batho ba ileng ba leka ho ithuisa ka ho etsa mehlolo ba ile ba nyatsuoa.—2 Marena 5:15, 16, 20, 25-27; Liketso 8:18-23.

Mefuta-futa ea mehlolo e tlalehiloeng ka Bibeleng e bontša hore e ne e ke ke ea e-ba mesebetsi ea batho. Ka mohlala, leoatle le moea li ile tsa khutsisoa, metsi a ile a fetoloa veine, pula e ile ea emisoa eaba ea nesoa, ba bangata ba kulang ba ile ba folisoa ’me lifofu li ile tsa bona. Mehlolo ena kaofela le e meng e mengata e bontša hore e ile ea etsoa ke ea nang le matla a phahametseng a motho.—1 Marena 17:1-7; 18:41-45; Matheu 8:24-27; Luka 17:11-19; Johanne 2:1-11; 9:1-7.

Esita le bahanyetsi ba boneng mehlolo eo ha baa ka ba hana hore e etsahetse. Ha Jesu a tsosa motsoalle oa hae Lazaro, batho ba bolumeli ba neng ba le khahlanong le Jesu ha baa ka ba hana hore Lazaro o ne a shoele. Ho ne ho se na hore ba ka hana kaha Lazaro o ne a se a e-na le matsatsi a mane a patiloe. (Johanne 11:45-48; 12:9-11) Esita le lilemong tse makholo ka mor’a lefu la Jesu, bangoli ba Talmud, e leng pokello ea melao ea Sejuda, ba ile ba ’na ba lumela hore Jesu o ne a e-na le matla a ho etsa mehlolo. Seo ba neng ba se belaella feela e ne e le mohloli oa matla ao. Ka ho tšoanang, ha barutuoa ba Jesu ba ne ba isoa ka pel’a lekhotla la Bajuda, ha baa ka ba botsoa potso e reng: “Na le entse mohlolo?” Empa ba ile ba botsoa ho re: “Ke ka matla afe kapa ka lebitso la mang le entseng see?”—Liketso 4:1-13.

Kahoo na u ka tšepa seo Bibele e re bolellang sona ka mehlolo? Ho latela seo re seng re se tšohlile, ho hlakile hore litlaleho tsa Bibele mabapi le mehlolo li na le bopaki ba hore lia tšepahala. Ho na le mabaka a mang a etsang hore re tšepe litlaleho tsena tsa Bibele. Ka mohlala, ha Bibele e bua ka ketsahalo e itseng, hangata e fana ka nako ea ketsahalo eo, sebaka, le mabitso a batho ba neng ba ameha. Esita le batho ba tšoaeang Bibele liphoso ba ile ba makatsoa ke ho nepahala ha lintlha tsa histori tse fumanehang ka Bibeleng. Ho se ho phethahetse boprofeta bo bongata ba Bibele, esita le lintlha tse nyenyane ka ho fetisisa tsa bona. Ho phaella moo, Bibele e na le likeletso tse ngata mabapi le hore na re ka phelisana le batho ba bang joang ka thabo—e leng likeletso tse thusitseng batho ba lilemo tse fapaneng le ba maemo a fapaneng. Mabapi le hore na re ka phelisana joang, ha ho likeletso tse molemo ho feta tse hlahang ka Bibeleng.

Haeba ha u e-s’o tšepe Bibele ka ho feletseng, ke’ng ha u sa iphe nako ea ho e hlahloba ka hloko? Ha u ntse u ithuta eona, u tla e tšepa haholoanyane. (Johanne 17:17) U tla hlokomela hore u ka tšepa seo e u bolellang sona ka mehlolo e etsahetseng nakong e fetileng. Hang ha u se u lumela litlaleho tseo, u tla ba le lebaka le utloahalang la ho tšepa seo Bibele e reng se tla etsahala haufinyane.

[Setšoantšo se leqepheng la 7]

Bahanyetsi ba Jesu ha baa ka ba hana hore Lazaro o ne a shoele

Mehlolo eo Haufinyane e Tla Etsahala

HAEBA ngaka e itseng e ne e tlameha ho tla u etsa opereishene e khōlō, u ne u tla ikutloa joang haeba u ne u ka fumana hore ha ho mohla ngaka eo e kileng ea etsa opereishene ea mofuta oo? Ho hlakile hore u ne u tla tšoenyeha. Empa ho thoe’ng haeba, ka lehlakoreng le leng u bolelloa hore ngaka ena ke ngaka e itlhommeng pele le hore e ile ea etsa liopereishene tse ngata tsa mofuta ona tse ileng tsa atleha? Na u ne u ke ke ua tšepa hore e tla u thusa?

Lefatše lena le kulang leo re phelang ho lona le hloka “opereishene” ka potlako. Ka Lentsoe la hae Bibele, Jehova Molimo o ile a tšepisa hore o tla etsa lefatše lena Paradeise hape. (2 Petrose 3:13) Empa e le hore seo se etsahale, ho lokela ho felisoe bokhopo pele le hore bo tlosoe ka ho feletseng. (Pesaleme ea 37:9-11; Liproverbia 2:21, 22) Maemo ’ohle a utloisang bohloko ao re a bonang ho re potoloha a lokela ho felisoa pele lefatše e e-ba paradeise hape. Ruri Molimo o tla etsa mohlolo ho phethahatsa sena!—Tšenolo 21:4, 5.

Lipaki Tsa Jehova li lumela hore haufinyane liphetoho tseo tse khōlō li tla etsahala. Hobane’ng? Hobane mehlolo eo Jehova Molimo a seng a e entse e bontša hore o na le matla a ho phethahatsa seo a se tšepisitseng. Bapisa mehlolo e tšeletseng feela e ka Bibeleng le litšepiso tseo Bibele e reng li tla etsahala ka moso.

E se eka u ka tsoela pele u ithuta ka seo Bibele e se tšepisang ka bokamoso. Ha tumelo ea hao e ntse e hōla, le tšepo ea hao e tla hōla—e leng tšepo ea ho phela nakong eo u tla rua molemo mehlolong eo Jehova a e etsang.

[Lebokose/Litšoantšo tse leqepheng la 9, 10]

MOHLOLO:

JESU O ILE A FEPA BATHO BA LIKETE KA MAHOBE LE LITLHAPI TSE ’MALOA.—MATHEU 14:13-21; MAREKA 8:1-9; JOHANNE 6:1-14.

TŠEPISO:

“Ka sebele lefatše le tla fana ka lihlahisoa tsa lona; Molimo, Molimo oa rōna, o tla re hlohonolofatsa.”—PESALEME EA 67:6.

SENA SE BOLELA HORE:

HO KE KE HA HLOLA HO E-BA LE MOTHO EA TLA BOLAOA KE TLALA.

MOHLOLO:

JESU O ILE A ETSA HORE LIFOFU LI BOELE LI BONE.—MATHEU 9:27-31; MAREKA 8:22-26.

TŠEPISO:

“Mahlo a lifofu a tla tutuboloha.”—ESAIA 35:5.

SENA SE BOLELA HORE:

BATHO BOHLE BA FOUFETSENG BA TLA BOELA BA BONE.

MOHLOLO:

JESU O ILE A FOLISA BA HOLOFETSENG.—MATHEU 11:5, 6; JOHANNE 5:3-9.

TŠEPISO:

“Ea holofetseng o tla tlōla joalokaha khama e tona e tlōla.”—ESAIA 35:6.

SENA SE BOLELA HORE:

MEFUTA EOHLE EA BOKOOA E TLA FELISOA.

MOHLOLO:

JESU O ILE A FOLISA MALOETSE A MEFUTA-FUTA.—MAREKA 1:32-34; LUKA 4:40.

TŠEPISO:

“Ha ho moahi ea tla re: ‘Kea kula.’”—ESAIA 33:24.

SENA SE BOLELA HORE:

MAFU ’OHLE A RE FOKOLISANG ’MELENG A TLA FELISOA. RE TLA BA LE BOPHELO BO PHETHAHETSENG BA ’MELE.

MOHLOLO:

JESU O ILE A LAOLA MAEMO A LEHOLIMO.—MATHEU 8:23-27; LUKA 8:22-25.

TŠEPISO:

“Ka sebele ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona. Ba ke ke ba sehlela lefeela.”—ESAIA 65:21, 23.

“U tla ba hōle le khatello—etsoe u ke ke ua tšaba le ea mong—le ntho leha e le efe e tšosang, kaha e ke ke ea u atamela.”—ESAIA 54:14.

SENA SE BOLELA HORE:

HO KE KE HA HLOLA HO E-BA LE LIKOLUOA TSA TLHAHO.

MOHLOLO:

JESU O ILE A TSOSA BAFU.—MATHEU 9:18-26; LUKA 7:11-17.

TŠEPISO:

‘Bohle ba mabitleng a khopotso . . . ba tla tsoa.’—JOHANNE 5:28, 29.

“Leoatle la nehelana ka bafu ba ho lona, ’me lefu le Hadese tsa nehelana ka bafu ba ho tsona.”—TŠENOLO 20:13.

SENA SE BOLELA HORE:

BARATUOA BA RŌNA BA SHOELENG BA TLA TSOSOA.