Likenyelletso Tse Tla Tsosa Thahasello

¹ Jesu o ne a sebelisa likenyelletso ka bohlale. Ebang o ne a bua le sehlopha se seholo sa batho kapa le motho a le mong, Jesu o ne a hapa tlhokomelo ea bamameli ba hae ka ho etsa hore ba kenelle tabeng. O ile a bontša bamameli ba hae bohlokoa ba taba eo a buang ka eona.—Matt. 5:3-12; Joh. 4:7-30.

² Tokisetso e Etsoang Esale Pele ea Hlokahala: E le hore re ka tsosa thahasello molaetseng oa rōna, ho hlokahala hore re lokise likenyelletso tsa rōna hore li etse hore motho eo re buang le eena a kenelle tabeng, li ame lintho tseo a amehileng ka tsona, ’me li bontše hore molaetsa oa ’Muso o tla mo thusa.

³ Ha u lokisetsa tšebeletso, hlahloba lintho tseo hona joale batho ba amehileng ka tsona. Na ho na le sehlooho sa litaba sa morao-rao se hapileng tlhokomelo ea e mong le e mong? Mocha o tla ba le thahasello ho eng? Motho e moholo eena? Ho thoe’ng ka banna, basali, kapa batsoali? Ho e-na le ho sebelisa kenyelletso e tšoanang ntlong e ’ngoe le e ’ngoe, hangata ho ba le katleho e khōloanyane ho lokisetsa likenyelletso tse ’maloa tse sa tšoaneng le ho lokela ho li fetola ha u hlokomela tsela eo beng ba matlo ba arabelang ka eona. Bahoeletsi ba bang ba bile le katleho e khōlō ha ba lokisetsa ’me ba sebelisa likenyelletso tse fapa-fapaneng tse tsoang bukeng ea Ho Bea Mabaka lekhetlo le leng le le leng ha ba ea tšebeletsong ea ntlo le ntlo. (rsSU maq. 9-15) Sena se boloka katamelo ea bona e le ncha e bile e thahasellisa.

⁴ Khoeling ea August, mohlomong u ka batla ho sebelisa nehelano e kang ena:

◼ “Lumela. Re ntse re buisana le ba bang ba baahisani hore na ke litšoaneleho life tseo ba ka batlang hore motho ea busang ba bang a be le tsona. Na nka u botsa hore ke tšoaneleho efe kapa tse peli tseo u nahanang hore ke tsa bohlokoa ka ho fetisisa? [Emela karabo. Leboha lintlha. Lumellana le tsona haeba ho loketse.] Na u ne u tseba hore Bibele e hlalosa litšoaneleho tsa Ea amohetsoeng hore e be ’musi oa batho? Ke mona ho Esaia 9:6, 7. [E bale.] U nahana hore ho tla ba joang ho phela tlas’a ’musi ea joalo?” Emela karabo ebe u lebisa tlhokomelo ho Pesaleme ea 146:3, 4 le boitsebiso bo bukeng ea Ho Bea Mabaka maqephe 377-8 ka boleng bo tiisitsoeng ba puso ea Jesu. Kapa ho ka sebelisoa buka Motho e Moholo ka ho Fetisisa, khaolo 133, ho etsa hore ho be le puisano e tsoelang pele.

⁵ Haeba u buisana le batho ba sekametseng bolumeling, nehelano e latelang e ka sebetsa hantle ha u buella buka Motho e Moholo ka ho Fetisisa.

Ka mor’a tumeliso e tloaelehileng, u ka re:

◼ “Molimo o lebelletse eng ho rōna joaloka Bakreste? Bibele e re laela hore re etsise mohlala o behiloeng ke motho e moholo ka ho fetisisa lefatšeng, Jesu Kreste. [Bala 1 Petrose 2:21.] O rutile balateli ba hae hore ba rate baahisani ba bona, ba ipoloke ba hloekile boitšoarong, ’me ba rapelle hore ’Muso oa Molimo o tle. Ho bolokeha ha rōna ho itšetlehile ka ho nka Jesu e le ’Moloki oa rōna le ka hore re mo utloe. [Bala Johanne 14:6.] Jesu e ne e se motho feela ea tloaelehileng. Buka ena e mo hlalosa e le motho e moholo ka ho fetisisa ea kileng a phela. Kaha re itšetlehile ka eena bakeng sa hore re bolokehe, na ha u ikutloe hore ho hlokahala hore re ithute sohle seo re ka se khonang ka mosebetsi oa hae le seo a se rutileng? Buka ena e lokisitsoe ka ho khethehileng bakeng sa morero oo, ’me nka thabela hore u be le kopi ena.”

⁶ Ka ho etsisa mekhoa ea Jesu ea ho hapa thahasello le ho kenyelletsa bamameli ba hae puisanong, re bontša batho ba lipelo li tšepahalang bohlokoa ba lintho tsa moea.

Ho Sebelisa Buka Motho e Moholo ka ho Fetisisa Maetong a ho Boela

¹ Moapostola Pauluse o ne a tseba bohlokoa ba ho ba motho ea khothetseng ha ho tluoa tabeng ea ho hlokomela batho ba ileng ba bontša thahasello ’neteng. O ile a ba tšoantša le limela tse bonojoana, tse hlokang ho nosetsoa le ho hlaoleloa ka linako tsohle. (1 Ba-Kor. 3:6-9) Ka ho tšoanang, le kajeno batho ba thahasellang ba hloka tlhokomelo e bonolo eo re fanang ka eona ha re etsa maeto a ho boela ho hlaolela khōlō ea bona ea moea.

² Ho molemo ho hopola hore hangata batho bao re eang ho bona ba hloka likhopotso tse tla ba thusa ho hopola lintlha tseo re buileng ka tsona puisanong ea nakong e fetileng. Ka hona, leetong le leng le le leng la ho boela, ho tla ba bohlale ho hlahloba hakhutšoaane seo le ileng la buisana ka sona ketelong e fetileng, u totobatse lintlha tseo mong’a ntlo a ileng a li rata ka ho khethehileng. Kenyelletsa mong’a ntlo puisanong ’me u lemohe thahasello ea hae le litlhoko tsa hae hang-hang.

³ Ha u etsa leeto la ho boela, ebang u tsamaisitse buka “Motho e Moholo ka ho Fetisisa” kapa che, u ka sebelisa katamelo ena e tobileng ea ho qalisa thuto:

◼U ka ’na ua botsa: “Ke eng se ileng sa etsa hore Jesu e be motho e moholo ka ho fetisisa lefatšeng?” U ka arabela ka ho supa ho tse ’maloa tsa likhaolo tse 133 tse buang ka bophelo ba hae, botho ba hae, thuto ea hae, le mesebetsi ea hae. Khaolo 24 e hlalosa morero oa hae oa ho tla lefatšeng. Khaolo 35 e re hopotsa Thuto ea hae e tummeng ea Thabeng. Khaolo 133 e fana ka tlhase ea mahlohonolo ao batho ba tla a thabela ha a phetha mosebetsi oa hae. Bontša mong’a ntlo kamoo lipotso le mangolo a qetellong ea khaolo ka ’ngoe a re thusang ka teng ho fumana lintlha tsa bohlokoa khaolong ka ’ngoe. Akaretsa lintlha tse ’maloa feela ebe u etsa litokisetso tse tiileng tsa ho khutlela.

⁴ Katamelo e ’ngoe e ka ba:

◼“Ka sebele ke ile ka thabela puisano ea rōna bekeng e fetileng. Batho ba bangata ba bontšitse kameho ka maemo a lefatše a ntseng a mpefala. Ke ile ka nahana hore khaolo 111 ea buka ena, Motho e Moholo ka ho Fetisisa ea Kileng a Phela, e tla u thahasellisa. [Lokisetsa ho bua ka likarolo tse khethiloeng ho khaolo 111 e le ho arabela potso e le ’ngoe kapa tse peli tsa tlhahlobo tse qetellong ea khaolo, ka mohlala: “Ke maemo afe a lefatše a tšoaeang boteng ba Kreste?” kapa “Jesu o fana ka setšoantšo sefe ho thusa barutuoa ba hae ba nakong e tlang ho lemoha ha bofelo bo se bo atametse?”] Motheong oa seo re se balang mona, u ka re tšepo ea rōna ke efe ka bokamoso bo haufi? [Emela karabo ebe u babatsa mong’a ntlo.] Re tlameha ho etsa joang haeba re tšepile ho pholoha bofelo ba tsamaiso ee e khopo?” Bala Johanne 17:3 ebe u buella thuto ea ka mehla ea lehae ea Bibele.

⁵ Ka mor’a ketelo e fetileng eo ho eona u ileng ua tsamaisa buka “Motho e Moholo ka ho Fetisisa,” u ka re:

◼“Lekhetlong le fetileng ha ke ne ke u etetse, re ile ra buisana ka maemo a lefatše ao ho hlokahalang hore a fetoloe. Na u kile ua ipotsa hore na maemo a tla ba joang lefatšeng haeba bokhopo bo le sieo?” Emela karabo ebe u phetla ho khaolo 133, u hlokomele lipotso tse peli tse qalang tse leng qetellong ea khaolo. Bala ’me u hlalose lirapa tse arabelang lipotso tsena, u shebe a mang a mangolo a qetellong ea khaolo. U ka ekelletsa puisanong ka ho phetla setšoantšong se khaolong eo.

⁶ Moo U Siileng Pampitšana: Ka linako tse ling pampitšana ea sala ketelong ea pele. Ha u etsa maeto a ho boela, u ka bua ka serapa se le seng kapa tse peli ho tsoa pampitšaneng hammoho le mangolo ao ho sa qotsoang mantsoe a ’ona. Haeba motho eo a bontša thahasello, u ka buella buka Motho e Moholo ka ho Fetisisa ebe u etsa litokisetso tsa ho ntšetsa puisano ea lōna pele ketelong e tlang.

⁷ Haeba ka botšepehi re ntse re hlokomela ho nosetsa limela tse bonojoana tsa tumelo ea Bokreste tse leng tlhokomelong ea rōna, Molimo o tla etsa hore li hōle tlotlisong le khanyeng ea hae.—1 Ba-Kor. 3:7.