Litsebiso

◼ Buka e tla sebelisoa ka September: U ka Phela ka ho sa Feleng Paradeiseng Lefatšeng ka monehelo oa R9,00. Libuka tse nyenyane ke R4,50. October: Lipeeletso tsa Tsoha! kapa Molula-Qhooa ka monehelo oa R19,00 bakeng sa likhatiso tse tsoang habeli ka khoeli. Lipeeletso tsa selemo se le seng bakeng sa likhatiso tse tsoang hanngoe ka khoeli le lipeeletso tsa likhoeli tse tšeletseng bakeng sa likhatiso tse tsoang habeli ka khoeli ke R9,50. November: Bibele—Lentsoe la Molimo kapa la Motho? ka monehelo oa R3,00. December: Motho e Moholo ka ho Fetisisa ea Kileng a Phela ka monehelo oa R9,00.

◼ Molebeli ea okamelang kapa e mong ea khethiloeng ke eena o lokela ho hlahloba li-account tsa phutheho ka September 1 kapa kapele kamoo ho ka khonehang ka mor’a moo. Tsebisang phutheho ha sena se se se entsoe.

◼ Ho bangoli ba phutheho. Ha le ngolla Mokhatlo mabapi le li-account, liodoro tsa limakasine, liodoro tsa libuka, litlaleho tsa tšebeletso ea tšimo, lipotso tse amang lipeeletso, ka linako tsohle ngolang nomoro ea phutheho ea lōna. Hape, ka kōpo tiisang hore nomoro e ngotsoe sebakeng se bontšitsoeng liforomong. Haeba le se na liforomo tsa Mokhatlo, ka kōpo li odoreng.

◼ Ho qala ka November 8, 1993, ho fihlela ka May 2, 1994, buka Ho Etsa Bophelo ba Lelapa la Hao bo Thabileng e tla ithutoa Thutong ea Buka ea Phutheho.

◼ Ka Moqebelo, October 9, 1993, lehae la Bethele le fektheri li tla koaloa bakeng sa tlhoekiso, kahoo ho ke ke ha ba le litokisetso tsa ho bontša batho mohaho.

◼ Bahoeletsi ba rerileng ho nka bopula-maliboho bo thusang ka October ba lokela ho nehelana ka likōpo tsa bona nako e sa le teng. Sena se tla lumella baholo hore ba etse litokisetso tse hlokahalang bakeng sa lingoliloeng le tšimo.

◼ Baholo ba hopotsoa hore ba latele keletso e fanoeng maqepheng 21-3 a Molula-Qhooa oa April 15, 1991, mabapi le batho leha e le bafe ba khaotsoeng kapa ba ikarotseng ba ka ’nang ba batla ho khutlisetsoa.

◼ Liphutheho li lokela ho qalisa ho odora Almanaka ea Lipaki tsa Jehova ea 1994 hammoho le odoro ea tsona ea lingoliloeng ea September. Lialmanaka li tla fumaneha ka Seafrikaanse, Sechaena, Sefora, Segerike, Sejeremane, Senyesemane, Sepotoketsi, Sesotho, Setaliana, Sexhosa, le Sezulu.

Thuto ea Buka ea Phutheho

Kemiso ea thuto ea buka ea phutheho bukeng ea Motho e Moholo ka ho Fetisisa ea Kileng a Phela.

September 6: Likhaolo 117-118

September 13: Likhaolo 119-120

September 20: Likhaolo 121-122

September 27: Likhaolo 123-124

Lebokose la Lipotso

◼ Ba shebellang kolobetso ba ka bonahatsa thabo joang?

Kolobetso ke ketsahalo ea thabo. Re thabela ho bona ba bacha ba emela lehlakore la Jehova, ba bonahatsa tumelo ea bona phatlalatsa. (Pes. 40:8) Jesu o boletse hore sena se tlisa thabo e khōlō maholimong. (Luka 15:10) Litho tsa lelapa le bahoeletsi ba ileng ba ithuta le ba kolobetsoang ba thabile ka ho khethehileng ho bona ba bacha ba nka khato ena ea bohlokoa. Empa thabo e joalo e ka bonahatsoa ka ho loketseng joang?

Kolobetso ea Jesu e fane ka mohlala bakeng sa kolobetso ea Bakreste kajeno. O ile a utloisisa hore o ne a le haufi le ho nka khato e tebileng. O ile a rapela nakong ea ha a kolobetsoa. (Luka 3:21, 22) O ne a tseba hore kolobetso ke nako ea ho thuisa le ho tebisa mohopolo. Barutuoa ba hae le bona ba ile ba hlokomela bohlokoa ba kolobetso. Ka mor’a ho tšolloa ha moea o halalelang ka letsatsi la Pentekonta ea 33 C.E., ho ile ha kolobetsoa ba ka bang 3 000. Barutuoa ba neng ba shebeletse ketsahalo eo ba ile ba itšoara joang? “Ba ne ba tiisetsa thutong ea baapostola, le kopanong ea boena, le ho ngoathoeng ha bohobe, le merapelong.” (Liketso 2:41, 42) Barutuoa ba ile ba ameha ka lintho tsa moea le ho bontšana moea oa ho amohela baeti.

Kajeno kolobetso e ’nile ea etsa hore likopano tsa Bokreste ebe tse thahasellisang. Ka sebele ho loketse ho bonahatsa thabo ea rōna ka ho opa liatla le ho fana ka pabatso ha re bona batho ka bomong ba emela Jehova. Ka lehlakoreng le leng, ho thoholetsa ho sa laoleheng, ho letsa mololi, ho tsoka matsoho, le ho hoeletsa batho ka mabitso e ka ba ho sa lokelang. Boitšoaro bo joalo bo bonahatsa ho haelloa ke kananelo bakeng sa botebo le ho halalela ha ponahatso ena ea tumelo. ’Me ena e ke ke ea ba nako e loketseng bakeng sa ho etsa lipontšo tsa ka ntle tsa ho fana ka lipalesa le limpho tse ling ho ba kolobelitsoeng nakong ea ha ba tsoa ka metsing. Kolobetso e tšoaea qaleho ea peiso eo Mokreste a e kenelang bakeng sa poloko. Re ka thaba ’me ra khothatsa ba kolobetsoang ka ho ba thusa hore ba utloisise hore kolobetso e ba fa monyetla oa ho ba le kamano e haufi le Jehova.

Sebaka seo ho kolobeletsoang ho sona e ke ke ea ba sebaka se loketseng bakeng sa ho etsa metlae, ho bapala, ho sesa, kapa boitšoaro bo bong bo ka hlakolang botebo ba ketsahalo ena. Thabo ea rōna e lokela ho bonahatsoa ka tsela e itlhomphang. Ho laoleha ha rōna le ho nka ha rōna lintho ka ho teba ho tla tlatsetsa thabong ea bohle ba leng teng.

Ruisa ba Bang Molemo ka ho Sebelisa Limakasine

¹ Re thaba hakaakang ha re amohela litokollo tsa morao-rao tsa Molula-Qhooa le Tsoha! Re nka ho le bohlokoa ho li bala kapele kamoo ho ka khonehang e le hore re ka rua molemo boitsebisong bo fanoeng. Ho phaella ho batleng boitsebiso bo ka re thusang re le batho ka bomong, ke khopolo e ntle ho batla lintlha tse ka sebelisoang ha ho nehelanoa ka limakasine ho ba bang. Re ka tšoaea likarolo tse tla ipiletsa ka ho khethehileng ho batho ba leng tšimong ea phutheho ea rōna kapa esita le ho ngola ka thōko likoping tsa rōna ho ikhopotsa lintlha tse khōlō tseo re ka buang ka tsona le kamoo ho ka nehelanoang ka sehlooho seo sebakeng seo re leng ho sona.

² Lingoliloeng tsa rōna li na le bohlokoa ba nako e telele. Le hoja haholo-holo re thahasella ho tsamaisa limakasine tsa morao-rao, ha ho hlokahale hore re lahle litokollo tsa khale, kaha boitsebiso bo ho tsona bo sa felloe ke nako. Boloka litokollo tsa khale ka mokotleng oa hao oa tšebeletso ea tšimo e le hore li be teng nakong ea ha u fana ka bopaki. Li ka ba le thuso ka ho khethehileng ha ho tsejoa tlhoko e tobileng ea mong’a ntlo. Limakasine tsa khale li ka boetse tsa sebelisoa nakong ea phutuho ea tšimo e sa abuoang.