Katoloso Lekaleng la Afrika Boroa
1 Hona joale lekala la Afrika Boroa le na le tokelo ea ho hatisetsa linaha tse ngata tsa Afrika limakasine. Ntle le ho hatisa limakasine tsa tšimo ea rōna, e akarelletsang Botswana, Lesotho, Namibia, St. Helena le Swaziland, re boetse re hatisa limakasine le libukana bakeng sa Angola, Burundi, Congo, Malawi, Mozambique, Zambia le Zimbabwe. Re hatisa limakasine ka lipuo tse 25.
2 Lelapa la Bethele le ile la thaba haholo ha le utloa hore Sehlopha se Busang se lumetse hore se tla rekela makala lefatšeng lohle mechine ea khatiso e mecha e supileng e hatisang ka lebelo le leholo ea rotary web offset ea moetso oa MAN Lithoman. Lekala la Afrika Boroa le tla fumana o mong oa mechine ena. Mochine ona o mocha o tla hatisa limakasine le likaroloana tsa libuka (e leng likarolo tse ikemetseng tsa libuka) ka lebelo la tse 90 000 ka hora. O tla nka sebaka sa mochine oa rōna oa khatiso oa TKS o bileng teng ka lilemo tse 24, o hatisang limakasine tse 19 000 ka hora, ’me o ile oa sebelisetsoa ho hatisa limakasine le libukana tse limilione tse ngata. Kaha mochine o mocha oa khatiso oa MAN o moholo ebile o boima haholo ho feta mechine eo re nang le eona hona joale, o ke ke oa lekana mohahong oo re nang le oona hona joale.
3 Ka lebaka lena re tlameha ho atolosa setsi sa khatiso. Ka tumello ea Sehlopha se Busang re qalile ho atolosa setsi sa khatiso ka lisekoere mithara tse 8 000. Kaha mochine oa khatiso o mocha o tla fihla ka April 2004 o tsoa Jeremane, katoloso ena e ncha e lokela hore e be e phethiloe ka February selemong se tlang. Ho hiriloe likonteraka e le hore mosebetsi ona o ka phethoa ka nako e khutšoanyane. Konteraka e ’ngoe e etsa meralo (mosebetsi oa ho epa) ’me e ’ngoe e tla haha. Mohaho ona o moholo e ke ke ea e-ba oa mochine o mocha oa MAN feela empa hape o tla sebelisoa ke Lefapha la Shipping le la Mailing, kaha a hloka sebaka se eketsehileng sa ho sebeletsa.
4 Kaha limakasine li tla be li hatisoa ka potlako, re ke ke ra hlola re li seha, re li bala le ho li paka ka letsoho. Ho tla kenngoa mechine e mecha ea othomathike hore e etse mesebetsi ena. Ka metsotso e seng mekae feela lingoliloeng li tla hatisoa, li menoe, li sehoe, li pakoe, li baloe, li ngoloe aterese ea moo li eang teng, li phutheloe ka polasetiki, ebe li behoa sebakeng se loketseng e le hore li ka romeloa ka teraka makaleng a mang kapa liphuthehong tse ling tsa Afrika Boroa. Ke mothating ona oa ho qetela feela moo limakasine li tla tšoaroa ka letsoho. Ka lebaka la theknoloji ea morao-rao ho ke ke ha hlokahala basebetsi ba bangata ’me ho tla bolokoa nako. Mosebetsi ona o etsoang ka potlako o etsa hore ho finyelloe ho hongata ka nako e le ’ngoe. Ho tla sebelisoa lirolo tsa pampiri tseo bophara ba tsona bo kopolang ba lirolo tse sebelisoang hona joale habeli, ’me li tla nka metsotso e ka tlaase ho 30 feela mochineng.
5 Mochine ona oa khatiso oa MAN Lithoman ke oa morao-rao, oa boleng bo phahameng o tla finyella litlhoko tsa rōna. E le hore ho ka behoa mochine oa khatiso o boima ba lithane tse 240, ho tlameha hore ho epeloe folomente e khethehileng ea konkreite e bophahamo ba limithara tse 1,6 ho ea ho tse 1,8 ’me e be boima ba lithane tse 700.
6 Khatelo-pele e khōlō theknolojing e tla ba ho sebelisoa ha tsamaiso ea k’homphieutha e romelang boitsebiso ka ho toba poleiting ea khatiso, e leng mokhoa o ntseng o kena indastering ea khatiso. Likhatiso tsohle tse lokelang ho hatisoa li romeloa lekaleng ka k’homphieutha. Ka nako e khutšoanyane feela, ho amoheloa boitsebiso bo fetoletsoeng bo tsoa Angola, Congo, Zambia, kapa esita le ho bafetoleli ba rōna, bo kenngoa k’homphieutheng hammoho le litšoantšo. Ebe ka ho sebelisa theknoloji e ncha, boitsebiso bo romeloa ka ho toba poleiting ea alominiamo, ’me boa hlophisoa ebe bo fetisetsoa mochineng oa khatiso o hatisang likopi tse milione kapa ho feta tsa sengoliloeng ka seng.
7 Re ke ke ra hatisa limakasine le libukana tse eketsehileng feela, empa Sehlopha se Busang se entse qeto ea hore lekala la Afrika Boroa le qale ho hatisa le libuka tse sekoahelo se bonolo bakeng sa Afrika eohle. E le hore morero ona o ka phethahala, ho fanoe ka tumello ea hore lekala la Jeremane le re romelle o mong oa mechine e kopanyang libuka oo le sa o sebeliseng hona joale. Mochine ona, o bolelele ba limithara tse 40, o ke ke oa khona ho kopanya libuka tse lekanang pokotho feela, tse kang buka ea Tsebo, empa o tla khona ho kopanya le libuka tse khōloanyane. Mochine ona o mocha o kopanyang libuka o tla kenngoa setsing sa rōna sa khatiso sa hona joale hang ha ho entsoe liphetoho tse hlokahalang bakeng sa hore o kenngoe. Ho phaella moo, re tla fumana mochine o mong oa khatiso oa Heidelberg Speedmaster o hatisang ka mebala e mene o fepeloang pampiri bakeng sa ho hatisa likoahelo tsa libuka le lintho tse ling tse hatisoang ka mebala e mene.
8 Boitsebisong bo ka holimo ho hlakile hore re na le mosebetsi o mongata o larileng ka pele empa re ikutloa re e-na le tokelo ea ho sebelisoa ke mokhatlo o hlophisitsoeng oa Jehova hore re sebeletse barab’abo rōna makaleng a mang a Afrika.
9 Liphetoho, thepa le likhatelo-pele tsena kaofela li bitsa chelete e ngata haholo. Chelete ea ho li lefella e tsoa hokae? E tsoa menehelong ea boithatelo e kenngoang ka mabokoseng a ngotsoeng “Menehelo Bakeng sa Mosebetsi oa Lefatše Lohle—Matheu 24:14” a Liholong tsohle Tsa ’Muso, hammoho le menehelo e romeloang lekaleng ke batho ka bomong le liphutheho tse lakatsang ho bona thato ea Molimo e phethoa. Joalokaha ho ’nile ha etsahala, ha ho e-na le tlhokahalo, bahlanka ba Jehova ba tšepahalang ba arabela ka seatla se bulehileng. Ka mohlala, nahana ka tlhokahalo ea lintho tse bonahalang e ileng ea e-ba teng mehleng ea Moshe, bakeng sa ho haha tabernakele ka thepa eohle ea eona e khanyang le lisebelisoa tsa eona. (Ex. 35:4-19) Hlokomela polelo ena e reng “e mong le e mong ea nang le pelo e ratang” temaneng ea 5, le e reng “bohle ba lipelo li hlalefileng” temaneng ea 10. Boemo ba lipelo tsa Baiseraele ke bona bo ileng ba ba susumelletsa ho bontša hore baa rata le hore ba bohlale ha ba etsa menehelo ka seatla se bulehileng bakeng sa mosebetsi oa Jehova. Hape hlokomela karabelo ea batho ho Exoda 35:20, 21. Bahlanka bohle ba Molimo ba ile ba e-ba le tokelo ea ho kopanela kahong ea tabernakele ’me ba ile ba fana ho latela matla a bona.
10 Ka ho tšoanang, Bakreste ba pele ba ile ba susumelletseha ho fa Jehova ka seatla se bulehileng, hobane ba ile ba ela hloko mantsoe a Pauluse a ho 2 Bakorinthe 9:7 a reng: “E mong le e mong a ke a etse feela joalokaha a entse qeto e tiileng pelong ea hae, eseng ka lekhonono kapa ka ho qobelloa, kaha Molimo o rata ea fanang a nyakaletse.” Le hoja ho ka etsahala hore ebe ba bang ba ne ba ruile, ha ho pelaelo hore bongata ba bona e ne e le batho ba tloaelehileng ba neng ba se na lintho tse ngata, empa ba fana ka seo ba ka se khonang. Pauluse o ile a re: “Etsoe haeba ho itokisa ho le teng pele, ho amoheleha ka ho khethehileng ho ea ka seo motho a nang le sona, eseng ho ea ka seo motho a se nang sona.”—2 Bakor. 8:12.
11 Molula-Qhooa oa January 15, 1992, leqepheng la 18, serapeng sa 16 o ile oa re: “Ke ba seng bakae har’a Lipaki tsa Jehova ba ruileng lintho tse ngata tse bonahalang. Le hoja mohlomong ba bangata ba ka fana ka chelete e fokolang bakeng sa ho ntšetsa lithahasello tsa ’Muso pele, ho ntse ho le joalo menehelo ea bona ke ea bohlokoa. Ha Jesu a bona mohlolohali ea hlokang a akhela licheletana tse peli tsa boleng bo fokolang ka har’a letlōle la chelete la tempele, o ile a re: ‘Mohlolohali enoa, le hoja e le mofutsana, o akhetse ho fetang hoo bohle ba ho akhetseng. Etsoe bana bohle [ba entseng monehelo] ba akhetse limpho ho tsoa botlallong ba bona, empa mosali enoa ho tsoa bohloking ba hae o akhetse mokhoa oohle oa ho iphelisa oo a neng a e-na le oona.’ (Luka 21:1-4) Le hoja mpho ea hae e ne e le nyenyane, o ile a fana a thabile, ’me monehelo oa hae o ile oa ananeloa.”
12 Sohle se etsoang lekaleng la Afrika Boroa hona joale le se tla etsoa nakong e tlang se finyelloa hobane Jehova o susumetsa lipelo tsa banna, basali le bana ba Bakreste. Thepa eohle eo re tla e amohela, e leng mochine oa khatiso oa MAN le oa Heidelberg, mochine o kopanyang libuka, hammoho le mechine e meng e ’maloa e hlokahalang, e tla romeloa ho rōna e le mpho e tsoang makaleng a mang le hoja thepa eo e bitsa liranta tse limilione tse mashome. Na ha re ananele see? Sena sohle se finyelloa ka lebaka la moea oa ho fana ka seatla se bulehileng oa barab’abo rōna linaheng tse ling. Re ba khothatsa ka tšebeletso ea rōna eo re e etsang ka botšepehi mona Afrika, eo ka linako tse ling re e etsang tlas’a maemo a thata, ka lebaka leo ba re thusa ka tsela e boletsoeng ka holimo. Ka tsela eo “ho leka-lekanya” ho ba teng.—2 Bakor. 8:14.
13 Empa ho thoe’ng ka litšenyehelo tsa ho atolosa setsi sa rōna sa khatiso? Le tsona li tla bitsa liranta tse limilione tse mashome. Sehlopha se Busang se lokiselitse ho lefa litšenyehelo tsa mohaho ona esale pele, empa na rōna, mona Afrika Boroa, re ka etsa menehelo bakeng sa ho lefella litšenyehelo tsee? Barab’abo rōna ba bang ba se ba ntse ba etsa joalo ka ho kenya monehelo lebokoseng la mosebetsi oa lefatše lohle. Ba bang ba ikhethela ho romela menehelo ea bona ofising ea lekala ka ho toba. Ho sa tsotellehe hore na u khetha mokhoa ofe oa ho nehela, ho ka ba molemo hore kaofela re ipotse: “Nka etsa’ng ho tšehetsa mosebetsi oo, haholo-holo nakong ee ea kaho?” Ka lebaka la katoloso ena barab’abo rōna bohle ba Afrika, bao bongata ba bona ba futsanehileng haholo, ba tla tsoela pele ho fumana libuka le limakasine tseo ba li hlokang bakeng sa ho ithuta le bakeng sa mosebetsi oa ho bolela.
14 Re sebelisa monyetla ona ho le leboha ka ho tšehetsa ha lōna mosebetsi oa ’Muso naheng ena. Ka lebaka leo, e se eka Jehova a ka tsoela pele ho re hlohonolofatsa moeeng kaofela ha rōna.
[Litšoantšo tse leqepheng la 3]
Mochine oa khatiso ha o bapisoa le teraka ea ho tsamaisa thepa
Bolelele: Limithara tse 44
Bophahamo: Limithara tse 5,5
Boima: Lithane tse 240
Mochine oa khatiso oa MAN Lithoman
[Tlhaloso ea Moo Setšoantšo se Nkiloeng Teng]
Copyright by MAN Roland Druckmaschinen AG
[Setšoantšo se leqepheng la 4]
Mosebetsi o tsoela pele katolosong ea setsi sa khatiso
[Setšoantšo se leqepheng la 4, 5]
“Molula-Qhooa” o hatisoa ka lipuo tse 25 lekaleng
Sevenda
Sekaonde
Sefora
Seumbundu
Setswana
Sezulu
Senyesemane
Sechichewa
Seswahili
Sepotoketsi
Setsonga
Sekiluba
Setumbuka
Sepedi
Sechitonga
Sekirundi
Selozi
Sekwanyama
Sesotho
Secibemba
Seafrikanse
Sexhosa
Seluvale
Seshona
Selingala
[Setšoantšo se leqepheng la 5]
Katoloso e ncha ea setsi sa khatiso
[Setšoantšo se leqepheng la 6]
E tšehetsoa ka menehelo ea boithatelo