Letsatsi la Jehova le Haufi

¹ Bakreste ba labalabela hore letsatsi la Jehova le fihle, leo ka lona a tla timetsa tsamaiso ea joale ea lintho ’me a tlise lefatše le lecha la ho loka. (2 Pet. 3:12, 13) Kaha ha re tsebe hantle hore na letsatsi leo le tla fihla neng, re tlameha ho lula re falimehile ’me re thuse ba bang hore ba etse joalo. (Ezek. 33:7-9; Mat. 24:42-44) Ho thuisa ka Lentsoe la Molimo la boprofeta ho tla matlafatsa kholiseho ea rōna ea hore “letsatsi le leholo la Jehova le haufi.”—Sof. 1:14.

² Tlhahlamano ea Mebuso e Matla ea Lefatše: Joalokaha ho tlalehiloe ho Tšenolo 17:9-11, moapostola Johanne o bua ka “marena a supileng,” a emelang ho hlahlamana ha mebuso e supileng e matla ea lefatše. Hape Johanne o bua ka “morena oa borobeli,” eo hajoale a emelang Machaba a Kopaneng. Na re ka lebella hore ho hlahe mebuso e meng e matla ea lefatše? Che, boprofeta bo bolela hore morena enoa oa borobeli o “ea timetsong,” ’me ka mor’a moo ha ho na marena a mang a lefatše ao ho buuoang ka ’ona. Na boprofeta boo bo u thusa ho bona moo re leng teng kemisong ea nako?

³ Daniele 2:31-45 e re thusa hore re utloisise ho tla ha letsatsi la Jehova. Boprofeteng boo, setšoantšo sa setonanahali seo Nebukadnezare a ileng a se bona torong se emela tlhahlamano ea mebuso e matla ea lefatše. Mebuso eo e matla e se e bile teng kaofela ha eona. Joale re iphumana re le ’musong ofe o matla kajeno? Re nakong e tšoantšetsoang ke maoto a setšoantšo seo. Boprofeta bo hlalosa ka ho hlaka se tla etsahala ka mor’a moo. Puso ea batho e tla felisoa ka ho feletseng, hore e suthele “’muso o ke keng oa senngoa le ka mohla.” Na u bona kamoo see se bontšang kateng hore letsatsi la Jehova le haufi?

⁴ Bopaki bo Eketsehileng: Re lipaki tse bonang ka mahlo bopaki bo eketsehileng ba hore letsatsi la Jehova le haufi. Re bona ho phethahala ha seo moapostola Pauluse a se boletseng esale pele mabapi le litšobotsi tseo batho ba leng tsona “matsatsing a ho qetela.” (2 Tim. 3:1-5) Hape re kopanela mosebetsing oa lefatše lohle oa bopaki bo lokelang ho fanoa pele bofelo bo fihla. (Mat. 24:14) E se eka tšebeletso ea rōna ea phatlalatsa e ka tsoela pele ho bonahatsa ho potlaka ha phatlalatso ea lengeloi e reng: “Tšabang Molimo ’me le mo tlotlise, hobane hora ea ho ahlola ha hae e fihlile.”—Tšen. 14:6, 7.

Karolo ea 9: Ho Hlomella Liithuti ho Paka ka Mokhoa o sa Reroang

Ho Khanna Lithuto Tsa Bibele Tse Tsoelang Pele

¹ Ha Andrease le Filipi ba hlokomela hore Jesu ke Mesia ea tšepisitsoeng, ha baa ka ba tsilatsila ho bolella ba bang litaba tseo tse hlasimollang. (Joh. 1:40-45) Ka ho tšoanang, kajeno ha liithuti tsa Bibele li qala ho bontša tumelo ho seo li ithutang sona, li susumelletseha hore li bue ka sona. (2 Bakor. 4:13) Re ka li khothalletsa joang hore li pake ka mokhoa o sa reroang le ho li hlomella hore li atlehe ha li etsa joalo?

² U ka ’na ua botsa seithuti feela hore na se buile le ba bang ka seo se ithutileng sona Bibeleng. Mohlomong ho na le metsoalle ea sona kapa beng ka sona bao se ka ba memang hore ba be teng thutong. Se botse hore na ho na leha e le bafe ba bontšitseng thahasello bao se sebetsang le bona, bao se kenang sekolo le bona kapa batho ba bang bao se ba tloaetseng. Ka tsela ena se ka qala ho fana ka bopaki. Se thuse ho utloisisa hore ho hlokahala se be masene le ho bontša tlhompho le ho ba mosa ha se buisana le ba bang ka Jehova Molimo le merero ea hae.—Bakol. 4:6; 2 Tim. 2:24, 25.

³ Ho Bolella ba Bang Seo li se Lumelang: Ke habohlokoa haholo ho koetlisa liithuti tsa Bibele hore li sebelise Lentsoe la Molimo ha li bolella ba bang seo li se lumelang. Ha le fihla lintlheng tse itseng nakong ea thuto, botsa seithuti u re: “U ne u tla sebelisa Bibele joang ho hlalosetsa beng ka uena ’nete ee?” kapa “U ne u tla sebelisa temana efe ea Bibele ho paka taba ee ho motsoalle oa hao?” Hlokomela kamoo se arabelang kateng, ’me u se bontše kamoo se ka tšehetsang ho ruta ha sona ka Mangolo. (2 Tim. 2:15) Ka ho etsa joalo, u tla be u hlomella seithuti ho paka ka mokhoa o sa reroang le ho bolela ka mokhoa o hlophisitsoeng le phutheho, ha se se se tšoaneleha.

⁴ Ke ho bontša bohlale ho hlomella liithuti tsa Bibele hore li tobane le khanyetso. (Mat. 10:36; Luka 8:13; 2 Tim. 3:12) Ha ba bang ba botsa ka Lipaki Tsa Jehova kapa ba bua ho itseng ka tsona, sena se ka ’na sa fa liithuti monyetla oa hore li pake. Bukana ea Lipaki Tsa Jehova—Ke Bo-mang? Li Lumela Eng? e ka li hlomella hore li lule li “loketse ho ikarabella.” (1 Pet. 3:15) E fana ka boitsebiso bo nepahetseng boo ba bacha ’neteng ba ka bo sebelisang ho thusa litho tsa malapa a bona le metsoalle e amehileng ka bona hore e utloisise litumelo le mesebetsi ea rōna e thehiloeng Bibeleng.