Boboleli bo re Thusa Hore re Mamelle

¹ Lentsoe la Molimo le re khothalletsa ho ‘matha ka mamello peisong e behiloeng ka pel’a rōna.’ (Baheb. 12:1) Joalokaha ho hlokahala hore semathi se be le mamello e le hore se atlehe tlhōlisanong, le rōna ho hlokahala hore re be le mamello hore re finyelle moputso oa bophelo bo sa feleng. (Baheb. 10:36) Tšebeletso ea Bokreste e ka re thusa joang hore re mamelle ka botšepehi ho fihlela qetellong?—Mat. 24:13.

² Re Matlafatsoa Moeeng: Ho bolela ha rōna tšepiso ea Bibele e babatsehang ea lefatše le lecha la ho loka ho re thusa ho etsa hore tšepo ea rōna e lule e khanya. (1 Bathes. 5:8) Ha re kopanela kamehla tšebeletsong ea tšimo, re ba le monyetla oa ho tsebahatsa linnete tseo re ithutileng tsona Bibeleng. Re ba le monyetla oa ho sireletsa tumelo ea rōna, eo ka lehlakoreng le leng e re matlafatsang moeeng.

³ E le hore re atlehe ho ruta ba bang, rōna ka borōna re lokela ho utloisisa linnete tsa Bibele ka ho hlaka. Re lokela ho etsa lipatlisiso le ho thuisa ka boitsebiso boo. Boiteko bo tiileng boo re bo etsang bo chorisa tsebo ea rōna, bo matlafatsa tumelo ea rōna, ’me bo re khatholla moeeng. (Liprov. 2:3-5) Kahoo, ha re ntse re batla ho thusa ba bang, rōna ka borōna rea matlafala.—1 Tim. 4:15, 16.

⁴ Ho kopanela tšebeletsong ka cheseho ke karolo ea bohlokoa ea “lihlomo tse feletseng tsa ntoa tse tsoang ho Molimo,” tseo re li hlokang e le hore re eme re tiile khahlanong le Diabolose le bademona. (Baef. 6:10-13, 15) Ho tšoareha ha rōna tšebeletsong e halalelang ho re thusa ho tsepamisa likelello tsa rōna linthong tse hahang le ho qoba ho silafatsoa ke lefatše la Satane. (Bakol. 3:2) Ha re ntse re ruta ba bang litsela tsa Jehova, re hopotsoa joalo-joalo hore ho hlokahala re lule re halalela boitšoarong.—1 Pet. 2:12.

⁵ Re Matlafatsoa ke Molimo: Ntlha ea ho qetela ke hore ho kopanela ha rōna mosebetsing oa ho bolela evangeli ho re ruta ho tšepa Jehova. (2 Bakor. 4:1, 7) Eo ke tlhohonolofatso e kaakang! Ha re hlaolela tšepo e joalo ha re hlomelloe feela bakeng sa ho phetha bosebeletsi ba rōna empa re boetse re hlomelloa bakeng sa ho sebetsana ka katleho le maemo leha e le afe ao re ka talimanang le ’ona bophelong. (Bafil. 4:11-13) Ka sebele, ho hlokahala hore re ithute ho tšepa Jehova ka ho feletseng e le hore re ka mamella. (Pes. 55:22) Boboleli bo re thusa ka litsela tse ngata hore re mamelle.

Karolo ea 10: Ho Koetlisa Liithuti Tšebeletsong ea Ntlo le Ntlo

Ho Khanna Lithuto Tsa Bibele Tse Tsoelang Pele

¹ Ha baholo ba etsa qeto ea hore seithuti sa Bibele se tšoaneleha hore e ka ba mohoeletsi ea sa kolobetsoang, se ka kopanela le phutheho mosebetsing oa ho bolela phatlalatsa. (Bona Ho Hlophisetsoa ho Etsa Thato ea Jehova, maq. 79-81.) Re ka thusa seithuti joang ho tobana le phephetso ea ho bolela ka ntlo le ntlo?

² Ho Lokisetsa Hammoho: Ha ho na ntho e nkang sebaka sa tokisetso e molemo. Bontša seithuti moo se ka fumanang linehelano tse fanoeng e le mohlala Tšebeletsong ea Rōna ea ’Muso le bukeng ea Ho Bea Mabaka, ’me u se thuse ho khetha katamelo e bonolo e sebetsang tšimong ea phutheho. Li sa tloha feela, se khothalletse ho sebelisa Bibele haholo tšebeletsong ea sona.—2 Tim. 4:2.

³ Mananeo a ho itlhakisa a molemo haholo ho mohoeletsi e mocha. Ha seithuti se itlhakisetsa nehelano, se bontše kamoo se ka sebetsanang ka masene le tsela eo batho ba tloaetseng ho arabela ka eona tšimong. (Bakol. 4:6) Se kholise hore ha ho hlokahale hore basebeletsi ba Bakreste ba tsebe karabo ea potso e ’ngoe le e ’ngoe eo mong’a ntlo a ka e botsang. Hangata ho molemo ho sebetsana le lipotso tse joalo ka ho ithaopela ho etsa patlisiso ebe u tšohla taba eo haholoanyane leetong la ho boela.—Liprov. 15:28.

⁴ Ho Paka Hammoho: Ha seithuti se kopanela tšebeletsong ea ntlo le ntlo ka lekhetlo la pele, etsa hore se bone ha u fana ka nehelano eo le e lokiselitseng hammoho. Ebe u se fa monyetla oa ho kopanela. Maemong a mang, ho ka ba molemo ho etsa hore mohoeletsi e mocha a fane ka karolo e itseng feela ea nehelano, e kang ho bala lengolo le ho le hlalosa. Nahanela botho le bokhoni ba seithuti. (Bafil. 4:5) Se babatse ka bolokolohi ha u ntse u se koetlisa likarolong tse sa tšoaneng tsa mosebetsi oa boboleli.

⁵ Ke habohlokoa ho thusa mohoeletsi e mocha hore a be le kemiso ea kamehla ea ho kopanela tšebeletsong, a etse seo beke le beke haeba ho khoneha. (Bafil. 3:16) Etsa litokisetso tse tobileng tsa hore le sebetse hammoho tšebeletsong, ’me u mo khothalletse hore a boele a sebetse le ba bang ba chesehang. Mohlala le botsoalle ba bona li tla mo thusa ho ba le tsebo le ho fumana thabo boboleling ba ntlo le ntlo.