Ho Thusa ba Bang ho Tlotlisa Jehova

¹ Batho lefatšeng lohle ba ntse ba bolelloa molaetsa oa bohlokoa o reng: “Tšabang Molimo ’me le mo tlotlise, hobane hora ea ho ahlola ha hae e fihlile, kahoo le rapele Ea entseng leholimo le lefatše le leoatle le liliba tsa metsi.” (Tšen. 14:6, 7) Re na le tokelo ea ho kopanela boboleling boo. Ho hlokahala hore batho ba tsebe eng ka Jehova e le hore ba mo tšabe le ho mo rapela?

² Lebitso la Hae: Ho hlokahala hore batho ba tsebe ho khetholla Molimo a le mong feela oa ’nete ka lebitso melimong e mengata ea bohata e rapeloang kajeno. (Deut. 4:35; 1 Bakor. 8:5, 6) Ha e le hantle, bangoli ba Bibele ba ile ba sebelisa lebitso le khanyang la Jehova ka makhetlo a fetang 7 000. Le hoja ka nepo re sebelisa temoho mabapi le hore na re kenyelletsa lebitso la Molimo neng, le ka mohla ha rea lokela ho le pata kapa ho ba lihlong ho le sebelisa. Thato ea Molimo ke hore batho bohle ba tsebe lebitso la hae.—Pes. 83:18.

³ Botho ba Hae: Hore batho ba tlotlise Jehova, ho hlokahala hore ba tsebe hore na ke Molimo oa mofuta ofe. Re tlameha ho ba tsebisa lerato la hae le ikhethang, bohlale ba hae bo fetisisang, toka ea hae e feletseng le matla a hae a maholo, hammoho le mohau oa hae, mosa o lerato le litšobotsi tse ling tse babatsehang. (Ex. 34:6, 7) Hape ba tlameha ho tšaba Molimo ka ho loketseng, ba mo hlomphe, ba hlokomele hore bophelo ba bona bo itšetlehile ka kamohelo ea Jehova.—Pes. 89:7.

⁴ Ho Atamela ho Molimo: Hore batho ba pholohe kahlolo ea Molimo e tlang, ba lokela ho ipiletsa ho Jehova ka tumelo. (Bar. 10:13, 14; 2 Bathes. 1:8) Sena ha se bolele feela ho tseba lebitso la Molimo le litšobotsi tsa hae. Re lokela ho thusa batho ho ba le kamano le Jehova, ba mo tšepe ka lipelo tsohle. (Liprov. 3:5, 6) Ha ba ntse ba sebelisa seo ba ithutileng sona, ba rapela Molimo ka tieo ’me a ba thusa bophelong ba bona, tumelo ea bona e tla hōla, e leng se tla ba thusa hore ba atamele ho Jehova.—Pes. 34:8.

⁵ E se eka re ka bolela lebitso la Molimo ka cheseho ’me re thuse ba bang hore ba mo tšepe ka ho feletseng ba be ba mo tšabe. Mohlomong re ka khona ho thusa ba eketsehileng hore ba tsebe Jehova ’me ba mo tlotlise e le ‘Molimo oa bona oa poloko.’—Pes. 25:5.

Ananela Matlotlo a Puso ea Molimo

¹ Ha Morena Josiase a ne a etsa litokisetso tsa ho lokisa tempele, o ile a babatsa ba neng ba abetsoe ho etsa mosebetsi, a re: “Ho se ke ha baloa chelete e ho bona e behoang matsohong a bona, etsoe ba sebetsa ka botšepehi.” (2 Mar. 22:3-7) Tsela eo banna bao ba ileng ba sebelisa matlotlo a tlhokomelong ea bona e ile ea bontša ka ho hlaka hore ba ananela lintho tse halalelang. Kajeno, ha re ntse re etsa mosebetsi o halalelang oa ho bolela litaba tse molemo tsa Molimo, ka ho tšoanang ho hlokahala hore re tšepahale ha re sebelisa matlotlo ao re a fuoeng.

² Tšebeletsong ea Tšimo: Ho ananela ha rōna bohlokoa ba molaetsa o ka har’a lingoliloeng tsa rōna le ho hlokomela litšenyehelo tse amehang khatisong ea tsona ho etsa hore re li nke e le tsa bohlokoa haholo. Ha rea lokela ho fana ka lingoliloeng tsa rōna re sa natse ho batho ba sa ananeleng molaetsa oa Bibele hakaalo. Haeba motho a sa thahaselle litaba tse molemo hakaalo, re ka ’na ra mo fa pampitšana ho e-na le ho mo fa lingoliloeng tse ling.

³ Aba lingoliloeng ka tsela e bontšang hore u li nka e le tsa bohlokoa. Qoba ho li siea libakeng tsa sechaba moo li tla hasana feela. E le ho qoba tšenyo, tseba hore u na le libuka tse kae lapeng pele u nka tse eketsehileng. Haeba ka linako tsohle u salloa ke limakasine tse eketsehileng tsa tokollo ka ’ngoe, fokotsa odara ea hao.

⁴ Lingoliloeng Tsa Botho: Re lokela ho odara lingoliloeng tseo re li hlokang feela. Ka ho khetheha re lokela hore re qobe ho senya ha re odara Libibele tsa deluxe, li-Reference Bible le lingoliloeng tse ling tse khōlō tse kang Concordance, Index, meqolo ea Insight le buka ea Baboleli, tseo kaofela ha tsona li hatisoang ka litšenyehelo tse phahameng.

⁵ Na u etsa bonnete ba hore u ngola lebitso la hao le aterese ka har’a lingoliloeng tsa hao? Sena se etsa hore u se lule u odara lingoliloeng tse ling bakeng sa tse lahlehileng. Ha u lahlehetsoe ke buka ea lipina, Bibele kapa sengoliloeng se ithutoang, mohlomong u tla li fumana linthong tse lahlehileng tse bolokiloeng Holong ea ’Muso kapa kopanong.—Luka 15:8, 9.

⁶ A re loaneleng ho sebelisa lingoliloeng tsa rōna ka bohlale. Ena ke tsela ea ho bontša hore rea tšepahala ha re sebelisa matlotlo a ’Muso ao Jehova a a behileng tlhokomelong ea rōna.—Luka 16:10.