KA LA 14 April, 1989, ke ne ke tšoere liboka motseng oa Maumere, Sehlekehlekeng sa Flores ha basebeletsi ba ’muso ba itšohlometsa ka tlung, ’me ba re tšoara re le bane.

Balebeli ba teronko ba ile ba leka ho re qobella hore re hlomphe folakha. Ha re hana, ba ile ba re otla, ba re raha le ho re emisa mochesong o bataolang oa letsatsi, ka matsatsi a mahlano. Sele ea rōna e ne e le nyenyane, e le litšila ’me bosiu re ne re opeloa ka lebaka la maqeba re bile re thothomela ke serame kaha re ne re robala fatše samenteng. Balebeli ba ne ba lula ba re re hlomphe folakha, empa re ne re re, “Re ka mpa ra shoa ho e-na le hore re hlomphe folakha.” Re ile ra thabela ho “utloa bohloko ka lebaka la ho loka” joaloka Bakreste ba mehleng ea khale.”—1 Pet. 3:14.

KA LA 19 January 1999, lehloeo le neng le ntse le ata pakeng tsa Mamosleme le Bakreste le ile la etsa hore ho be le ntoa, lik’hilomithara tse ka bang tharo ho tloha moo ke lulang teng. Boemo bo ne bo le bobe haholo.a

Ke ile ka etsa bonnete ba hore ba lelapa la ka ba sireletsehile eaba ke founela bahoeletsi ba bang ho utloa hore na le bona ba sireletsehile. Ke ile ka ba kōpa hore ba khobe matšoafo ’me ba qobe libaka tse kotsi. Hamorao, baholo ba ile ba ba etela ho ea ba matlafatsa tumelong le ho ba khothalletsa hore ba tšoare liboka ka lihlopha tse nyenyane.

Ofisi ea lekala e ile ea fana ka tataiso ea hore bahoeletsi bohle ba lulang libakeng tse kotsi ba tlohe, kahoo malapa a mangata a ile a tsebisoa taba ena. Mor’abo rōna e mong ea sa kang a mamela tataiso eo, o ile a bolaoa ke sehlopha se hlometseng. Empa batho bohle ba ileng ba mamela ba ile ba pholoha.