Litšupiso Tsa Bukana ea Seboka sa Bophelo le Tšebeletso
© 2023 Watch Tower Bible and Tract Society of Pennsylvania
LA 4-10 MARCH
MATLOTLO A TSOANG BIBELENG | PESALEME EA 16-17
“Jehova, Mohloli oa ka oa Lintho Tse Molemo”
Bacha, Thabelang Bophelo
METSOALLE EA SEBELE
11 Bala Pesaleme ea 16:3. Davida o ne a tseba ho khetha metsoalle ea sebele kaha o ile a ‘thabela’ ho ba le e ratang Jehova. O ile a e bitsa “bahalaleli” hobane e ne e rata ho etsa thato ea Jehova. Mongoli e mong oa Pesaleme o ikutloa ka tsela e tšoanang kaha o re: “ ’Na ke [motsoalle] oa bohle ba u tšabang, le oa ba bolokang litaelo tsa hao.” (Pes. 119:63) Joalokaha re bone sehloohong se fetileng le uena u ka fumana metsoalle e hlomphang Jehova ho sa tsotellehe hore na e lilemo li kae.
“Bona Thabo ea Jehova”
Davida o ile a bina a re: “Jehova ke karolo ea kabelo eo ke e filoeng le ea senoelo sa ka. U tšoara lotho ea ka ka tieo. Likhoele tse lekanyang li oetse libakeng tse khahlehang bakeng sa ka.” (Pes. 16:5, 6) Davida o ne a ananela “karolo” ea hae, e leng ho ba le kamano e ntle le Jehova le tlotla ea ho mo sebeletsa. Joaloka Davida, le rona re ka ’na ra tobana le mathata moeeng, empa re fumana litlhohonolofatso tse ngata! Ka hona, e se eka re ka tsoela pele ho ananela borapeli ba ’nete le ho lula re ‘talima tempele ea Jehova ea moea ka kananelo.’
Beha Jehova ka Pel’a Hao Kamehla
2 Ho na le seo kaofela ha rona re ka ithutang sona ka lintho tse etsahetseng bophelong ba batho ba tsebahalang haholo ba Bibele ba kang—Abrahama, Sara, Moshe, Ruthe, Davida, Esthere, moapostola Pauluse le ba bang. Leha ho le joalo, litlaleho tsa batho ba sa hlahellang le tsona li ka re tsoela molemo. Ha re thuisa ka litlaleho tsa Bibele sena se ka re thusa hore re etse seo mopesaleme a ileng a se etsa: “Ke behile Jehova ka pel’a ka kamehla. Kahobane o letsohong la ka le letona, nke ke ka therekelisoa.” (Pes. 16:8) Re lokela ho utloisisa mantsoe aa joang?
3 Ka tloaelo lesole le ne le tšoara sabole ea lona ka letsoho la lona le letona, ’me lehlakore leo le ne le sa sireletsoe ke thebe e neng e tšoaroa ka letsoho le letšehali. Leha ho le joalo, lesole le ne le sireletseha haeba motsoalle oa lona a ne a ka loana a le haufi le lona ka lehlakoreng la lona le letona. Haeba re lula re nahana ka Jehova ’me re etsa thato ea hae, o tla re sireletsa. Kahoo, a re ke re boneng hore na ho nahana ka litlaleho tsa Bibele ho ka matlafatsa tumelo ea rona joang e le hore ‘re ka hopola Morena [“Jehova,” NW] kamehla.’—Bibele Phetolelo e Ncha.
Matlotlo a Patiloeng
it-2-E 714
Thaka ea Leihlo
Lentsoe la Seheberu e leng ʼi·shohnʹ (De 32:10; Pr 7:2), ha le sebelisoa le lentsoe ʽaʹyin (leihlo) le bolela “monna e monyenyane ea ka har’a leihlo.” Ka tsela e tšoanang lentsoe bath (morali) le sebelisitsoeng lengolong la Lillo Tsa Jeremia 2:18, le fana ka kutloisiso ea “morali ea ka har’a leihlo.” Ka bobeli mantsoe ao a bolela thaka ea leihlo. Lengolo la Pesaleme ea 17:8 ka Seheberu le hlahisa mantsoe ana a kopane (ʼi·shohnʹ bath-ʽaʹyin) ’me a bolela “monna e monyenyane, morali ea ka har’a leihlo” (e leng “thaka ea leihlo,” NW). Tsela eo mantsoe ana a sebelisitsoeng ka eona mona e hlalosa seo motho a se bonang ha a ichebile ka har’a leihlo la motho e mong e leng setšoantšo se senyenyane sa sefahleho kapa ’mele oa hae.
Leihlo ke karolo e bonolo le e boi haholo ea ’mele. Ke kahoo moririnyana kapa lerolenyana feela le ka kenang ka leihlong le ka etsang hore motho a fahloe. Karolo e bonaletsang e koahetseng leihlo (e leng lera), e lokela ho sireletsoa le ho hlokomeloa hobane ha e ka ba lerotho ka lebaka la boloetse bo itseng kapa ea lemala, e ka etsa hore motho a se ke a bona hantle kapa a foufale. Moo Bibele e buang teng ka “thaka ea leihlo” e re ke karolo e lokelang ho hlokomeloa le ho sireletsoa ka hohle kamoo ho ka khonehang. Le molao oa Molimo o lokela ho tšoaroa ka tsela eona eo. (Pr 7:2) Ha lengolo la Deuteronoma 32:10 le bua ka tsela eo Molimo a neng a rata Baiseraele ka eona, le re o ile a ba sireletsa “joaloka thaka ea leihlo la hae.” Davida o ile a kopa Molimo hore a mo sireletse le ho mo hlokomela ‘joaloka thaka ea leihlo la hae.’ (Ps 17:8) O ne a batla Jehova a mo sireletse ka potlako ha a hlaseloa ke lira tsa hae. (Bapisa le Zak 2:8. Moo lentsoe la Seheberu e leng ba·vathʹ ʽaʹyin le hlahang, ho sebelisitsoe “leihlo”.)—Sheba EYE.
LA 11-17 MARCH
MATLOTLO A TSOANG BIBELENG | PESALEME EA 18
“Jehova . . . ke Eena ea Mpholosang”
Na u Utloisisa Mokhabo-puo o ka Bibeleng?
Bibele e boetse e bapisa Jehova le lintho tse sa pheleng. E mo hlalosa e le “Lefika la Iseraele,” ebile e re ke ‘lefika le qhobosheane.’ (2 Samuele 23:3; Pesaleme ea 18:2; Deuteronoma 32:4) Ntlha eo sehlooho le setšoantšo li tšoanang ka eona ke efe? Joalokaha lefika le leholo le tsitsitse, le bile le sa tlohe moo le leng teng, ka ho tšoanang, ho uena Jehova Molimo e ka ba Mohloli o tsitsitseng oa tšireletso.
5 Lengolo la Lipesaleme le na le mekhabo-puo e mangata e hlalosang litšobotsi tse sa tšoaneng tsa botho ba Jehova. Ka mohlala, Pesaleme ea 84:11 e re Jehova ke “letsatsi le thebe” hobane ke eena Mohloli oa khanya, bophelo, matla le tšireletseho. Ka lehlakoreng le leng, Pesaleme ea 121:5 e re, “Jehova ke moriti oa hao ka letsohong la hao le letona.” Joalokaha sebaka se nang le moriti se ka sireletsa motho hore a se ke a tlaboloa ke lebatama la letsatsi, Jehova a ka sireletsa ba mo sebeletsang hore ba se ke ba tlaboloa ke mahlomola a ba hlaselang; ’me a ka ba sireletsa joalokaha eka ba tlas’a moriti oa “letsoho” kapa oa “mapheo” a hae.—Esaia 51:16; Pesaleme ea 17:8; 36:7.
it-2-E 1161 ¶7
Lentsoe
Molimo o utloa mantsoe a bahlanka ba hae. Bohle ba nang le tumelo ba bile ba sebeletsa Molimo ka tsela e nepahetseng, ba ka mo rapela ba kholisehile hore o tla utloa mantsoe a bona ho sa tsotellehe hore na ba bua puo efe. Le haeba re ka rapella ka pelong, Molimo oa re utloa hobane oa tseba hore na re ikutloa joang. (Ps 66:19; 86:6; 116:1; 1Sa 1:13; Ne 2:4) Molimo oa utloa ha batho ba utloileng bohloko ba mo kopa thuso ebile o utloa le lentsoe la batho ba khopo ba rerang ho utloisa batho ba hae bohloko.—Ge 21:17; Ps 55:18, 19; 69:33; 94:9-11; Jer 23:25.
U ka Etsa’ng ha U Tšoenyehile?
2. Nahana. Ha u hetla morao, na ho na le mathata ao u a hopolang ao Jehova a ileng a u thusa hore u a mamelle? Ha re nahana kamoo Jehova a ileng a re thusa le ho thusa bahlanka ba hae ba nakong e fetileng, re tla khaotsa ho tšoenyeha ebile re tla mo tšepa le ho feta. (Pes. 18:17-19) Moholo e mong ea bitsoang Joshua o re: “Ho na le lintho tseo ke li ngotseng fatše tseo ke ileng ka li rapella eaba Jehova o araba lithapelo tsa ka. Li nthusitse ho hopola makhetlo ao ke ileng ka kopa Jehova ntho e itseng eaba o mpha eona.” Ha re lula re nahana kamoo Jehova a ileng a re thusa kateng nakong e fetileng, re ba le matla a hore re loantše ho tšoenyeha
Matlotlo a Patiloeng
it-1-E 432 ¶2
Kerubime
Tsena e ne e se litšoantšo tse tšoanang le sebopuoa se seholo se nang le mapheo se neng se rapeloa ke lichaba tsa bahetene joalokaha batho ba bang ba ne ba cho joalo. Moetlo oa khale oa Bajuda o na le bopaki bo lumellanang (Bibele ha e re letho ka taba ena) ba hore likerubime li ne li tšoana le batho. Li ne li entsoe ka bokhabane bo boholo, li tšoantšetsa mangeloi a matle a khanyang ’me li ne li entsoe ho lateloa “hantle mohlala” oo Moshe a neng a o filoe ke Jehova ka boeena. (Ex 25:9) Moapostola Pauluse o a hlalosa e le “likerubime tse khanyang tse koahetseng sekoahelo sa areka ka mapheo a tsona.” (Heb 9:5) Ha Bibele e bua ka likerubime e re: “Ke tla itlhahisa ho uena moo ’me ke bue le uena ke le holim’a sekoahelo. Ke tla u tsebisa lintho tsohle tseo ke tla u laela tsona bakeng sa Baiseraele, ke le pakeng tsa likerubime tse peli tse holim’a areka ea Bopaki.” (Ex 25:22; Nu 7:89) Sena sea bontša hore nakong e fetileng likerubime li ne li amahanngoa le boteng ba Jehova ke kahoo Bibele e reng Jehova ke “ea lutseng teroneng holim’a [kapa pakeng tsa] likerubime.” (1Sa 4:4; 2Sa 6:2; 2Ma 19:15; 1Kr 13:6; Ps 80:1; 99:1; Esa 37:16) Bibele e boetse e re likerubime li ‘emela koloi ea’ Jehova eo a ileng a tla a e palame. (1Kr 28:18) Mapheo a tsona a ne a li sireletsa a bile a etsa hore li khone ho fofa ka lebelo le phahameng. Ha Davida a ne a hlalosa kamoo Jehova a mo thusitseng kateng, o re Jehova o ile “a tla a palame kerubime, a tla a fofa” a bile a le “holim’a mapheo a lengeloi.”—2Sa 22:11; Ps 18:10.
LA 18-24 MARCH
MATLOTLO A TSOANG BIBELENG | PESALEME EA 19-21
“Maholimo a Phatlalatsa Khanya ea Molimo”
Bohle a ba ke ba Bolele Khanya ea Jehova
DAVIDA, mor’a Jese, o ile a hola e le molisana mathokong a Bethlehema. E tlameha ebe o ne a atisa ho talima maholimong a sabaletseng a tletseng linaleli bosiu ha ho khutsitse ha a ntse a alositse mehlape ea ntat’ae makhulong ao a ka thoko a linku. Ha ho pelaelo hore o ile a hopola lintho tsena ka ho hlaka ha moea o halalelang oa Molimo o mo bululela hore a qape le ho bina mantsoe a monate a Pesaleme ea 19 a reng: “Maholimo a bolela khanya ea Molimo; sepakapaka se bolela mosebetsi oa matsoho a hae. Khoele ea ’ona ea ho lekanya e kene lefatšeng lohle, le lipolelo tsa ’ona ho isa pheletsong ea naha e behang.”—Pesaleme ea 19:1, 4.
2 A ntse a khutsitse, a sa bue, ho sa utloahale lentsoe, maholimo a hlollang ao Jehova a a bopileng a bolela khanya ea hae, letsatsi le leng ka mor’a le leng, bosiu bo bong ka mor’a bo bong. Le ka mohla popo ha e khaotse ho bolela khanya ea Molimo, ’me motho o ikutloa e se letho ha a nahana ka bopaki bona bo khutsitseng bo bonahalang “lefatšeng lohle” boo baahi bohle ba lona ba ka bo bonang. Leha ho le joalo, bopaki bo khutsitseng ba popo ha boa lekana. Batho ba tšepahalang ba khothalletsoa hore le bona ba bue ka mantsoe a utloahalang ba fane ka bopaki. Mopesaleme e mong ea sa boleloang ka lebitso o ile a bua mantsoe ana a bululetsoeng ho barapeli ba tšepahalang: “Isang khanya le matla ho Jehova. Isang ho Jehova khanya ea lebitso la hae.” (Pesaleme ea 96:7, 8) Ba nang le kamano e haufi le Jehova ba motlotlo ho arabela khothatso eo. Leha ho le joalo, ho isa khanya ho Molimo ho akarelletsa’ng?
Popo e Bolela Khanya ea Molimo!
8 Ka mor’a moo Davida o hlalosa mohlolo o mong oa popo ea Jehova: “Ho ’ona [maholimo a bonahalang] o behile tente bakeng sa letsatsi, le joaloka monyali ha a tsoa ka leqatheng la hae; le thaba joalokaha motho ea matla a thabela ka ho fetisisa ho matha tseleng. Le tsoa pheletsong e ’ngoe ea maholimo, potoloho ea lona e feletseng e ea lipheletsong tse ling tsa ’ona; ha ho letho le patehileng mochesong oa lona.”—Pesaleme ea 19:4-6.
9 Ha le bapisoa le linaleli tse ling, letsatsi le boholo bo itekanetseng feela. Empa ke naleli e tsotehang, e etsang hore lipolanete tse e potolohang li bonahale li le nyenyane haholo. Mohloli o mong o re letsatsi le boima ba “lithane tse limilione tse likete tsa limilione tse likete tsa limilione tse likete tse 2”—e leng karolo ea 99,9 lekholong ea boima ba setsi sa rona sa potoloho ea lipolanete! Matla a lona a khoheli a etsa hore lefatše le khone ho le potoloha le le bohole ba lik’hilomithara tse limilione tse 150 le sa suthele hole kapa ho atamela haufi haholo le lona. E ka ba karolo e le ’ngoe feela ho tse limilione tse likete tse peli tsa matla a letsatsi e fihlang polaneteng ea rona, empa e lekane ho etsa hore bophelo bo tsoele pele.
10 Mopesaleme o bua ka letsatsi a sebelisa mokhabo-puo, o le tšoantša le “motho ea matla” ea mathang ho tloha ntlheng e ’ngoe ea lefatše ho ea ho e ’ngoe motšehare ebe bosiu o orohela “tenteng.” Ha motho a le lefatšeng ’me a bona naleli eo e matla e likela hole moo mahlo a hae a fellang teng, e bonahala eka e kena ka “tenteng,” joalokaha eka e il’o phomola. Hoseng e bonahala eka ea bitoha, e phatsima “joaloka monyali ha a tsoa ka leqatheng la hae.” Joaloka molisa, Davida o ne a tseba kamoo serame sa bosiu se kenellang masapong kateng. (Genese 31:40) O ne a hopola kamoo mahlaseli a letsatsi a neng a mo futhumatsa ka potlako kateng le ho futhumatsa sebaka se mo potolohileng. Ho hlakile hore le ne le sa khathatsoa ke “leeto” la ho tloha bochabela ho ea bophirimela empa le ne le tšoana le “motho ea matla,” le itokiselitse ho nka leeto leo hape.
Moetsi oa Mesebetsi e Entsoeng ka Bokhabane ea Hlokomolohuoang ka ho Fetisisa oa Mehleng ea Rona
Ho tebisa kananelo ea rona ka mesebetsi e entsoeng ka bokhabane ea tlhaho ho ka re thusa ho tseba ’Mopi oa rona, eo re pota-potiloeng ke mosebetsi oa liatla tsa hae. Ketsahalong e ’ngoe Jesu o ile a bolella barutuoa ba hae hore ba ke ba shebisise lipalesa tsa naha tse melang pel’a Galilea. O ile a re: “Lemohang mokhoa oo likhahla tsa naha li melang ka oona; ha li sebetse, ha li ohle; empa kea le bolella hoba esita le Salomone, khanyeng eohle ea hae, ha aa ka a ba le seaparo se joaloka sa e ’ngoe ea tsona.” (Matheu 6:28, 29) Botle ba palesa ea naha eo e seng ea bohlokoa bo ka sebeletsa ho re hopotsa hore Molimo ha aa iphapanyetse litlhoko tsa lelapa la motho.
Matlotlo a Patiloeng
4 Ho bala le ho ithuta Lentsoe la Molimo ho ka khatholla ha ba ha matlafatsa. Mopesaleme o ile a re: “Molao oa Jehova o lokile, o khatholosa moea; bopaki ba Jehova boa tšepeha, bo hlalefisa sethoto. Litemoso tsa Jehova li lokile, li thabisa pelo; litaelo tsa Jehova li hloekile, li elisa mahlo.” (Pesaleme ea 19:7, 8) Melao ea Jehova le likhopotso tsa hae li hlasimolla meea ea rona, li etsa hore re phele hantle haholoanyane moeeng, li etsa hore re ikutloe re thabile le hore mahlo a rona a bone hantle merero ea Jehova e babatsehang. Ho thabisa hakaakang!
LA 25-31 MARCH
MATLOTLO A TSOANG BIBELENG | PESALEME EA 22
Boprofeta bo Buang ka Lefu la Jesu
Ba Ile ba Fumana Mesia!
16 Ho ne ho tla bonahala eka Molimo o tlohetse Mesia. (Bala Pesaleme ea 22:1.) Tumellanong le boprofeta, “ka hora ea borobong [hoo e ka bang ka hora ea boraro thapama] Jesu a hoeletsa ka lentsoe le phahameng: ‘Eli, Eli, lama sabakthani?’ eo ha e fetoleloa, e bolelang: ‘Molimo oa ka, Molimo oa ka, u ntloheletse’ng?’” (Mar. 15:34) Jesu o ne a sa felloa ke tumelo ho Ntate oa hae ea leholimong. Molimo o ile a tlohella Jesu ho lira tsa hae ka hore a tlose tšireletso ea Hae ho eena e le hore botšepehi ba Kreste bo ka lekoa ka botlalo. Ka hore ebe Jesu o ile a hooa ka tsela eo, o ile a phethahatsa Pesaleme ea 22:1.
Ba Ile ba Fumana Mesia!
13 Davida o ile a profeta hore Mesia o ne a tla nyelisoa. (Bala Pesaleme 22:7, 8.) Jesu o ile a nyelisoa ha a ntse a utloa bohloko a le thupeng ea tlhokofatso, kaha Matheu o tlaleha sena: “Bafeta-ka-tsela ba qala ho mo nyefola, ba sisinya lihlooho ba re: ‘Uena ea neng a re u tla heletsa tempele ’me u e hahe ka matsatsi a mararo, ipholose! Haeba u mora oa Molimo, theoha thupeng ea tlhokofatso!’” Ka tsela e tšoanang, baprista ba ka sehloohong, bangoli le banna ba baholo, ba ile ba mo soma ba re: “O pholositse ba bang; eena o sitoa ho ipholosa! Ke Morena oa Iseraele; joale a ke a theohe thupeng ea tlhokofatso ’me re tla lumela ho eena. O tšepile Molimo; joale a ke A mo pholose haeba A mo batla, kaha o ile a re, ‘Ke Mor’a Molimo.’” (Mat. 27:39-43) Leha ho le joalo, Jesu o ile a mamella lintho tsena tsohle ka seriti. Ruri o re behetse mohlala o motle haholo!
Ba Ile ba Fumana Mesia!
14 Ho ne ho tla lahloa lotho bakeng sa liaparo tsa Mesia. Mopesaleme o ile a ngola a re: “Ba arolelana liaparo tsa ka, ba lahla lotho bakeng sa liaparo tsa ka.” (Pes. 22:18) Seo ke sona se ileng sa etsahala kaha ‘ha masole a Roma a mo khokhothetse thupeng a ile a aba liaparo tsa hae tsa ka ntle ka ho lahla lotho.’—Mat. 27:35; bala Johanne 19:23, 24.
Matlotlo a Patiloeng
Ho Bontša Tlhompho Bakeng sa Lipokano Tsa Rona Tse Halalelang
7 Ho na le litsela tse totobetseng tseo ka tsona re ka bontšang tlhompho bakeng sa lipokano tsa rona. Tsela e ’ngoe ke ka hore re be teng ha ho binoa lipina tsa ’Muso. Boholo ba lipina tsena li ngotsoe ka mokhoa oa thapelo ’me ka lebaka leo, li lokela ho binoa ka tlhompho. Ha moapostola Pauluse a qotsa Pesaleme ea 22, o ile a ngola tjena mabapi le Jesu: “Ke tla bolela lebitso la hao ho barab’eso; ke tla u rorisa ka pina har’a phutheho.” (Baheberu 2:12) Kahoo, re lokela ho itloaetsa hore re be re lutse fatše ha molula-setulo a bolela pina ’me re nahanisise moelelo oa mantsoe a pina eo ha re ntse re bina. E se eka mokhoa oo re binang ka oona o ka bontša maikutlo a mopesaleme ea ileng a ngola a re: “Ke tla roka Jehova ka pelo ea ka eohle sehlopheng sa metsoalle e haufi-ufi sa ba lokileng le phuthehong.” (Pesaleme ea 111:1) Ka sebele, ho binela Jehova lithoriso ke lebaka le leng le utloahalang la hore re fihle esale nako libokeng tsa rona ’me re lule ho fihlela qetellong.
Rorisa Jehova “Har’a Phutheho”
Kajeno, joaloka linakong tsa pele, ho entsoe litokisetso tsa hore balumeli ka bomong ba bolele tumelo ea bona “har’a phutheho.” Monyetla o mong oo e mong le e mong a nang le oona ke oa ho araba lipotso tse botsoang bamameli libokeng tsa phutheho. Le ka mohla u se ke ua halala melemo e ka tlisoang ke ho araba. Ka mohlala, likarabo tse bontšang kamoo ho ka hloloang kapa ha qojoa mathata kateng li matlafatsa boikemisetso ba barab’abo rona ba ho sebelisa melao-motheo ea Bibele. Likarabo tse hlalosang litemana tsa Bibele tse bontšitsoeng le hoja li sa qotsoa kapa likarabo tse kenyelletsang boitsebiso bo fumanoeng ha motho ka mong a iketsetsa lipatlisiso li ka khothatsa ba bang hore ba hlaolele mekhoa e metle ea ho ithuta.
LA 1-7 APRIL
MATLOTLO A TSOANG BIBELENG | PESALEME EA 23-25
“Jehova ke Molisa oa ka”
“Jehova ke Molisa oa Ka”
Jehova o tataisa linku tsa hae. Ha linku li se na molisa lia lahleha. Ka ho tšoanang re hloka ho tataisoa e le hore re fumane tsela e nepahetseng bophelong. (Jeremia 10:23) Davida o re Jehova o tataisetsa batho ba hae “makhulong a tletseng joang” le ‘libakeng tsa phomolo tse noselitsoeng hantle.’ O ba tsamaisa “litseleng tsa ho loka.” (Temana ea 2, 3) Papiso ena ea molisa e re tiisetsa hore re ka tšepa Molimo. Haeba re latela tataiso ea moea oa hae e fumanehang ka Bibeleng, re ka phela ka tsela e khotsofatsang, e khathollang le e sireletsehileng.
“Jehova ke Molisa oa Ka”
Jehova o sireletsa linku tsa hae. Ha linku li se na molisa, li lula li tšohile ebile ha ho kamoo li ka itšireletsang kateng. Jehova o bolella batho ba hae hore ha baa lokela ho tšoha, esita leha ba “tsamaea phuleng ea moriti o lefifi”—e leng nako eo ho ka bonahalang ho le boima haholo bophelong. (Temana ea 4) Jehova o lula a ba talimile, a itokiselitse ho ba thusa. A ka fa barapeli ba hae bohlale le matla ao ba a hlokang e le hore ba sebetsane le mathata a bona.—Bafilipi 4:13; Jakobo 1:2-5.
“Jehova ke Molisa oa Ka”
Jehova o fepa linku tsa hae. Linku li itšetlehile ho molisa oa tsona hore a li fumanele lijo. Le rona re lapela lijo tsa moea tseo re ka li fumanang ka thuso ea Molimo feela. (Matheu 5:3) Ho thabisang ke hore, Jehova ke Mohlokomeli ea seatla se bulehileng, o tekela bahlanka ba hae tafole ea lijo tse ngata. (Temana ea 5) Bibele esita le lingoliloeng tse thusang ho ithuta Bibele, tse kang ena eo u ntseng u e bala, ke oona mohloli oa lijo tsa moea tse re thusang ho tseba morero oa bophelo le oa Molimo ka rona.
Matlotlo a Patiloeng
Rata ho Loka ka Pelo ea Hao Eohle
JEHOVA o sebelisa Lentsoe la hae le moea oa hae o halalelang ho tsamaisa batho ba hae “litseleng tsa ho loka.” (Pes. 23:3) Leha ho le joalo, kaha ha rea phethahala, re atisa ho kheloha tseleng eo. Ho hlokahala hore re ikitlaetse e le hore re ka boela ra etsa se lokileng. Ke eng e tla re thusa hore re atlehe? Joaloka Jesu, re tlameha ho rata ho etsa se nepahetseng.—Bala Pesaleme ea 45:7.
2 ‘Litsela tsa ho loka’ ke eng? ‘Litsela’ tsena tsa tšoantšetso ke tsela ea bophelo e thehiloeng melaong ea Jehova ea ho loka. Ka Seheberu le ka Segerike, “ho loka” ho bolela ntho e “khabane,” ’me ho fana ka maikutlo a ho latela melao ea boitšoaro ka hloko. Kaha Jehova ke “sebaka sa bolulo sa ho loka,” barapeli ba hae ba thabela hore e be eena ea ba khethelang tsela e nepahetseng ea boitšoaro eo ba lokelang ho e latela.—Jer. 50:7.
3 Re tla be re khahlisa Molimo ka ho feletseng haeba feela re ikitlaetsa ka lipelo tsohle tsa rona hore re phele ka melao ea hae e lokileng. (Deut. 32:4) Seo se qala ka hore re ithute sohle seo re ka se khonang ka Jehova Molimo, Lentsoeng la hae e leng Bibele. Ha re ntse re ithuta haholo ka eena re bile re atamela haufi le eena letsatsi le leng le le leng, re tla rata ho loka ha hae le ho feta. (Jak. 4:8) Hape re tlameha ho amohela tataiso ea Lentsoe le bululetsoeng la Molimo ha ho hlokahala hore re etse liqeto tsa bohlokoa bophelong.
LA 8-14 APRIL
MATLOTLO A TSOANG BIBELENG | PESALEME EA 26-28
Seo Davida a Ileng a se Etsa e le Hore a Lule a Tšepahalla Jehova
Tsamaea Tseleng ea Botšepehi
8 Davida o ile a rapela tjena: “Ntlhahlobe, Jehova, ’me u nteke; hloekisa liphio tsa ka le pelo ea ka.” (Pesaleme ea 26:2) Liphio li ka hare-hare ’meleng. Ka tsela ea tšoantšetso, liphio li emela menahano le maikutlo a tebileng a motho. ’Me pelo ea tšoantšetso ke motho ea feletseng ea ka hare—se mo susumetsang, maikutlo a hae le matla a hae a ho nahana. Ha Davida a ne a kopa hore Jehova a mo hlahlobe, o ne a rapella hore ho hlahlobisisoe ho be ho phenngoe menahano le maikutlo a hae a ka hare-hare.
9 Davida o ile a kopa ka tieo hore ho hloekisoe liphio tsa hae le pelo ea hae. Jehova o hloekisa seo re leng sona ka pelong joang? Davida o ile a bina tjena: “Ke tla boka Jehova, ea mphileng keletso. Ka sebele, liphio tsa ka li nkhalemetse bosiu.” (Pesaleme ea 16:7) Seo se bolela’ng? Se bolela hore keletso e tsoang ho Molimo e ile ea fihla likarolong tse tebileng ka ho fetisisa tsa Davida ’me ea lula teng, ea lokisa menahano ea hae e ka hare-hare le maikutlo a hae. Le ho rona ho ka ba joalo haeba ka kananelo re nahanisisa ka keletso eo re e fumanang ka Lentsoeng la Molimo, baemeli ba hae le ka mokhatlo oa hae o hlophisitsoeng ’me re e lumella hore e tebe ka ho rona. Ho rapela Jehova kamehla hore a re hloekise ka tsela ena ho tla re thusa hore re tsamaee ka botšepehi.
Tsamaea Tseleng ea Botšepehi
12 Ha a bua ka tšobotsi e ’ngoe e ileng ea matlafatsa botšepehi ba hae, Davida o ile a re: “Ha kea lula le batho ba leshano; ha ke kene setsoalleng le ba patang seo ba leng sona. Ke hloile phutheho ea baetsi ba bobe, ha ke lule le ba khopo.” (Pesaleme ea 26:4, 5) Ho hang Davida o ne a sa lule le ba khopo. O ne a hloile litloaelano tse mpe.
13 Ho thoe’ng ka rona? Na re hana ho lula le batho ba leshano ka mananeo a thelevishene, livideo, lifilimi, Inthanete kapa ka mekhoa e meng? Na re emella thoko le ba patang seo ba leng sona? Ba bang sekolong kapa mosebetsing ba ka ’na ba iketsa eka ke metsoalle ea rona empa ba e-na le merero e bolotsana. Na ehlile re batla ho ba le kamano e haufi-ufi le batho ba sa tsamaeeng ’neteng ea Molimo? Le hoja bakoenehi ba ipolela hore baa tšepahala, le bona ba ka pata morero oa bona oa ho re hulela hole le ho sebeletsa Jehova. Ho thoe’ng haeba ba bang ka phuthehong ea Bokreste ba phela bophelo ba boikaketsi? Le bona ba pata seo ba hlileng ba leng sona. Jayson, eo hona joale a sebeletsang e le mohlanka ea sebeletsang, o ne a e-na le metsoalle e joalo ha a sa le mocha. O re ka eona: “Ka letsatsi le leng e mong oa eona o kile a re ho ’na: ‘Ha ho tsotellehe hore na re etsa’ng hona joale hobane ha tsamaiso e ncha e fihla, re tla be re shoele. Re ke ke ra tseba hore ho na le se re fetileng.’ Puo ea mofuta oo e ile ea ntsosa borokong. Ha ke batle hore ha tsamaiso e ncha e fihla ke be ke shoele.” Ka bohlale, Jayson o ile a khaotsa ho etsa setsoalle le batho ba joalo. Moapostola Pauluse o ile a lemosa: “Le se ke la thetsoa. Litloaelano tse mpe li senya mekhoa e metle.” (1 Bakorinthe 15:33) Ke habohlokoa hakaakang hore re qobe litloaelano tse mpe!
Tsamaea Tseleng ea Botšepehi
17 Tabernakele, hammoho le aletare ea eona ea mahlabelo, e ne e le setsi sa borapeli ba Jehova Iseraele. Ha Davida a hlalosa kamoo a thabelang sebaka seo kateng, o ile a rapela tjena: “Jehova, ke ratile bolulo ba ntlo ea hao le sebaka seo khanya ea hao e lulang ho sona.”—Pesaleme ea 26:8.
18 Na re rata ho bokana libakeng tseo ho tsona re ithutang ka Jehova? Holo e ’ngoe le e ’ngoe ea ’Muso hammoho le lenaneo la eona la kamehla la thupelo ea moea ke setsi sa borapeli ba ’nete sechabeng. Ho phaella moo, selemo le selemo re ba le likopano tse kholo, likopano tsa potoloho le matsatsi a kopano e khethehileng. Libokeng tse joalo ho tšohloa “likhopotso” tsa Jehova. Haeba re ithuta ho li “rata ka mokhoa o fetisisang,” re tla labalabela ho ba teng libokeng tseo ’me re tla mamelisisa ha re le moo. (Pesaleme ea 119:167) Ho khatholla hakaakang ho ba le barapeli-’moho ba thahasellang hore re atlehe le ba re thusang hore re tsoele pele tseleng ea rona ea ho boloka botšepehi!—Baheberu 10:24, 25.
Matlotlo a Patiloeng
Jehova o Lopolla ea Hlorileng
15 Mopesaleme Davida o ile a bina a re: “Haeba Ntate le ’Mè ba ne ba ka ntlohela, Jehova o ne a tla nthola.” (Pesaleme ea 27:10) Ho tšelisa hakaakang ho tseba hore lerato la Jehova le feta la motsoali leha e le ofe oa motho! Le hoja ho le bohloko ho khesoa, ho tšoaroa hampe, kapa ho lahloa ke motsoali, seo ha se ame tsela eo Jehova a u tšoarang ka eona. (Baroma 8:38, 39) Hopola hore Molimo o hula bao a ba ratang. (Johanne 3:16; 6:44) Ho sa tsotellehe hore na batho ba ’nile ba u tšoara joang, Ntate oa hao oa leholimo eena oa u rata!
LA 15-21 APRIL
MATLOTLO A TSOANG BIBELENG | PESALEME EA 29-31
Molimo o re Khalemela Hobane a re Rata
it-1-E 802 ¶3
Sefahleho
Ho ‘pata. . . . sefahleho’ ho ka bolela lintho tse fapaneng ho itšetlehile ka hore na ho buuoa ka’ng. Ha Jehova Molimo a pata sefahleho sa hae, hangata e be e le ha a khaotsa ho bontša mohau kapa matla a hae. Sena se ka etsahala ka lebaka la litla-morao tsa ho se mamele ha motho a le mong kapa batho ba bangata joalokaha ho ile ha etsahala ka sechaba sa Baiseraele. (Job 34:29; Ps 30:5-8; Esa 54:8; 59:2) Ka linako tse ling Jehova o pata sefahleho sa hae ka ho khaotsa ho re thusa kapa ho re araba ha a emetse nako ea hae e nepahetseng. (Ps 13:1-3) Ha Davida a ne a re ho Jehova, “patela libe tsa ka sefahleho sa hao,” o ne a mo kopa hore a mo tšoarele libe tsa hae kapa a hlakole liphoso tsa hae.—Ps 51:9 nal.; bapisa le Ps 10:11.
Re Thabela ho Letela Jehova
Tsela eo taeo e tsoang ho Jehova e re ruisang molemo ka eona e ka ’na ea tšoantšoa le tsela eo ka eona tholoana e butsoang ka eona. Bibele e bua tjena ka taeo e tsoang ho Molimo: “Ho ba koetlisitsoeng ke eona e beha litholoana tsa khotso, e leng, ho loka.” (Baheberu 12:11) Joalokaha tholoana e nka nako hore e butsoe, ka tsela e tšoanang ho hlokahala nako hore re fetole boikutlo ba rona ho latela koetliso eo Molimo a re fang eona. Ka mohlala, haeba boitšoaro ba rona bo bobe bo ka etsa hore re lahleheloe ke tokelo e itseng ka phuthehong, ho ikemisetsa ha rona ho letela Molimo ho tla re thusa hore re se ke ra nyahama le ho beha meja fatše. Maemong a joalo, mantsoe a bululetsoeng a Davida aa khothatsa ha a re: “Ho ba tlas’a bohale ba [Molimo] ke ha motsotsoana, ho ba tlas’a kamohelo ea hae ke ha bophelo bohle. Ka shoalane ho lla ho ka ’na ha e-ba teng, empa hoseng ho ba le mohoo oa thabo.” (Pesaleme ea 30:5) Haeba re ithuta ho leta ’me re sebelisa keletso eo re e fumanang Lentsoeng la Molimo le mokhatlong oa hae o hlophisitsoeng, ho tla fihla nako eo ka eona re tla ‘hooa ka thabo.’
Ho Baka e le Kannete ho Bolela’ng?
18 E le hore motho ea khaotsoeng a bontše hore o bakile e le kannete, o lokela ho tla libokeng kamehla ’me a mamele keletso ea baholo ea hore a rapele le ho bala Bibele kamehla. Hape o tla etsa ka hohle hore a qobe maemo a ileng a etsa hore a etse sebe. Haeba a sebetsa ka thata hore a lokise kamano ea hae le Jehova, a ka kholiseha hore Jehova o tla mo tšoarela ’me baholo ba tla mo thusa hore a khutlisetsoe ka phuthehong. Ha baholo ba batla ho bona hore na mofosi o bakile e le kannete, ba sebetsana le boemo ba hae ka tsela e fapaneng hobane baa tseba hore maemo ha a tšoane ’me ba qoba ho ahlola ka ho hloka toka.
Matlotlo a Patiloeng
Lintlha-kholo Tsa Buka ea Pele ea Lipesaleme
31:23—Motho ea ikhohomosang o putsoa ka mokhoa o fetisisang joang? Moputso oo ho buuoang ka oona mona ke kotlo. Ea lokileng o fumana moputso oa taeo e tsoang ho Jehova ka lebaka la liphoso tseo a li entseng e se ka boomo. Kaha motho ea ikhohomosang ha a bakele tsela ea hae e fosahetseng, o putsoa ka mokhoa o fetisisang ka kotlo e matla.—Liproverbia 11:31; 1 Petrose 4:18.
LA 22-28 APRIL
MATLOTLO A TSOANG BIBELENG | PESALEME EA 32-33
Ke Hobane’ng ha re Lokela ho Bolela Libe Tse Tebileng Tseo re li Entseng?
Mohau oa Jehova o re Boloka ho Nyahameng
7 Haeba re le molato oa ho tlola molao oa Molimo ka ho tebileng, re ka ho fumana ho le thata ho bolela libe tsa rona, esita le ho Jehova. Ho ka etsahala eng tlas’a maemo a joalo? Pesalemeng ea 32, Davida o ile a lumela hore: “Enere ha ke khutsitse, masapo a ka a ne a felisoa ke ho bobola ha ka ka letsatsi lohle. Hobane letsoho la hao le ne le le boima ho ’na nyene le bosiu; metsi a bophelo ba ka a ne a omeletse joalo ka hola ke lebatama la selemo.” (Litemana 3, 4) Ho leka ho pata sebe le ho hatella letsoalo la hae ho ile ha qeta Davida oa mofosi matla. Ho tsieleha ho ile ha fokotsa matla a hae hoo a neng a tšoana le sefate se omeletseng se se nang mongobo o fanang ka bophelo. Ha e le hantle, e ka ’na eaba o ile a kula kelellong le nameng. Ho sa tsotellehe se ileng sa etsahala, o ile a felloa ke thabo. Haeba leha e le mang oa rona a iphumana a le boemong bo tšoanang, re lokela ho etsa joang?
Molimo ea ‘Itokiselitseng ho Tšoarela’
8 Davida ea bakileng o ile a re: “Qetellong ka bolela sebe sa ka ho uena, ’me phoso ea ka ha kea ka ka e koahela. . . . Ua tšoarela phoso ea libe tsa ka.” (Pesaleme ea 32:5) Lentsoe “tšoarela” le fetolela lentsoe la Seheberu leo ha e le hantle le bolelang “ho phahamisa” kapa “ho jara.” Ho sebelisoa ha lona mona ho fana ka maikutlo a ho tlosa “molato, sebe, tlolo.” Kahoo, ha e le hantle Jehova o ile a phahamisa libe tsa Davida ’me a li tlosa. Ha ho pelaelo hore sena se ile sa bebofatsa boikutlo ba ho ba molato boo Davida a neng a bo jere. (Pesaleme ea 32:3) Le rona ka ho tšoanang re ka tšepa ka ho feletseng Molimo ea tlosang libe tsa ba batlang hore a ba tšoarele motheong oa tumelo ea bona sehlabelong sa Jesu sa thekollo.—Matheu 20:28.
Boipolelo bo Lebisang ho Hlaphoheloeng
Ka mor’a hore Davida a ipolele, ha aa ka a inehella boikutlong bo fosahetseng ba hore ha a na thuso. Lipolelo tsa hae lipesalemeng tse buang ka boipolelo tseo a ileng a li ngola li bontša ho imoloha hoo a ileng a ba le hona le boikemisetso ba hae ba ho sebeletsa Molimo ka botšepehi. Ka mohlala, sheba Pesaleme ea 32. Temaneng ea 1, rea bala: “Ho thaba eo bofetoheli ba hae bo tšoaretsoeng, eo sebe sa hae se koahetsoeng.” Ho sa tsotellehe hore na sebe se tebile hakae, ho ka ba le phello e thabisang haeba motho a bakile ka sebele. Tsela e ’ngoe ea ho bontša hore motho o bakile ka sebele ke ha a amohela boikarabelo bo feletseng ba liketso tsa hae, joaloka Davida. (2 Samuele 12:13) Ha aa ka a leka ho itokafatsa ka pel’a Jehova kapa a leka ho beha ba bang molato. Temana ea 5 e re: “Qetellong ka bolela sebe sa ka ho uena, ’me phoso ea ka ha kea ka ka e koahela. Ke ile ka re: ‘Ke tla ipolela ho Jehova ka lebaka la litlolo tsa ka.’ Ua tšoarela phoso ea libe tsa ka.” Ho ipolela ho se nang boikaketsi ho tlisa khatholoho, hoo ho seng ho sa hlokahale hore motho a ’ne a tšoenngoe ke letsoalo la hae ka liphoso tse fetileng.
Matlotlo a Patiloeng
Lintlha-kholo Tsa Buka ea Pele ea Lipesaleme
33:6; naletsana—“Moea” oa molomo oa Jehova ke eng? Moea ona ke matla a sebetsang a Molimo, kapa moea o halalelang, oo a ileng a o sebelisa ha a bopa maholimo a sebele. (Genese 1:1, 2) O bitsoa moea oa molomo oa hae hobane, joaloka phefumoloho e matla, o ka romeloa sebakeng se hole hore o e’o etsa lintho tse itseng.
LA 29 APRIL–LA 5 MAY
MATLOTLO A TSOANG BIBELENG | PESALEME EA 34-35
“Rorisa Jehova ka Linako Tsohle”
A re Phahamiseng Lebitso la Jehova Hammoho
11 “Ke tla boka Jehova ka linako tsohle; thoriso ea hae e tla ba molomong oa ka kamehla.” (Pesaleme ea 34:1) Kaha Davida e ne e le mophaphathehi, e tlameha ebe o ne a amehile ka litlhoko tse ngata tsa nama empa joalokaha mantsoe ana a bontša, ha aa ka a lumella lintho tsa letsatsi le letsatsi tseo a neng a amehile ka tsona hore li tapise boikemisetso ba hae ba ho rorisa Jehova. Oo ke mohlala o motle hakaakang haeba re hlaheloa ke mathata! Ebang re sekolong, mosebetsing, re na le Bakreste-’moho le rona kapa re tšebeletsong ea phatlalatsa, takatso ea rona e ka sehloohong e lokela ho ba ho rorisa Jehova. Ak’u nahane ka mabaka a mangata ao re nang le ’ona a ho etsa joalo! Ka mohlala, ho na le letoto le sa feleng la lintho tseo re ka ithutang tsona ra ba ra li thabela mesebetsing e hlollang ea popo ea Jehova. ’Me nahana ka seo a se finyeletseng ka karolo e lefatšeng ea mokhatlo oa hae o hlophisitsoeng! Mehleng ea kajeno, Jehova o sebelisitse batho ba tšepahalang, le hoja ba sa phethahala, e le hore ba finyelle lintho tse kholo. Na mesebetsi ea Molimo e ka bapisoa le ea batho bao lefatše le ba entseng melimo? Na ha u lumellane le Davida, ea ileng a boela a ngola tjee: “Ha ho le ea mong ea tšoanang le uena har’a melimo, Jehova, hape ha ho mesebetsi leha e le efe e tšoanang le ea hao”?—Pesaleme ea 86:8.
A re Phahamiseng Lebitso la Jehova Hammoho
13 “Moea oa ka o tla ithorisa ka Jehova; ba bonolo ba tla utloa ’me ba tla thaba.” (Pesaleme ea 34:2) Mona Davida ha aa ka a ithorisa ka ntho leha e le efe eo a e finyeletseng. Ka mohlala, ha aa ka a ithorisa ka tsela eo a ileng a qhekella morena oa Gathe ka eona. O ile a elelloa hore Jehova o mo sirelelitse ha a le Gathe le hore ke Jehova ea mo thusitseng ho pholoha. (Liproverbia 21:1) Kahoo, Davida ha aa ka a ithorisa, empa o ile a ithorisa ka Jehova. Ka lebaka lena, ba bonolo ba ile ba huleloa ho Jehova. Ka ho tšoanang, Jesu o ile a phahamisa lebitso la Jehova, ’me sena se ile sa etsa hore batho ba bonolo le ba ratang ho ithuta ba huleloe ho Eena. Kajeno, ba bonolo lichabeng tsohle ba huleloa ka phuthehong ea Bakreste ba tlotsitsoeng e teng lichabeng tsohle, eo Jesu e leng Hlooho ea eona. (Bakolose 1:18) Lipelo tsa batho bao ba bonolo lia ameha ha ba utloa bahlanka ba ikokobelitseng ba Molimo ba tlotlisa lebitso la hae le ha ba utloa molaetsa oa Bibele, oo moea o halalelang oa Molimo o ba thusang ho o utloisisa.—Johanne 6:44; Liketso 16:14..
A re Phahamiseng Lebitso la Jehova Hammoho
15 “Ke ile ka botsa Jehova, eaba oa nkaraba, a ntopolla linthong tsohle tseo ke li tšabang.” (Pesaleme ea 34:4) Phihlelo ena e ne e le ea bohlokoa ho Davida. Kahoo, o ile a tsoela pele a re: “Enoa ea hlorileng o ile a hooa, ’me Jehova a utloa. A mo pholosa mahlomoleng ’ohle a hae.” (Pesaleme ea 34:6) Ha re e-na le balumeli-’moho le rona, re ba le menyetla e mengata ea ho ba phetela liphihlelo tse khothatsang tsa kamoo Jehova a re thusitseng kateng ho mamella maemo a thata. Ho etsa joalo ho matlafatsa tumelo ea balumeli-’moho le rona, feela joalokaha mantsoe a Davida a ile a matlafatsa tumelo ea balateli ba hae. Boemong boo Davida a neng a le ho bona, balateli ba hae “ba ile ba talima [Jehova] ’me ba tlala thabo, lifahleho tsa bona li ne li ke ke tsa hlajoa ke lihlong.” (Pesaleme ea 34:5) Le hoja ba ne ba ntse ba baleha Morena Saule, ha baa ka ba hlajoa ke lihlong. Ba ne ba kholisehile hore Molimo o ne a tšehetsa Davida, ’me lifahleho tsa bona li ne li tletse thabo. Ka tsela e tšoanang, batho ba sa tsoa thahasella hammoho le bao e seng e bile Bakreste ba ’nete ka nako e telele ba itšetlehile ka Jehova hore a ba tšehetse. Kaha ka bomong ba bone kamoo a ba thusitseng kateng, lifahleho tsa bona tse tletseng thabo li bontša hore ba ikemiselitse ho lula ba tšepahala.
Matlotlo a Patiloeng
Lintlha-kholo Tsa Buka ea Pele ea Lipesaleme
35:19—Davida o ne a bolela’ng ha a kopa hore ba mo hloileng ba se ke ba mo robela leihlo? Ho roba leihlo ho ne ho tla bontša hore lira tsa Davida li ne li tla thabela hore ebe li atlehile mererong ea tsona e lonya. Davida o ile a kopa hore sena se se ke sa etsahala.