Ha lihloela tsa Baiseraele li fihla motseng oa Jeriko, li ile tsa lula ha mosali e mong ea bitsoang Rahaba. Morena oa Jeriko o ile a tseba hore li teng, eaba o romela masole ha Rahaba. Rahaba o ile a pata lihloela tseo ka marulelong ’me a supisa masole ao tsela esele. A re ho lihloela tseo: ‘Ke tla le thusa kaha kea tseba hore Jehova o na le lona le hore le tl’o hapa naha ena. Ke kopa le ntšepise hore le tla sireletsa ba lelapa leso.’

Lihloela tseo tsa re ho Rahaba: ‘Rea u tšepisa hore bohle ba ka tlung ea hao ba tla sireletseha.’ Tsa boela tsa re: ‘U tlame thapo ena e khubelu fensetereng ea hao ’me ba lelapa leno ba tla sireletseha.’

Rahaba o ile a ntša lihloela tseo ka fensetere ’me tsa theoha ka thapo. Tsa balehela lithabeng. Li ile tsa ipata moo ka matsatsi a mararo, eaba li khutlela ho Joshua. Eaba Baiseraele ba tšela Noka ea Jordane ’me ba itokisetsa ho hapa naha. Jeriko ke motse oa pele oo ba ileng ba o hapa. Jehova o ile a re ba pote motse oo hanngoe ka letsatsi ka matsatsi a tšeletseng. Ka letsatsi la bosupa ba o pota ka makhetlo a supileng. Ka mor’a moo, baprista ba letsa literompeta tsa bona ’me masole a hoeletsa. Marako a motse a ile a oa. Empa ntlo ea Rahaba, e neng e itšetlehile ka lebota, ha ea ka ea oa. Jehova a sireletsa Rahaba le ba lelapa labo kaha Rahaba o ne a mo tšepile.

Lichaba tse ling tsa Kanana li ile tsa utloa se etsahetseng Jeriko. Kahoo, marena a tsona a rera ho ikopanya ho loantša Baiseraele. Empa Bagibeone ba tla ka leano le fapaneng. Ba apara liaparo tsa khale, ba ea ho Joshua ’me ba re: ‘Re tsoa naheng e hole. Re utloetse ka Jehova le sohle seo a le etselitseng sona Egepeta le Moabe. Re tšepiseng hore le ke ke la re hlasela ’me re tla ba bahlanka ba lona.’

Joshua o ile a ba kholoa ’me a lumela hore a ke ke a ba hlasela. Ka mor’a matsatsi a mararo, a utloa hore ha ba tsoe naheng e hole. Ba tsoa hona naheng eo ea Kanana. Joshua a botsa Bagibeone a re: ‘Ke hobane’ng ha le re thetsitse?’ Ba re: ‘Re le thetsitse hobane re ne re tšohile! Rea tseba hore Jehova Molimo oa lona oa le loanela. Re kopa hore le se ke la re bolaea.’ Joshua a etsa joalokaha a ba tšepisitse ’me a se ke a ba bolaea.

Ka mor’a nakoana, marena a mahlano a Kanana a ile a hlophisa mabotho a ’ona, a itokisetsa ho hlasela Bagibeone. Joshua le banna ba hae ba tsamaea bosiu bohle ho ea ba pholosa. Ntoa ea qala hoseng letsatsing le latelang. Bakanana ba ile ba baleha. Hohle moo ba balehelang teng, Jehova a ba nesetsa sefako. Eaba Joshua o kopa Jehova hore a emise letsatsi. Ke hobane’ng ha a ile a kopa Jehova hore a emise letsatsi empa ho se mohla ntho e joalo e kileng ea etsahala? Ke hobane Joshua o ne a tšepa Jehova. Letsatsi ha lea ka la likela ho fihlela Baiseraele ba hlotse lira tsa bona.