Baboleli ba ’Muso Baa Tlaleha
Liphihlelo tse Tsoang Tuvalu
LITABA tse molemo tsa ’Muso li tsoela pele ho boleloa lihlekehlekeng tse ntle tsa Tuvalu, Pacific Boroa, ’me ho fanoe ka bopaki bo botle esita le ho batho ba boholong. Moena e mong oa Australia eena le mosali oa hae ba sebeletsang mosebetsing oa molebeli ea tsamaeang Tuvalu o re bolella phihlelo ea hae:
“’Na le mosali oa ka re ile ra memeloa lijong lapeng la Tona-khōlō ea Tuvalu. Ketsahalo eo e ne e le ketelo ea Letona la Australia la Litaba tsa Ka Ntle. Nakong ea lijo, ’na le mosali oa ka ra ba le monyetla o motle oa ho pakela letona la Australia le mosali oa lona. Ha e bolela hore na re bo-mang, Tona-khōlō ea bolela hore na Lipaki tsa Jehova li etsa mosebetsi o babatsehang hakaakang Tuvalu, haholo-holo mabapi le ho fetoleloa ha libuka tsa rōna puong ea Setuvalu. Ea re: ‘Ke na le likopi tsa likhatiso tsa tsona kaofela pokellong ea ka ea libuka, ’me li ntle haholo!’ Letona leo ’moho le mosali oa lona ba ne ba thahasella ho utloa ka tsoelo-pele ea mosebetsi oa rōna Tuvalu.
“Hamorao mantsiboeeng ao, ra ba teng boithabisong ba motjeko oa moetlo oa sebaka seo. Hamorao ’Musi-kakaretso oa Tuvalu a re atamela ’me a bolela hore Lipaki tse ling li ile tsa etela ha hae beke pele ho moo ’me tsa mo siela likopi tse ling tsa limakasine tsa Molula-Qhooa le Tsoha! Leqepheng le ka morao la makasine e ’ngoe o ne a hlokometse phatlalatso ea New World Translation of the Holy Scriptures ’me o ne a batla ho tseba hore na a ka fumana e ’ngoe joang sebakeng seo. Ra ’molella hore re tla thabela ho mo fa kopi. Sontaha se hlahlamang, ka ea ha hae ke isa Bibele, ’me ra ba le puisano e monate ka nako e ka etsang hora. O ile a bolela kamoo a neng a ananela mosebetsi oa rōna le likhatiso tsa rōna kateng. Ha e le hantle, ha re fihla lapeng la hae, mosali oa hae o ne a ntse a bala buka ea Phela ka ho sa Feleng ka puo ea Setuvalu. Kahoo re ne re thabetse hore e be re ile ra khona ho pakela ba bang ‘ba boholong.’”—1 Timothea 2:1-4.
Ketsahalong e ’ngoe Tona-khōlō ea Tuvalu ea etela Lihlekehleke tsa Solomon. Sechaba sa Matuvalu se phelang moo sa etsa mokete ho mo hlompha. Har’a ba neng ba memetsoe moketeng oo ho ne ho e-na le khaitseli e mong, ea tlalehileng phihlelo e latelang:
“Qetellong ea mokete, Tona-khōlō ea fana ka monyetla oa ho botsa lipotso ka lintlafatso tsa morao-rao Tuvalu. Potso e ’ngoe e ileng ea botsoa e ne e le ‘Na ho na le malumeli leha e le afe a macha Tuvalu?’ Tona-khōlō ea arabela ka hore ‘ho na le malumeli a mang a macha a lumeletsoeng ho kena Tuvalu empa ke bo le bong feela bo botle.’ Ha e botsoa hore na boo ke bofe, ea arabela, ‘Lipaki tsa Jehova.’
“E mong le e mong o ile a makatsoa ke karabelo ea eona, ’me ha phahamisoa potso e neng e se e ntse e le pepeneneng ea hore na ke hobane’ng ha Lipaki tsa Jehova e le ‘bona feela bolumeli bo botle.’ Ea arabela: ‘Hobane baruti ba rōna ba lula hae letsatsi lohle ’me ba letsa tšepe feela ka li-Sontaha hore rōna re ee re e’o ba mamela. Empa Lipaki tsa Jehova li hlile li tla ho uena, ’me le haeba u sa ee kerekeng, li tla u ruta ka Bibele lapeng la hao.’”
Kahoo, le hoja ba bang ba ne ba ka ’na ba nyatsa tšebeletso ea rōna ea ntlo le ntlo, ka ho hlakileng ba bang ba ananela hore e be re isa molaetsa malapeng a bona.—Liketso 5:42.