Na Bolumeli bo Tla ke bo Khothalletse Khotso?

“ARE etseng lefatše sebaka se molemo. A re feliseng bolumeli.” Ke seo rafilosofi oa Ledache ea bitsoang Floris van den Berg a se khothalletsang thupelong ea hae e hatisitsoeng, e nang le sehlooho se reng, “Kamoo Bolumeli bo ka Felisoang Kateng le Lebaka la ho bo Felisa.” Lefatšeng ho pota, litsebi mafapheng a sa tšoaneng le tsona li khothalletsa hore bolumeli bo felisoe.

Steven Weinberg ea hapileng khau ea Nobel le eo e leng setsebi sa fisiks o ile a re: “Lefatše le lokela ho tsoha litorong tseo le bileng ho tsona ka nako e telele tsa ho chesehela bolumeli.” Lilemong tsa morao tjena ho ’nile ha buuoa haholo ka khopolo ea hore lintho tse mpe tse etsahalang lefatšeng lena li ka fokotseha haholo ha ho ka felisoa bolumeli. Libuka tse khahlanong le bolumeli li atile ’me li ratoa haholo.

Bo-rasaense ba hlaheletseng ba ’nile ba kopana ho tšohla seo ba nkang hore ke taba e potlakileng ea ho felisa bolumeli. Batho ba ntseng ba eketseha ba sa lumeleng hore Molimo o teng ba bua phatlalatsa mecheng ea litaba hore ba hloile bolumeli. Na bahlalefi baa ba hlomphehang ba nepile?

Na ho na le Bolumeli ba ’Nete?

Haeba malumeli ’ohle e ne e le a bohata ebile Molimo a le sieo, joale e ne e ka ’na ea e-ba ntho e utloahalang hore bolumeli bo felisoe. Empa joale haeba Molimo o teng? Ho thoe’ng haeba lefatšeng ho na le sehlopha sa batho ba emelang Molimo ka nepo—e leng bolumeli ba ’nete?

Ho hlahloba histori ea bolumeli ka hloko ho bontša hore ho na le borapeli bo le bong feela bo fapaneng haholo le malumeli a mang ’ohle. E batla e le batho ba ’maloa kajeno ba borapeling boo. Bolumeli bona bo thehiloe ke Jesu Kreste le baapostola ba hae. Empa ha bo emeloe ke se ’nileng sa etsoa ke Bokreste-’mōtoana ka lilemo tse makholo a mangata.

Bokreste-’mōtoana bo fapane joang le bolumeli ba ’nete bo thehiloeng ke Jesu Kreste? Ka litsela tse ngata. A re ke re hlahlobe e ’ngoe ea tsona.

“Hase Karolo ea Lefatše Lena”

Bakreste ba pele ba ne ba sa kopanele litabeng tsa lipolotiki. Seo se ne se lumellana le taba ea ho se nke lehlakore joalokaha Jesu a ile a etsa. Bibele e tlaleha hore bonyane ka makhetlo a mabeli, Jesu o ile a hana ka tieo menyetla eo a neng a e fuoa ea hore e be ’musi oa lipolotiki. (Matheu 4:8-10; Johanne 6:15) Jesu o ile a ba a khalemela barutuoa ba hae ha ba ne ba batla ho sebelisa likhoka ho thibela hore a tšoaroe.—Matheu 26:51, 52; Luka 22:49-51; Johanne 18:10, 11.

Ha ’musisi oa Moroma oa Judea a ne a botsa Jesu lipotso tse tobileng ka menyenyetsi ea hore o batla ho nka maemo lipolotiking, Jesu o ile a totobatsa taba, a re: “’Muso oa ka hase karolo ea lefatše lena. Hoja ’muso oa ka e ne e le karolo ea lefatše lena, bahlanka ba ka ba ka be ba loanne hore ho se ke ha nehelanoa ka ’na ho Bajuda. Empa, joale, ’muso oa ka ha o tsoe mohloling ona.” (Johanne 18:36) Ho hlakile hore Jesu o ne a sa itšunya-tšunye mekhatlong ea lipolotiki le sesoleng.

Barutuoa ba Jesu ba ile ba latela mohlala oa hae. Phuputso e entsoeng ke sehlopha sa bafuputsi, e boletsoeng qalong ea lihlooho tsena e neng e hlahloba karolo eo bolumeli bo e phethang ntoeng, e bontša hore: “Bakreste ba pele ba ne ba sa lumele tabeng ea ho sebelisa likhoka. . . . Bakreste ba bangata ba ne ba hana ho kena sesoleng le ho loana.” Lithuto tsa Jesu le baapostola ba hae li ne li khothalletsa batho ho rata baahelani ba bona, ho kopanyelletsa bao ba sa ba tsebeng le ba mehlobo le merabe e meng. (Liketso 10:34, 35; Jakobo 3:17) Ka sebele bolumeli boo bo ne bo khothalletsa khotso.

Qetellong, lithuto tsa qalong tsa Bokreste li ile tsa silafatsoa ke lifilosofi, lineano le likhopolo tsa bochaba tse arolang batho. Tlhahlobo ea histori e boletsoeng pejana e bontšang karolo eo bolumeli bo e phethang lintoeng, e re: “Ho sokoloha ha [Moemphera oa Roma] Constantine ho ile ha etsa hore Bakreste ba kene sesoleng—ba khaotse ho tataisoa ke lithuto tsa Kreste tse buellang kutloelo-bohloko, ho e-na le hoo ba etelletse pele lipakane tsa Moemphera eo tsa lipolotiki le tsa ho hapa libaka. Bakreste, ho kopanyelletsa le eena Moemphera ba ile ba qobelleha hore ba fumane mabaka a bolumeli a ho lokafatsa ntoa.” Ho ile ha hlaha mofuta oa Bokreste ba bohata.

Sehlopha “se Ikhethang”

Na Bokreste ba qalong bo felile? Che. Kajeno ho na le sehlopha se le seng se lokelang ho hlahlojoa ka hloko. Ha ho na batho ba bang ba bolumeli ba etsisang Bakreste ba pele joaloka Lipaki Tsa Jehova. Ha li amane le bolumeli leha e le bofe malumeling a Bokreste-’mōtoana. The Encyclopedia of Religion e re “lia ikhetha” hobane li theha lintho tsohle tseo li li lumelang “ho seo Bibele e se rutang, e leng se fapaneng ka ho feletseng le ho latela lineano.”

Joaloka Bakreste ba pele, Lipaki Tsa Jehova ha li kopanele likhohlanong tsa lipolotiki. Tokomane e phatlalalitsoeng ke Setsi sa Sechaba sa Thuto e Phahameng ea Saense, Ukraine, e bolela hore Lipaki Tsa Jehova li ikemiselitse ho hlōla “khethollo ea merabe, ea bochaba, ea bolumeli, ea batho ba maemong a itseng sechabeng le moruong.” Phuputso eo e hlalosa hore Lipaki Tsa Jehova ha li kopanele “liketsong tse khahlanong le ’muso” ’me ke “baahi ba bolokang molao linaheng tsa habo tsona.”

Bukeng ea hae e bitsoang Pacifism and Vicinity, Moprofesa Wojciech Modzelewski, oa Univesithi ea Warsaw, Poland, o re: “Lipaki Tsa Jehova ke mokhatlo o moholo ka ho fetisisa lefatšeng kajeno o sa lumellaneng le lintoa.” Kaha Lipaki Tsa Jehova li latela haufi-ufi mohlala oa Bakreste ba lekholong la pele la lilemo, ho ka boleloa hore li atlehile ho tsosolosa borapeli boo Kreste le baapostola ba hae ba ileng ba bo theha. Ona ke mofuta oa Bokreste boo ka sebele bo khothalletsang khotso.—Sheba lebokose le leqepheng le latelang.

Bokamoso bo Khanyang

Ka sebele, barapeli ba bangata ba khothetseng—le baeta-pele ba bangata ba bolumeli ba nyahamisoa ke boikaketsi bo teng malumeling a bona. Rea elelloa hore ho na le batho ba bangata ba bolumeli ba inehetseng tabeng ea ho khothalletsa khotso le kutloano lefatšeng.

Le hoja ba ka ’na ba khothalla seo, ba haelloa ke matla a ho rarolla mathata a lefatše. Moprofeta oa boholo-holo Jeremia o ile a re: “Tsela ea motho oa lefatše ha e matleng a hae. Ha ho matleng a motho ea tsamaeang hore a tsamaise mehato ea hae.”—Jeremia 10:23.

Empa ho na le bokamoso bo khanyang. Lentsoe la Molimo le ruta hore lefatšeng ho tla thehoa mokhatlo o mocha oa batho ba ratang khotso. Mokhatlo ona o mocha o tla ba le kutloano ea sebele ea bara ba motho. Batho ba merabe eohle ba tla phela ka kutloano, ’me moloko oa batho o ke ke oa aroloa ke meeli ea libaka, lehloeo la merabe, kapa lithuto tsa bolumeli. Bohle ba tla kopanngoa ke borapeli bo hloekileng ba Jehova Molimo.

Bibele e boetse e bolela esale pele hore bolumeli bo hlomphollang Molimo bo tla felisoa. Jesu o ile a re: “’Muso o mong le o mong o arohaneng o fetoha lesupi, le motse o mong le o mong kapa ntlo e arohaneng e ke ke ea ema.” (Matheu 12:25) Ka nako e loketseng, Molimo o tla tiisa hore mantsoe ao aa phethahala mabapi le bolumeli bohle ba bohata.

Bibele e ile ea bolela esale khale hore “ka sebele [Molimo] o tla ahlola har’a lichaba ’me a lokise litaba.” Hape boprofeta bona bo re batho ba tla “tea lisabole tsa bona hore e be mehoma le marumo a bona hore e be likere tse faolang limela. Sechaba se ke ke sa phahamisetsa sechaba se seng sabole, ha ba sa tla hlola ba ithuta ntoa.” (Esaia 2:4) Boprofeta bona bo ntse bo phethahala kajeno. Bolumeli ba ’nete ba Lipaki Tsa Jehova, bo se bo ntse bo khothalletsa khotso.

[Ntlha e Qolotsoeng e leqepheng la 8]

Lipaki Tsa Jehova li kopantsoe ke lerato

[Lebokose le leqepheng la 9]

Lipaki Tsa Jehova li Fapane Joang le Malumeli a Mang?

Batho ba bangata baa makala ha ba hlokomela kamoo Lipaki Tsa Jehova li fapaneng kateng le malumeli a mang ’ohle a ipolelang hore a latela Kreste. Lintlha tse latelang ke tse ling tsa lintho tse khethollang Lipaki Tsa Jehova:

KAMOO LI HLOPHISITSOENG

● Ha li na sehlopha sa baruti.

● Baholo ba tsona, mesuoe le baromuoa ha ba lefuoe.

● Ha li ntše karolo ea leshome ebile ha ho ntšoe koleke libakeng tsa tsona tsa borapeli, tse tsejoang ka hore ke Liholo Tsa ’Muso.

● Mesebetsi eohle ea tsona e tšehetsoa ka menehelo ea batho ba sa ipoleleng mabitso.

● Ha li nke lehlakore lipolotiking.

● Li khothalletsa khotso ’me ha li kopanele ntoeng.

● Lefatšeng lohle li kopantsoe ke tumelo le lithuto tsa tsona tse thehiloeng Bibeleng.

● Li momahane ka ho feletseng, ha li khethollane ka maemo sechabeng, mehlobo, merabe kapa lihlopha.

● Ha li amane le bolumeli leha e le bofe bo bong, ebang ke ba K’hatholike, ba Orthodox, kapa ba Boprostanta.

LITHUTO TSA TSONA

● Li lumela hore ho na le Molimo a le mong feela oa ’nete, eo lebitso la hae e leng Jehova.

● Ha li lumele hore Jesu Kreste ke Molimo ea Matla ’Ohle, ebile ha li lumele thutong ea Boraro-bo-bong.

● Li latela lithuto tsa Jesu ’me lia mo hlompha joalokaha e le Mora oa Molimo.

● Ha li hlomphe sefapano ka tsela ea borapeli, ebile ha li rapele litšoantšo.

● Ha li lumele hore ho na le mollo oa lihele moo batho ba babe ba eang teng ha ba e-shoa.

● Li lumela hore Molimo o tla hlohonolofatsa batho ba mamelang ka ho ba fa bophelo bo phethahetseng le bo sa feleng lefatšeng la paradeise.

Lipaki Tsa Jehova li lumela hore li atlehile ho tsosolosa Bokreste ba lekholong la pele la lilemo, boo baapostola ba Jesu ba neng ba bo latela.

[Setšoantšo se leqepheng la 8]

Moserbia, Mobosnia le Mocroatia