Khaolo ea Leshome le Metso e Robong

Lula Leratong la Molimo

Ho rata Molimo ho bolela’ng?

Re ka lula leratong la Molimo joang?

Jehova o tla putsa ba lulang leratong la hae joang?

1, 2. Re ka fumana setšabelo se sireletsehileng hokae kajeno?

AK’U nahane ka letsatsi le leng u tsamaea tseleng har’a sefefo le lipula tse matla. Leholimo le ntse le fifala. Lehalima lea tsekema, letolo lea thoathoaretsa, ’me pula e tšoloha ka matla. U tiisa maoto, u potlaketse ho fumana setšabelo. Pejana mola ka thōko ho tsela, u bona setšabelo. Se tiile, ha se nele ebile sea khatholla. Ruri u ananela sebaka seo se sireletsehileng!

² Re phela linakong tse thata. Maemo a lefatše a ntse a senyeha ho ea pele. Empa ho na le setšabelo se tiileng, se ka re sireletsang hore re se ke ra tsoa kotsi ka ho sa feleng. Ke sefe? Ela hloko seo Bibele e se rutang: “Ke tla re ho Jehova: ‘U setšabelo sa ka le qhobosheane ea ka, Molimo oa ka, eo ke tla mo tšepa.’”—Pesaleme ea 91:2.

3. Re ka etsa Jehova setšabelo sa rōna joang?

³ Ak’u nahane feela ka seo! Jehova, ’Mōpi le ’Musi oa bokahohle, e ka ba setšabelo sa rōna se re sireletsang. A ka lula a re sirelelitse, kaha o matla ho feta motho leha e le ofe kapa ntho leha e le efe e ka ’nang ea re ntša kotsi. Esita le haeba re ka tsoa kotsi, Jehova a ka lokisa liphello tsohle tse mpe. Re ka etsa Jehova setšabelo sa rōna joang? Re lokela ho mo tšepa. Ho feta moo, Lentsoe la Molimo lea re phehella: “Le ipoloke leratong la Molimo.” (Juda 21) E, re lokela ho lula leratong la Molimo, re boloke kamano e lerato le Ntate oa rōna oa leholimo. Joale re ka kholiseha hore ke setšabelo sa rōna. Empa re ka theha kamano e joalo joang?

HLOKOMELA LERATO LA MOLIMO ’ME U BONTŠE HORE UA LE ANANELA

4, 5. Litsela tse ling tseo ka tsona Jehova a bontšitseng hore oa re rata ke life?

⁴ E le hore re lule leratong la Molimo, re lokela ho utloisisa kamoo Jehova a re bontšitseng lerato la hae kateng. Ak’u nahane ka lintlha tse ling tseo Bibele e li rutang tseo u ithutileng tsona bukeng ena. Kaha Jehova ke ’Mōpi, o re file lefatše hore e be lehae la rōna le thabisang. O le tlatsitse lijo le metsi a mangata, lirafshoa, liphoofolo tse hlollang le tikoloho e ntle. Kaha Molimo ke Mongoli oa Bibele, o re senoletse lebitso la hae le litšobotsi tsa hae. Ho feta moo, Lentsoe la hae le senola hore o ile a romela Mora oa hae ea ratoang lefatšeng, a lumela hore Jesu a utloe bohloko a be a re shoele. (Johanne 3:16) Mpho eo e bolela’ng ho rōna? E re fa tšepo ea hore re tla ba le bokamoso bo babatsehang.

⁵ Tšepo ea rōna ka bokamoso e boetse e itšetlehile ka ho hong hape hoo Molimo a ho entseng. Jehova o thehile puso ea leholimo, e leng ’Muso oa Bomesia. Haufinyane e tla felisa bohloko bohle ’me e fetole lefatše paradeise. Ak’u nahane feela ka seo! Re ka phela moo ka khotso le thabo ka ho sa feleng. (Pesaleme ea 37:29) Ka nako e tšoanang, Molimo o re file tataiso mabapi le kamoo re ka phelang ka tsela e molemohali kateng esita le hona joale. Hape o re file mpho ea thapelo, e leng monyetla oa ho buisana le eena ka linako tsohle. Tsena e mpa e le litsela tse seng kae feela tseo ka tsona Jehova a bontšitseng hore o rata moloko oa batho ka kakaretso le hore le uena oa u rata.

6. U ka bontša joang hore u ananela lerato leo Jehova a u bontšitseng lona?

⁶ Potso ea bohlokoa eo u lokelang ho nahana ka eona ke ena: Ke tla bontša joang hore ke ananela lerato la Jehova? Ba bangata ba ka ’na ba re, “Le ’na ke lokela ho rata Jehova.” Na ke kamoo le uena u ikutloang kateng? Jesu o ile a re taelo e khōlō ho feta tsohle ke e reng: “U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle.” (Matheu 22:37) Ka sebele u na le mabaka a mangata a ho rata Jehova Molimo. Empa na ho rata Jehova ka pelo ea hao eohle le ka moea oa hao oohle le ka kelello ea hao eohle ho bolela ho ba le boikutlo boo feela?

7. Na ho rata Molimo ke taba feela ea maikutlo? Hlalosa.

⁷ Joalokaha ho hlalositsoe ka Bibeleng, ho rata Molimo hase feela taba ea maikutlo. Ha e le hantle, le hoja ho hlokahala hore motho a be le boikutlo ba ho rata Jehova, boikutlo e mpa e le qalo feela ea ho ba le lerato la sebele ho eena. Ho hlokahala peō ea apole hore motho a leme sefate se behang liapole. Empa na haeba u batla apole, u ne u tla khotsofalla feela hore motho e mong a u fe peō ea apole? Le hanyenyane! Ka ho tšoanang, ho ba le boikutlo ba ho rata Jehova Molimo e mpa e le qalo feela. Bibele e re: “Se boleloang ke lerato la Molimo ke sena, hore re boloke litaelo tsa hae; leha ho le joalo litaelo tsa hae ha li boima.” (1 Johanne 5:3) E le hore lerato ho Molimo e be la sebele, le lokela ho beha litholoana tse ntle. Le lokela ho bontšoa ka liketso.—Matheu 7:16-20.

8, 9. Re ka bontša lerato le kananelo ea rōna ho Molimo joang?

⁸ Re bontša lerato la rōna ho Molimo ha re boloka litaelo tsa hae ’me re sebelisa melao-motheo ea hae. Ha ho thata hakaalo ho etsa seo. Ho fapana le hore melao ea Jehova e be boima, e reretsoe ho re thusa hore re phele ka tsela e molemo, e thabisang le e khotsofatsang. (Esaia 48:17, 18) Ha re phela ka tsela e lumellanang le tataiso ea Jehova, re bontša Ntate oa rōna oa leholimo hore ruri re ananela sohle seo a re etselitseng sona. Ka masoabi, ke ba seng bakae feela lefatšeng kajeno ba bontšang hore ba ananela seo. Ha re batle ho hloka kananelo joaloka batho ba bang ba neng ba phela ha Jesu a le lefatšeng. Jesu o ile a folisa balepera ba leshome, empa ke a le mong feela ea ileng a khutla ho tla mo leboha. (Luka 17:12-17) Ka sebele re batla ho tšoana le ea ileng a leboha, eseng ba robong ba sa kang ba leboha!

⁹ Joale, litaelo tsa Jehova tseo re lokelang ho li mamela ke life? Re buile ka tse ’maloa bukeng ena, empa a re ke re hlahlobe tse seng kae tsa tsona. Ho mamela litaelo tsa Molimo ho tla re thusa ho lula leratong la Molimo.

ATAMELA HAUFI LE JEHOVA KAMEHLA

10. Hlalosa hore na ke hobane’ng ha e le habohlokoa hore re tsoele pele ho ithuta ka Jehova Molimo.

¹⁰ Ho ithuta ka Jehova ke mohato oa bohlokoa o u atametsang haufi le eena. Ke mohato o lokelang ho tsoela pele. Haeba u ne u le ka ntle e le bosiu ho bata haholo e ba u ikomositse mollong, na u ne u tla tlohella mollo oo o fele o be o qetelle o timme? Che. U ne u tla lula u o beselletsa e le hore o tuke ’me o chese. Ho seng joalo bophelo ba hao bo ne bo ka ’na ba e-ba kotsing! Feela joalokaha mollo o beselletsoa ka patsi, “tsebo ea Molimo” le eona e etsa hore lerato la rōna ho Jehova le lule le le matla.—Liproverbia 2:1-5.

11. Seo Jesu a neng a se ruta se ile sa ama balateli ba hae joang?

¹¹ Jesu o ne a batla hore balateli ba hae ba boloke lerato la bona ho Jehova le Lentsoe la Hae la ’nete le tuka. Ka mor’a hore a tsosoe bafung, o ile a ruta barutuoa ba hae ba babeli bo bong ba boprofeta bo ka Mangolong a Seheberu bo ileng ba phethahala ho eena. Ka phello efe? Hamorao ba ile ba re: “Na lipelo tsa rōna li ne li sa chese ha a ntse a bua le rōna tseleng, ha a ntse a re bulela Mangolo ka botlalo?”—Luka 24:32.

12, 13. (a) Ho etsahetse’ng ka lerato la ba bangata ho Molimo le Bibele kajeno? (b) Re ka etsa’ng ho thibela lerato la rōna ho fola?

¹² Ha u qala ho ithuta seo ha e le hantle Bibele e se rutang, na u ile ua utloa pelo ea hao e qala ho chesoa ke thabo, cheseho le ho rata Molimo? Ha ho pelaelo hore u ile ua ikutloa joalo. Ba bangata ba ile ba ikutloa ka tsela eo. Taba-taba joale ke ho boloka lerato leo le matla le phela le ho le thusa ho hōla. Ha re batle ho latela mokhoa oa lefatše la kajeno. Jesu o ile a bolela esale pele a re: “Lerato la ba bangata le tla fola.” (Matheu 24:12) U ka etsa’ng ho thibela lerato la hao ho Jehova le linnete tsa Bibele ho fola?

¹³ Tsoela pele u ithuta ka Jehova Molimo le ka Jesu Kreste. (Johanne 17:3) Thuisa ka seo u ithutang sona Lentsoeng la Molimo, kapa u nahane ka sona ka ho teba, ’me u ipotse: ‘See se nthuta’ng ka Jehova Molimo? Ke na le lebaka lefe hape la ho mo rata ka pelo ea ka eohle, kelello ea ka eohle le ka moea oa ka oohle?’ (1 Timothea 4:15) Ho thuisa ho joalo ho tla boloka lerato la hao ho Jehova le tuka.

14. Thapelo e ka re thusa ho boloka lerato la rōna ho Jehova le phela joang?

¹⁴ Tsela e ’ngoe ea ho boloka lerato la rōna ho Jehova le tuka ke ka ho rapela kamehla. (1 Bathesalonika 5:17) Khaolong ea 17 ea buka ena, re ithutile hore thapelo ke mpho ea bohlokoa e tsoang ho Molimo. Feela joalokaha kamano e pakeng tsa batho e atleha ha ba lula ba buisana ka bolokolohi, le rōna kamano ea rōna le Jehova e lula e le mofuthu ebile e phela ha re mo rapela kamehla. Ke habohlokoa hore re se ke ra lumella lithapelo tsa rōna hore e be tse etsoang ka tloaelo feela—ra lulela ho pheta mantsoe a le mang a sa bontšeng boikutlo kapa a se nang seo a se bolelang. Re lokela ho bua le Jehova joalokaha ngoana a ne a tla bua le ntate oa hae eo a mo ratang. Ke ’nete hore re batla ho bua ka tlhompho, empa re bua ka bolokolohi ho tloha botebong ba pelo le ka botšepehi. (Pesaleme ea 62:8) Ha e le hantle, ho ithuta Bibele re le batho ka bomong le ho etsa thapelo e tlohang botebong ba pelo ke litšobotsi tsa bohlokoa borapeling ba rōna, ’me li ka re thusa hore re lule leratong la Molimo.

FUMANA THABO BORAPELING BA HAO

15, 16. Ke hobane’ng ha ka nepo re ka nka mosebetsi oa boboleli ba ’Muso e le tokelo e khōlō ebile e le letlotlo?

¹⁵ Ho ithuta Bibele le ho rapela ke liketso tsa borapeli tseo re ka li etsang boinotšing. Empa joale a re ke re hlahlobe tšobotsi e ’ngoe ea borapeli eo re e etsang phatlalatsa: ho bua le ba bang ka seo re se lumelang. Na u se u boleletse ba bang linnete tse ling tsa Bibele? Haeba ho joalo, u bile le tokelo e babatsehang. (Luka 1:74) Ha re bolella ba bang linnete tseo re ithutileng tsona ka Jehova Molimo, re etsa mosebetsi oa bohlokoa ka ho fetisisa o filoeng Bakreste bohle ba ’nete—e leng oa ho bolela litaba tse molemo tsa ’Muso oa Molimo.—Matheu 24:14; 28:19, 20.

¹⁶ Moapostola Pauluse o ne a nka tšebeletso ea hae e le ea bohlokoa, a e bitsa letlotlo. (2 Bakorinthe 4:7) Ho buisana le batho ka Jehova Molimo le ka merero ea hae ke mosebetsi oa bohlokoa ka ho fetisisa oo u ka o etsang. Ke ho sebeletsa Monghali ea molemo ka ho fetisisa ebile ho tlisa meputso e molemo ka ho fetisisa. Ka ho kopanela mosebetsing ona, u thusa batho ba lipelo li tšepahalang hore ba atamele haufi le Ntate oa rōna oa leholimo le hore ba kene tseleng e isang bophelong bo sa feleng! Na o teng mosebetsi o khotsofatsang joaloka oo? Ho feta moo, ho paka ka Jehova le ka Lentsoe la hae ho matlafatsa tumelo ea hao ebile ho tiisa lerato la hao ho eena. ’Me Jehova o ananela boiteko boo u bo etsang. (Baheberu 6:10) Ho tšoareha mosebetsing oo ho u thusa hore u lule leratong la Molimo.—1 Bakorinthe 15:58.

17. Ke hobane’ng ha tšebeletso ea Bakreste e potlakile kajeno?

¹⁷ Ke habohlokoa ho hopola hore mosebetsi oa boboleli ba ’Muso o potlakile. Bibele e re: “U bolele lentsoe, u be ho lona ka ho phehella.” (2 Timothea 4:2) Ke hobane’ng ha ho potlakile ho etsa seo kajeno? Lentsoe la Molimo le re: “Letsatsi le leholo la Jehova le haufi. Le haufi, ’me le potlakile haholo.” (Sofonia 1:14) E, nako e atamela ka potlako ea hore Jehova a timetse tsamaiso ena eohle ea lintho. Batho ba lokela ho lemosoa! Ba lokela ho tseba hore hona joale ke nako ea hore ba khethe Jehova e le ’Musi oa bona. Bofelo ‘bo ke ke ba siuoa ke nako.’—Habakuke 2:3.

18. Ke hobane’ng ha re lokela ho rapela Jehova phatlalatsa hammoho le Bakreste ba bang ba ’nete?

¹⁸ Jehova o batla hore re mo rapele phatlalatsa hammoho le Bakreste ba bang ba ’nete. Ke kahoo Lentsoe la hae le reng: “A re nahanelaneng hore re susumeletsane leratong le mesebetsing e metle, re sa tlohele ho bokana ha rōna, joalokaha ba bang ba e-na le tloaelo eo, empa re khothatsana, ’me re etsa joalo haholo kaha le bona letsatsi le ntse le atamela.” (Baheberu 10:24, 25) Ha re bokana hammoho le balumeli-’moho le rōna libokeng tsa Bokreste, re na le monyetla o babatsehang oa ho rorisa Molimo oa rōna ea ratehang le ho mo rapela. Re boetse rea hahana le ho khothatsana.

19. Re ka matlafatsa maqhama a lerato joang ka phuthehong ea Bokreste?

¹⁹ Ha re ntse re kopanela le barapeli ba bang ba Jehova, re matlafatsa maqhama a lerato le botsoalle ka phuthehong. Ke habohlokoa hore re shebe se molemo ho ba bang, joalokaha Jehova a sheba se molemo ho rōna. U se ke ua lebella hore balumeli-’moho le uena e be ba phethahetseng. Hopola hore kaofela ha bona ba methating e sa tšoaneng ea khōlo moeeng le hore e mong le e mong oa rōna o etsa liphoso. (Bakolose 3:13) Leka ho theha botsoalle bo haufi le ba ratang Jehova ka ho teba, ’me le uena u tla hōla moeeng. E, ho rapela Jehova u e-na le bara le barali beno ba moea ho tla u thusa ho lula leratong la Molimo. Jehova o putsa joang ba mo rapelang ka botšepehi ’me ka tsela eo ba lula leratong la hae?

HAHAMALLA “BOPHELO BA SEBELE”

20, 21. “Bophelo ba sebele” ke eng, hona ke hobane’ng ha e le tšepo e babatsehang?

²⁰ Jehova o putsa bahlanka ba hae ba tšepahalang ka bophelo, empa bophelo ba mofuta ofe? Na u hlile ua phela hona joale? Ba bangata ba rōna ba ka ’na ba re karabo ea potso eo e totobetse. Etsoe rea hema, rea ja ebile rea noa. Ka sebele e tlameha ebe rea phela. Ebile ha re thabile, re ka ’na ra re, “Joale bona ke bona bophelo!” Empa Bibele e bontša hore ka kutloisiso ea bohlokoa le ho feta, ha ho motho ea hlileng a phelang kajeno.

²¹ Lentsoe la Molimo le re phehella hore re ‘tšoare ka tieo bophelo ba sebele.’ (1 Timothea 6:19) Mantsoe ao a bontša hore “bophelo ba sebele” ke boo re tšepang ho bo fumana nakong e tlang. E, re tla phela ka kutloisiso e feletseng ea lentsoe leo ha re se re phethahetse, kaha re tla be re phela ka tsela eo Molimo a neng a re reretse hore re phele ka eona qalong. Ha re se re le lefatšeng la paradeise re phela hantle ka ho feletseng ’meleng, re e-na le khotso re bile re thabile ka ho feletseng, qetellong re tla thabela “bophelo ba sebele”—bophelo bo sa feleng. (1 Timothea 6:12) Na eo hase tšepo e babatsehang?

22. U ka ‘tšoara joang ka tieo bophelo ba sebele’?

²² Re ka ‘tšoara joang ka tieo bophelo ba sebele’? Temaneng e ’ngoe hona moo, Pauluse o khothalletsa Bakreste hore “ba sebetse se molemo” le hore “ba rue mesebetsing e metle.” (1 Timothea 6:18) Joale, ho hlakile hore taba-khōlō ke hore na re sebelisa linnete tseo re ithutileng tsona Bibeleng joang. Empa na Pauluse o ne a bolela hore re fumana “bophelo ba sebele” ka ho etsa mesebetsi e molemo? Che, kaha ha e le hantle tebello eo e babatsehang e itšetlehile ka hore Molimo a re bontše “mosa o sa tšoanelang.” (Baroma 5:15) Leha ho le joalo, Jehova o thabela ho putsa ba mo sebeletsang ka botšepehi. O batla ho u bona u phela “bophelo ba sebele.” Ba lulang leratong la Molimo ba letetsoe ke bophelo boo bo sa feleng ba thabo le khotso.

23. Ke hobane’ng ha ho hlokahala hore motho a lule leratong la Molimo?

²³ E mong le e mong oa rōna o lokela ho ipotsa, ‘Na ke rapela Molimo ka tsela eo a e laetseng ka Bibeleng?’ Haeba letsatsi le letsatsi re tiisa hore re araba potso eo ka e, joale re tla be re le tseleng e nepahetseng. Re ka kholiseha hore Jehova ke setšabelo sa rōna. O tla boloka batho ba hae ba tšepahalang ba sireletsehile matsatsing a ho qetela a thata a tsamaiso ena ea khale ea lintho. Hape Jehova o tla re lopolla hore re kene re sireletsehile tsamaisong e ncha e khanyang ea lintho e ntseng e atamela. Re tla nyakalla hakaakang ha re bona nako eo! Re tla thaba hakaakang hore ebe re entse khetho e nepahetseng matsatsing aa a ho qetela! Haeba u etsa khetho eo hona joale, u tla thabela “bophelo ba sebele” ka ho sa feleng, e leng bophelo boo Jehova Molimo a neng a bo rerile!

SEO BIBELE E SE RUTANG

▪ Re bontša hore re rata Molimo e le kannete ha re boloka litaelo tsa hae re bile re sebelisa melao-motheo ea hae.—1 Johanne 5:3.

▪ Ho ithuta Lentsoe la Molimo, ho rapela Jehova ho tloha botebong ba pelo, ho ruta ba bang ka eena le ho mo rapela libokeng tsa Bokreste ho tla re thusa ho lula leratong la Molimo.—Matheu 24:14; 28:19, 20; Johanne 17:3; 1 Bathesalonika 5:17; Baheberu 10:24, 25.

▪ Ba lulang leratong la Molimo ba na le tšepo ea ho thabela “bophelo ba sebele.”—1 Timothea 6:12, 19; Juda 21.

[Setšoantšo se leqepheng la 184]

Na u tla etsa Jehova setšabelo sa hao linakong tsee tse thata?

[Setšoantšo se leqepheng la 187]

Joaloka mollo, lerato la hao ho Jehova le hloka libeso e le hore le ’ne le tuke

[Setšoantšo se leqepheng la 190]

Jehova o batla hore u thabele “bophelo ba sebele.” Na u tla bo thabela?