Mohlala o Motle oa Jobo

Bophelo ba Jobo bo ile ba fetoha ka ho feletseng. Ntlha ea pele, o ile a lahleheloa ke mokhoa oa hae oa ho iphelisa. Ea bobeli, o ile a shoeloa ke bana. Ea boraro, o ile a kula. Tsena tsohle li ile tsa etsahala ka potlako ebile a sa lebella. Jobo o ile a bua a nyahame haholo, a re: “Ka sebele moea oa ka o nyonya bophelo ba ka.” O ile a hlalosa hore ‘o khotše ho hlompholoha ’me o tletse mahloreho.’ (Jobo 10:1, 15) Le hoja Jobo a ne a aparetsoe ke mathata, o ile a hana ho furalla ’Mōpi oa hae. (Jobo 2:10) Liphetoho tse ileng tsa e-ba teng bophelong ba hae, ha lia ka tsa fetola seo a leng sona. Kahoo, Jobo o re behetse mohlala oa ho mamella.

Ha u tobana le mathata, le uena u ka ’na ua ikutloa ‘u nyonya bophelo ba hao.’ Empa joaloka Jobo, u ka bontša hore maemo a fetohang ha a fetole seo u leng sona, u lutse u tiile boikemisetsong ba hao ba ho sebeletsa Jehova Molimo. Jakobo o ile a ngola, a re: “Bonang! Re phatlalatsa hore ba mameletseng ba thabile. Le utloile ka mamello ea Jobo ’me le bone phello eo Jehova a ileng a fana ka eona, hore Jehova o na le lerato le mofuthu haholo ’me o mohau.” (Jakobo 5:11) O ne a tsotella Jobo, ’me le uena oa u tsotella!