Mohlala o Motle oa Timothea

Timothea o ne a le mothating oa ho tloha lapeng—eseng hobane a baleha ba lelapa labo, empa hobane e il’o ba moromuoa hammoho le moapostola Pauluse! Mohlomong Timothea o ne a habile lilemo tse 20, ’me e se e le mohlankana ea nang le boikarabelo ea neng a “buuoa hantle ke barab’abo rōna Lystra le Ikoniamo.” (Liketso 16:2) Pauluse o ne a kholisehile hore Timothea a ka phetha mosebetsi oa bohlokoa tšebeletsong ea Molimo. ’Me o ile a fela a etsa seo! Lilemo ka mor’a moo, Timothea o ile a ea libakeng tse ngata, a theha liphutheho le ho matlafatsa bara le barali babo rōna. Litšobotsi tse ntle tseo Timothea a neng a e-na le tsona li ile tsa etsa hore Pauluse a mo rate, ’me lilemo tse ka bang 11 hamorao o ile a re ka eena ho Bafilipi: “Ha ke na e mong ea nang le boikutlo bo kang ba hae eo kannete a tla hlokomela lintho tse le amang.”—Bafilipi 2:20.

Na u ithaopela hore u sebelisoe tšebeletsong ea Molimo? Haeba ho joalo, u tla fumana litlhohonolofatso tse enneng! Ruri Jehova o ananela bacha ‘ba itlhahisang ka ho rata.’ (Pesaleme ea 110:3) Ho feta moo, u ka kholiseha hore Jehova Molimo ‘hase ea sa lokang hoo a ka lebalang mosebetsi oa hao.’—Baheberu 6:10.