Khaolong ea 1

Nka Buisana le Batsoali ba ka Joang?

“Ke lekile ka matla ho bolella batsoali ba ka kamoo ke ikutloang kateng, empa lintho ha lia ka tsa tsamaea hantle—ba ile ba ntlhokela nako. Ke ile ka leka ka matla hore ke fumane sebete sa ho itlhalosa, empa ka hlōleha ka ho feletseng!”—Rosa.

HA U sa le monyenyane, ho ka etsahala hore ebe u ne u mathela ho batsoali ba hao hore ba u eletse. U ne u ba bolella ntho e ’ngoe le e ’ngoe. U ba hlalosetsa lintho tseo u li nahanang le maikutlo a hao ka bolokolohi ’me u tšepa likeletso tseo ba u fang tsona.

Empa e ka ’na eaba hona joale, u nka hore batsoali ba hao ha ba sa u utloisisa. Ngoanana e mong ea bitsoang Edie o re: “Ka le leng mantsiboea ha re ntse re ja, ke ile ka qala ho lla, ’me ka bolella batsoali ba ka kamoo ke ikutloang kateng. Ba ile ba ’mamela, empa ho ne ho bonahala eka ha ba utloisise.” O ile a etsa’ng ka mor’a moo? O re: “Ke ile ka ikela ka kamoreng, ka lla le ho feta!”

Ka lehlakoreng le leng, ka linako tse ling u ka ’na ua khetha ho se phetlele batsoali ba hao sefuba. Moshanyana e mong ea bitsoang Christopher o re: “Ke buisana le batsoali ba ka ka lintho tse ngata. Empa ntho eo ke e ratang ke hore ka linako tse ling, ha ba tsebe ntho e ’ngoe le e ’ngoe eo ke e nahanang.”

Na ho fosahetse ho ipolokela litaba tse ling? Che, ha hoa fosahala—hafeela u sa etse bolotsana. (Liproverbia 3:32) Leha ho le joalo, ebang batsoali ba hao ba bonahala ba sa u utloisise kapa ke uena ea sa ba phetleleng sefuba, ’nete ke hore: U lokela ho buisana le batsoali ba hao—’me le bona ba batla ho tseba seo u se nahanang.

U se ke Ua Khaotsa ho Buisana le Bona!

Ka tsela e itseng, ho buisana le batsoali ba hao ho tšoana le ho khanna koloi. Haeba u kopana le bothata tseleng, ha u tele; empa u batla tsela e ’ngoe. Nahana ka mehlala ena e ’meli.

BOTHATA BA 1 U batla ho bua, empa ho bonahala eka batsoali ba hao ha ba u mamele. Ngoanana e mong ea bitsoang Leah o re: “Ke thatafalloa ho buisana le Ntate. Ka linako tse ling ke qeta nako ke ntse ke bua le eena ebe ka mor’a nako o re, ‘Ntšoarele hle, u ntse u bua le ’na?’”

POTSO: Leah a ka etsa’ng haeba a hlile a batla ho buisana le ntate oa hae ka bothata bo itseng? Bonyane ho na le lintho tse tharo tseo a ka khethang ho li etsa.

A ka Khetha A

Ho tlatsetsa ntate oa hae lerata. Leah oa hooa, o re: “Ntate taba ena ke ea bohlokoa hle! Ak’u ’mamele!”

A ka Khetha B

Ho khaotsa ho buisana le ntate oa hae. Leah o etsa qeto ea ho khaotsa ho bua ka bothata ba hae.

A ka Khetha C

Ho emela nako e loketseng e le hore a boele a bue ka taba eo. Hamorao Leah o bua le ntate oa hae ba shebane mahlong, kapa o mo ngolla lengolo ’me o mo hlalosetsa bothata ba hae.

U nahana hore Leah o lokela ho khetha hofe? ․․․․․

A re hlahlobe hore na ntho ka ’ngoe eo a ka khethang ho e etsa e ka ’na ea lebisa hokae.

Ntate oa Leah o ferekane ’me ha a hlokomele hore morali oa hae le eena o tšoenyehile. Kahoo haeba Leah a Khetha A, ntate oa hae a ka ’na a se ke a utloisisa hore na ke hobane’ng ha a tleroha. Ho khetha sena ho ka ’na ha se ke ha etsa hore ntate oa Leah a mo mamele, ebile ho tla bontša hore ha a mo hlomphe. (Baefese 6:2) Kahoo, ha e le hantle hoo ke ho hamela letanteng.

Le hoja ho Khetha B ho ka ’na ha bonahala ho le bonolo ka ho fetisisa, hase bohlale ho etsa joalo. Hobane’ng? Hobane “merero ea senyeha moo ho se nang [puisano ea] lekunutu, empa ha baeletsi ba le bangata ho na le se finyelloang.” (Liproverbia 15:22) E le hore Leah a atlehe ho sebetsana le mathata a hae, ho hlokahala hore a buisane le ntate oa hae—’me ho hlokahala hore ntate oa hae a tsebe lintho tse etsahalang bophelong ba hae, e le hore a mo thuse. Haeba a khaotsa ho buisana le eena, ha ho letho le finyelloang.

Empa haeba Leah a Khetha C, ha a lumelle bothata hore e be tšitiso. Ho e-na le hoo, o leka ho buisana le ntate oa hae ka nako e ’ngoe. Haeba Leah a khetha ho ngolla ntate oa hae lengolo, a ka ’na a ikutloa a imolohile hang feela. Ho ngola lengolo ho ka ’na ha boela ha mo thusa hore a nahane hantle seo a batlang ho se bolella ntate oa hae. Ha ntate oa Leah a bala lengolo leo, o tla hlokomela seo a neng a leka ho mo bolella sona, e leng se ka ’nang sa mo thusa hore a utloisise bothata ba hae haholoanyane. Kahoo, ho Khetha C ho tsoela Leah le ntate oa hae molemo.

Ke lintho life tse ling tseo Leah a ka ’nang a khetha ho li etsa? Leka ho nahana ka e ’ngoe, ’me u e ngole ka tlaase mona. Ebe ua ngola hore na ho khetha ho etsa seo ho ka ’na ha lebisa hokae.

․․․․․

BOTHATA BA 2 Batsoali ba hao ba batla ho bua, empa uena ha u batle. Ngoanana e mong ea bitsoang Sarah o re: “Ha ho ntho e ntenang joaloka ho hlongoa lipotso ha u tsoa sekolong, u khathetse. Ke batla ho lebala ka lintho tse etsahetseng sekolong, empa hang feela ha ke fihla, batsoali ba ka ba re: ‘Ho ne ho le joang sekolong kajeno? Na ho bile le mathata?’” Ha ho pelaelo hore batsoali ba Sarah ba mo botsa lipotso tseo ka sepheo se setle. Empa Sarah o re, “Ke thatafalloa ho bua ka lintho tse etsahetseng sekolong ha ke khathetse ke bile ke sithabetse.”

POTSO: Sarah a ka etsa’ng boemong boo? Joaloka mohlaleng o fetileng, bonyane ho na le lintho tse tharo tseo a ka khethang ho li etsa.

A ka Khetha A

Ho ithōlela. Sarah o re: “A ke le ntloheleng. Ha ke batle ho bua hona joale!”

A ka Khetha B

Ho ba araba. Sarah o ikutloa a sithabetse ’me o araba batsoali ba hae a tenehile.

A ka Khetha C

Ho ba bolella lintho tse etsahetseng sekolong hamorao, empa o ntšetsa puisano pele ka hore a bue ka taba e ’ngoe. Sarah o etsa tlhahiso ea hore o tla ba hlalosetsa lintho tse etsahetseng sekolong ka nako e ’ngoe, ha a ikutloa hore a ka bua. Joale a sa iketsise, o re: “Lōna le hlotse joang? Ho ne ho le joang motšehare?”

U nahana hore Sarah o lokela ho khetha hofe? ․․․․․

A re boele re hlahlobe hore na ntho ka ’ngoe eo a ka khethang ho e etsa e ka ’na ea lebisa hokae.

Sarah o ikutloa a sithabetse a bile a sa batle ho bua. Haeba a Khetha A, o tla ’ne a ikutloe a sithabetse a be a ikutloe a le molato ka hore ebe o jajabelitse batsoali ba hae ka bohale.—Liproverbia 29:11.

Ka nako e tšoanang, batsoali ba Sarah ba ka ’na ba utloisoa bohloko ke ho tlakoloha ha hae ka bohale—kapa hore ebe oa ithōlela ka mor’a moo. Ba ka ’na ba belaella hore ho na le seo Sarah a ba patelang sona. Ba ka ’na ba leka ka matla le ho feta ho etsa hore a bue, e leng seo ha e hantle se tlang ho mo ferekanya le ho feta. Qetellong, ho etsa sena ke ho hamela letanteng.

Ho hlakile hore ho Khetha B ho molemo ho feta ho khetha A. Etsoe bonyane Sarah le batsoali ba hae ba tla be ba buisana. Empa kaha Sarah le batsoali ba hae ba tla be ba sa buisane ho tsoa pelong, ha ba na ho fumana seo ba hlileng ba se batlang—e leng ho buisana ka bolokolohi le ka botšepehi.

Empa haeba Sarah a Khetha C, o tla ikutloa a imolohile hore ebe ha a bue ka lintho tse etsahetseng sekolong ka nako eo. Batsoali ba hae ba tla ananela boiteko boo a bo etsang ba ho buisana le bona, kahoo ba tla thaba. Ho khetha ho etsa sena ho ka ’na ha hlahisa liphello tse molemo ka ho fetisisa, kaha mahlakore ka bobeli a latela molao-motheo o ho Bafilipi 2:4, o reng: “Le hlokomele lithahasello tsa ba bang, eseng tsa lōna feela.”—Today’s English Version.

Qoba ho Fana ka Maikutlo a Fosahetseng

Hopola hore ka linako tse ling seo u se buang se ka ’na sa fapana le molaetsa oo batsoali ba hao ba o utloang. Ka mohlala, batsoali ba hao ba u botsa hore na ke hobane’ng ha u bonahala eka ha ua thaba. Ebe u re, “Ha ke batle ho bua ka taba ena.” Empa batsoali ba hao ba utloa eka u re: “Ha ke le tšepe hoo nka le phetlelang sefuba. Ke tla bua le metsoalle ea ka ka bothata boo, eseng lōna.” Ak’u leke ho tlatsa mela e ka tlaase mona. Nka hore u tobane le bothata bo itseng bo tebileng ’me batsoali ba hao ba ithaopela ho u thusa.

Ha u re: “Le se ke la tšoenyeha. Ke tla itharollela bona.”

Batsoali ba hao ba ka ’na ba utloa eka u re: ․․․․․

Mohlomong tsela e molemo eo u ka arabang ka eona e ka ba ho re: ․․․․․

Ke’ng seo u lokelang ho se hopola? Ke hore u khethe mantsoe ka hloko. Bua ka tsela e bontšang tlhompho. (Bakolose 4:6) Talima batsoali ba hao e le bathusi, eseng lira. Ho bua ’nete: U hloka thuso ka litsela tsohle e le hore u atlehe ho sebetsana le mathata ao u tobanang le ’ona.

LENGOLO LA SEHLOOHO

“Ke bua ka ho toba ho tsoa pelong ea ka ’me ke bua ka botšepehi.”—Jobo 33:3, The Holy Bible in the Language of Today, ea William Beck.

KELETSO

Haeba u thatafalloa ho buisana le motsoali kapa batsoali ba hao ka bothata bo itseng le lutse fatše, buisana le bona ka taba eo ha le ntse le otlolla maoto, le tsamaea ka koloi, kapa ha le ile mabenkeleng.

NA U NE U TSEBA . . . ?

Feela joalokaha u ka ’na ua thatafalloa ho buisana le batsoali ba hao ka litaba tse itseng tse tebileng, le bona ba ka ’na ba ikutloa ba sa phutholoha ba bile ba sa tšoanelehe ho bua ka litaba tseo.

SEO KE RERANG HO SE ETSA!

Nakong e tlang ha ke utloa hore ke khaotse ho buisana le batsoali ba ka, ke tla ․․․․․

Haeba motsoali oa ka a tsitlella hore ke bue ka taba eo ke sa batleng ho bua ka eona, ke tla re ․․․․․

Lintlha tseo ke tla rata ho li botsa motsoali kapa batsoali ba ka tabeng ena ke ․․․․․

U NAHANA’NG KA SEE?

● Ho khetha nako e loketseng ho ka thusa joang tabeng ea hore ho be le puisano e ntle?—Liproverbia 25:11.

● Ke hobane’ng ha e le habohlokoa hore u buisane le batsoali ba hao?—Jobo 12:12.

[Ntlha e Qolotsoeng e leqepheng la 10]

“Hase kamehla ho leng bonolo ho buisana le batsoali, empa ha u ba phetlela sefuba, u ikutloa eka ho tlositsoe moroalo o boima mahetleng.”—Devenye

[Setšoantšo se leqepheng la 8]

Feela joalokaha u sa tele ha u kopana le bothata tseleng, u ka fumana tsela ea ho buisana le batsoali ba hao!

Khaolong ea 2

Ke Hobane’ng ha re Lula re Ngangisana?

Boemong bo hlalositsoeng qalong ea khaolo ena, Rachel o tlatselitse ka litsela tse tharo hore ho be le ngangisano. Na u ka li qolla? Ngola likarabo meleng e ka tlaase mona, ebe u li bapisa le tse lebokoseng la “Likarabo” le leqepheng la 20.

․․․․․

Ke Laboraro mantsiboea. Rachel ea lilemo li 17, o qetile mesebetsi ea lapeng ’me o itokisetsa hore qetellong a ke a robe monakeli! O bulela TV ’me o lula setulong seo a se ratang.

Hang ka mor’a hore a lule fatše, ’mè oa hae oa kena ’me o bonahala a sa thaba. “Rachel! Ke hobane’ng ha u senya nako u shebeletse TV, ha e tlameha ebe u thusa ngoan’eno ka mosebetsi oa sekolo? Ha ho mohla u etsang seo u se laetsoeng!”

Rachel o buela tlaase, o re: “Oa be a se a qalile.”

’Mè oa atamela, o re: “U re’ng uena ngoananyana?”

Rachel o hemela holimo ’me o bilikisa mahlo, o re: “Ha ke re letho ’Mè.”

Joale ’mè oa hae o hlile o koatile. O re: “U se ke ua bua le ’na joalo!”

Rachel oa mo arabisa, o re: “Uena ke hobane’ng ha u mpuisa joalo?”

Nako ea phomolo e felile . . . ba qala ho ngangisana hape.

NA U kile ua ba boemong bo kang bo hlalositsoeng ka holimo? Na u lula u ngangisana le batsoali ba hao? Haeba ho joalo, ak’u nahane ho se hokae ka seo. Ke lintho life tse le qabanyang hangata? Lintlheng tse latelang, tšoaea ✔ ho tse u amang—kapa u ngole e le qabanyang pel’a “Tse ling.”

□ Boitšoaro

□ Mesebetsi ea lapeng

□ Liaparo

□ Nako ea ho fihla lapeng

□ Boithabiso

□ Metsoalle

□ Banana kapa bashanyana

□ Tse ling ․․․․․

Ho sa tsotellehe hore na uena le batsoali ba hao le ngangisana ka eng, seo se etsa hore le qetelle le sa thaba. Ke ’nete hore u ka ’na ua ithōlela ’me ua etsa eka u lumellana le ntho e ’ngoe le e ’ngoe eo batsoali ba hao ba e buang. Empa na see ke seo Molimo a lebeletseng hore u se etse? Che. Ke ’nete hore Bibele e re u ‘hlomphe ntat’ao le ’m’ao.’ (Baefese 6:2, 3) Empa e boetse e u khothalletsa hore u hōlise “matla a ho nahana” le hore u a sebelise. (Liproverbia 1:1-4; Baroma 12:1) Ha u etsa joalo, ha ho pelaelo hore ho tla ba le lintho tse itseng tseo u li lumelang ka tieo, ’me tse ling tsa tsona li ka ’na tsa fapana le tseo batsoali ba hao ba li lumelang. Leha ho le joalo, malapeng a sebelisang melao-motheo ea Bibele, batsoali le bana ba ka buisana ka khotso—esita le haeba ba sa lumellane.—Bakolose 3:13.

U ka itlhalosa joang ntle le hore puisano ea lōna e fetohe ntoa? Ho bonolo ho re: “Batsoali ba ka ba na le bothata. Etsoe ke bona ba lulang ba ntšoenya!” Empa nahana: Ke ho isa bohōleng bofe u ka laolang seo batho ba bang ba se etsang, ho akarelletsa batsoali ba hao? Ka sebele, ntho feela eo u ka e laolang ke ho fetola seo u se etsang. ’Me ho thabisang ke hore haeba u phetha karolo ea hao ho fokotsa tsitsipano pakeng tsa lōna, batsoali ba hao ba ka ’na ba lula ba khobile matšoafo ’me ba u mamela ha u bua.

Kahoo a re hlahlobe seo u ka se etsang e le hore u khaotse ho ngangisana le bona. Sebelisa litlhahiso tse latelang, ’me uena le batsoali ba hao le ka ’na la makatsoa ke tsela e ncha eo le buisanang ka eona.

● Nahana pele u bua. U se ke ua phasoloha ntho ea pele feela e tlang kelellong ea hao ha u utloa eka ua hlaseloa. Ka mohlala, a re re ’mè oa hao o re: “Ke hobane’ng ha u sa hlatsoa lijana? Ha ho mohla u etsang seo u se laetsoeng!” Ha u mo araba u sa nahana u ka ’na ua re, “U nkomanyetsa’ng joale?” Empa sebelisa matla a ho nahana. Leka ho utloisisa tsela eo ’mè oa hao a ikutloang ka eona. Maemong a mangata, ha ua lokela ho nka mantsoe a kang “mehla ena” le “ha ho mohla” ka tsela ea sebele. Leha ho le joalo, a bontša tsela eo motsoali a ikutloang ka eona. E ka ’na eaba o ikutloa joang?

Mohlomong ’mè oa hao o ferekane, o nka hore ba bang ka lapeng baa mo imetsa ka mosebetsi. E ka ’na eaba o mpa feela a batla hore u mo tiisetse hore ua mo tšehetsa. Haeba ho joalo, ho re: “U nkomanyetsa’ng joale?” ho ke ke ha u thusa ka letho—empa ho ka ’na ha mpefatsa lintho! Ho e-na le hoo, ke hobane’ng ha u sa etse hore ’mè oa hao a phutholohe? Ka mohlala, u ka ’na ua re: “Kea bona hore u koatile ’Mè. Ke tla hlatsoa lijana tseo hona joale.” Tlhokomeliso: U se ke ua bua ka ho phoqa. Araba ka tsela e bontšang kutloelo-bohloko ’me seo se ka ’na sa mo kokobetsa bohale ebe o u bolella hore na ha e le hantle bothata ke eng.a

Ka tlaase mona, ngola mantsoe ao ’mè kapa ntate oa hao a ka ’nang a a bua, a ka u khopisang—haeba u a lumella.

․․․․․

Joale nahana ka karabo e bontšang kutloelo-bohloko, e ka ’nang ea bontša hore u utloisisa hore na ke hobane’ng ha a bua joalo.

․․․․․

● Bua ka tlhompho. Michelle o ithutile ka se mo etsahaletseng hore ke habohlokoa hore na o bua le ’mè oa hae joang. O re: “Ho sa tsotellehe hore na bothata ke’ng, ’Mè o lula a mpolella hore ha a rate tsela eo ke mo buisang ka eona.” Haeba seo se atisa ho u etsahalla, ithute ho buela tlaase le hona u bue butle, ’me u qobe ho bilikisa mahlo kapa ho etsa lintho tse ling tse bontšang hore u tenehile. (Liproverbia 30:17) Haeba u utloa eka u tla tloha u halefa, etsa thapelo e khutšoanyane ka pelong. (Nehemia 2:4) Ke ’nete hore sepheo sa hao hase ho kōpa Molimo ho u thusa hore ‘motsoali oa hao a khaotse ho u tšoenya’ empa ke hore a u thuse u ithibe e le hore u se ke ua mpefatsa boemo le ho feta.—Jakobo 1:26.

Ka tlaase mona, ngola tse ling tsa lintho tseo u atisang ho li bua le ho li etsa tseo u lokelang ho li qoba.

Lintho tseo u li buang:

․․․․․

Lintho tseo u li etsang ka sefahleho le ka ’mele:

․․․․․

● Mamela. Bibele e re: “Ea buang haholo sebe se teng polelong tsa hae.” (Liproverbia 10:19, Bibele—Phetolelo e Ncha) Kahoo etsa bonnete ba hore u fa ’mè kapa ntate oa hao monyetla oa hore a bue, ’me u mo mamele ka hloko. U se ke ua mo kena hanong e le hore u ikemele. Mo mamele. Hamorao ha a se a qetile ho bua, u tla ba le nako e ngata ea ho botsa lipotso kapa ea ho itlhalosa. Ka lehlakoreng le leng, haeba u etsa manganga ’me u tsitlella ho ntša maikutlo a hao ka nako eo, u ka ’na ua mpefatsa lintho le ho feta. Esita le haeba ho e-na le lintho tse ngata tseo u batlang ho li bua, mohlomong eo “ke nako ea ho khutsa.”—Moeklesia 3:7.

● Ikemisetse ho kōpa tšoarelo. Kamehla ho molemo hore u kōpe tšoarelo ka ntho leha e le efe eo u e entseng e le qabantseng. (Baroma 14:19) U ka ba ua ’na ua re u masoabi hore ebe le qabane. Haeba u thatafalloa ho etsa sena le shebane mahlong, leka ho ngola maikutlo a hao fatše. Ebe u ‘tsamaea maele e ’ngoe’ ka ho fetola ntho leha e le efe eo u e entseng e tlatselitseng bothateng boo. (Matheu 5:41) Ka mohlala, haeba le qabantsoe ke ho se etse seo u se laetsoeng, ke hobane’ng ha u sa thabise batsoali ka hore u etse mosebetsi oo ba sa lebella? Esita le haeba ke ntho eo u sa rateng ho e etsa, na ha ho molemo hore u e etse ho e-na le hore u halefise batsoali ba hao ha ba fumana hore ha ua e etsa? (Matheu 21:28-31) Kahoo nahana kamoo u ka ruang molemo kateng ha u phetha karolo ea hao ho fokotsa tsitsipano pakeng tsa hao le batsoali.

Malapa a atlehileng a ba le liqabang, empa a tseba ho li rarolla ka khotso. Haeba u sebelisa litlhahiso tse fanoeng khaolong ena, u ka ’na ua fumana hore u ka buisana le batsoali ba hao ka lintho tse thata—ntle le hore le ngangisane!

[Mongolo o botlaaseng ba leqephe]

LENGOLO LA SEHLOOHO

“Batho ba molemo baa nahana pele ba araba.”—Liproverbia 15:28, Today’s English Version.

KELETSO

Ha batsoali ba hao ba bua le uena, tima sebapala-’mino, beha buka kapa makasine fatše ’me u ba shebe mahlong.

NA U NE U TSEBA . . . ?

Ho leka ho rarolla liqabang kapa ho li thibela ho tla u nolofalletsa lintho haholoanyane bophelong. Ha e le hantle, Bibele e re motho “ea nang le mosa o lerato o sebetsana ka mokhoa o putsang le moea oa hae.”—Liproverbia 11:17.

SEO KE RERANG HO SE ETSA!

Tlhahiso e khaolong ena eo ke lokelang ho ntlafatsa haholo ho eona ke ․․․․․

Ke etsa qeto ea ho sebelisa tlhahiso ena ho qala ka la (ngola letsatsi) ․․․․․

Lintlha tseo ke tla rata ho li botsa motsoali kapa batsoali ba ka tabeng ena ke ․․․․․

U NAHANA’NG KA SEE?

● Ke hobane’ng ha bacha ba bang ba nkela holimo taba ea ho hlōla likhang?

● Ke hobane’ng ha Jehova Molimo a nka motho ea ratang ho ngangisana le ba bang e le leoatla?—Liproverbia 20:3.

● U tla rua molemo ofe ka ho fokotsa tsitsipano pakeng tsa hao le batsoali?

[Ntlha e Qolotsoeng e leqepheng la 18]

“Ka linako tse ling, ’Mè o kōpa tšoarelo ebe oa nhaka ’me seo sea nthabisa. Joale re lebala tse fetileng. Le ’na ke leka ho mo etsisa. Ho tlohela boikhohomoso le ho kōpa tšoarelo ka tieo ho molemo haholo, le hoja bonneteng ho se bonolo.”—Lauren

[Lebokose le leqepheng la 20]

Likarabo

1. O bua ka ho phoqa (“Oa be a se a qalile”) ’me seo se etsa hore ’mè oa hae a ferekane le ho feta.

2. Rachel o ile a ipitsetsa mathata ka ponahalo ea sefahleho (ha a bilikisa mahlo).

3. Hangata ho arabisa motsoali (“Uena ke hobane’ng ha u mpuisa joalo?”) ho mpefatsa litaba.

[Setšoantšo se leqepheng la 19]

Ho ngangisana le motsoali ho tšoana le ho tapa-tapa nģa e le ’ngoe—u tla fufuleloa empa ha ho na moo u tla ea teng