Somo 12

Ni Nini Hutokea Wakati Wa Kifo?

Kifo ni kinyume cha uhai. Kifo ni kama usingizi mzito. (Yohana 11:​11-14) Wafu hawawezi kusikia, kuona, kusema, wala kuwaza lolote. (Mhubiri 9:​5, 10) Dini isiyo ya kweli hufundisha kwamba wafu huenda katika ulimwengu wa roho ili waishi na babu zao wa kale waliokufa. Biblia haifundishi hivyo.

Wafu hawawezi kutusaidia, wala hawawezi kutuumiza. Kwa kawaida, watu hufanya matambiko na kutoa dhabihu ambazo wanaamini kuwa zitawafurahisha wafu. Mambo hayo yanamchukiza Mungu kwa sababu yanategemea mojawapo ya uwongo mbalimbali wa Shetani. Vivyo hivyo, mambo hayo hayawezi kuwapendeza wafu, kwa kuwa hawana uhai. Hatupaswi kuogopa wala kuabudu wafu. Tunapaswa kumwabudu Mungu peke yake.​—⁠Mathayo 4:⁠10.

Wafu wataishi tena. Yehova atawaamsha wafu warudi kwenye uhai katika dunia paradiso. Jambo hilo litatendeka wakati ujao. (Yohana 5:​28, 29; Matendo 24:15) Mungu anaweza kuwaamsha watu ambao wamekufa kama vile wewe unavyoweza kumwamsha mtu kutoka katika usingizi.​—⁠Marko 5:​22, 23, 41, 42.

Wazo la kwamba sisi hatufi ni uwongo ambao Shetani Ibilisi anaeneza. Shetani na roho wake waovu hufanya watu wafikiri kwamba roho za wafu ziko hai nazo husababisha magonjwa na matatizo mengine. Shetani huwadanganya watu, nyakati nyingine kupitia ndoto na maono. Yehova huwashutumu wale wanaojaribu kuongea na wafu.​—⁠Kumbukumbu la Torati 18:​10-12.