HABARI FULANI ZA ULIMWENGU

Inchi ya Amerika

Muji wa Los Angeles, Kalifornia, umepatanisha ishara (ao taa) zake zote karibu 4500 za barabarani, zinazoenea kwenye barabara zenye kilometa 1215 za muraba. Kulingana na gazeti moja (The New York Times), Los Angeles ndio “muji mukubwa wa kwanza kufanya hivyo katika dunia.”

Ulimwengu

Uchunguzi uliofanywa juu ya afya ya watu katika dunia yote ulionyesha kwamba kulikuwa ongezeko la watu 82 juu ya 100 walionenepa kupita kiasi kati ya mwaka wa 1990 na 2010. Kunenepa kupita kiasi kunatokeza vifo mara tatu kupita vifo vinavyotokezwa na kula vibaya, hata ikiwa katika inchi nyingi kungali tatizo la kupata chakula cha kutosha. Lakini kwa kweli, kulingana na maelezo ya Majid Ezzati, mumoja wa wachunguzi wakubwa, “kwa miaka 20 iliyopita, tumetoka katika dunia yenye watu walikosa chakula cha kutosha na tumeingia katika dunia iliyo na chakula kingi sana, kisichokuwa kizuri kwa afya, na chenye kuleta magonjwa, hata katika inchi zinazoendelea.”

Visiwa Vya Midway

Ndege mumoja albatrosi wa Laysan, anayesemekana kuwa “ndege wa porini wa zamani zaidi,” ametotoa tena kitoto kingine kati ya vitoto vyake vingi. Ndege huyo ana miaka ngapi? Alitiwa alama mara ya kwanza katika mwaka wa 1956 alipokuwa na miaka tano hivi, kwa hiyo, leo anapaswa kuwa na miaka zaidi ya 60. Katika maisha yake, inawezekana albatrosi huyo amekwisha kuruka kati ya kilometa milioni 3 mupaka 4. Kilometa hizo zinalingana na safari ine mupaka sita za kuenda na kurudia kutoka kwenye dunia mupaka kwenye mwezi.

Afrika ya Kusini

Uchunguzi moja unaonyesha kwamba wanawake 33 juu ya 100 wa Afrika ya Kusini wanatumia sabuni na mafuta za kugeuza rangi ya ngozi yao. Vitu hivyo vya kuangarisha ngozi ni vyenye hatari, na vimekwisha kukatazwa katika inchi nyingi. Kati ya hatari hizo, kuna aina mbalimbali za kansa, kuharibika kwa figo, kushuka moyo, mahangaiko, upele, na alama kwenye ngozi.