Sababu ya 1 Hali Zinaweza Kubadilika

Kujiua kumeitwa “njia ya kumaliza kabisa tatizo la muda tu.” Hata ikiwa unawaza kuwa haiwezekane, hali fulani yenye kusumbua, hata hali ambayo unashindwa kuvumilia, inaweza kuwa ya muda tu. Kwa kweli, inaweza kubadilika kwa njia nzuri bila kutazamia.​—Soma kisanduku “Hali Zao Zilibadilika.”

Hata ikiwa hali yako haibadilike, ni vizuri kushugulika na matatizo siku ileile yanapotokea. Yesu alisema hivi: ‘Musihangaike kamwe juu ya kesho, kwa maana kesho itakuwa na mahangaiko yake yenyewe. Unatosha kila siku ubaya wake.’​—Mathayo 6:34.

Lakini namna gani ikiwa hali yako haiwezi kubadilika? Kwa mufano, wazia kwamba una ugonjwa usiopona. Ao namna gani ikiwa unavunjika moyo kwa sababu ya hali yenye hauwezi kurudisha nyuma, kwa mufano kuvunjika kwa ndoa ao kifo cha mutu unayemupenda?

Hata katika hali kama hizo, kuna jambo fulani unaloweza kubadilisha: namna yako ya kuona hali hiyo. Kwa kujifunza kukubali jambo lenye hauwezi kubadilisha, utakuwa na uwezo zaidi wa kuona mambo kwa njia inayofaa zaidi. (Methali 15:15) Itakuwa pia vyepesi kwako kutafuta namna za kuvumilia hali hiyo kuliko kutafuta kujiua ili kuimaliza. Hilo litakusaidia namna gani? Hata ikiwa hauna uwezo wa kumaliza hali fulani inayoonekana kuwa ngumu sana, unaweza kuanza kuiona kwa njia inayofaa.​—Ayubu 2:10.

UKUMBUKE JAMBO HILI: Hauwezi kupanda mulima katika hatua moja tu; lakini unaweza kuupanda polepole. Ni hivyo pia kuhusu matatizo mengi unayopambana nayo, hata ikiwa yanaweza kuonekana kama mulima.

JAMBO UNALOWEZA KUFANYA SASA: Zungumuza na mutu fulani juu ya hali yako, labda rafiki ao mutu wa familia yako. Mutu huyo anaweza kukusaidia uone hali yako kwa njia inayofaa zaidi.​—Methali 11:14.