Kujitayarisha kimbele huleta furaha

¹ Kushiriki katika huduma ya shambani hutuletea furaha kubwa. (Zab. 89:15, 16) Bila shaka, kujitayarisha ndio ufunguo ili kuweza kupata furaha hiyo kikamili. Ikiwa tunajitayarisha vizuri, tutatimiza mambo mengi zaidi, na ikiwa tunatimiza mambo mengi zaidi, tutapata furaha kubwa zaidi.

² Tumieni vifaa vinavyoandaliwa: Anzeni kujitayarisha kwa kusoma na kufikiria habari katika Huduma Yetu ya Ufalme. Hiyo mara nyingi huandaa utoaji mbalimbali uliofikiriwa vizuri ambao umetayarishwa ili kuwasaidia mtoe ujumbe wa Ufalme kwa urahisi na kwa matokeo. Mtapata vielelezo vya jinsi mnavyoweza kushinda vipingamizi vya kawaida. Mawazo ya pekee hutolewa kuhusu jinsi ya kufanya ziara ya kurudia yenye matokeo, huku mkiwa na mradi wa kuanzisha funzo la Biblia. Mnao uhuru wa kupatanisha madokezo hayo na hali ili muwe wenye kujisikia vizuri mnapoyatumia. Zaidi ya hayo, mnacho kitabu Kutoa Sababu, kinachoandaa utangulizi mbalimbali na majibu kwa vizuia-mazungumzo, kikiwasaidia hivyo kuwa wenye matokeo zaidi katika hali nyingi mnazokutana nazo.

³ Chunguzeni kichapo mtakachokuwa mkitolea watu, na mchague nukta moja au mbili zenye kupendeza zinazovuta uangalifu ambazo mnaweza kuonyesha kwa mwenye-nyumba. Habari yenye kuchochea kufikiri ambayo mmesikia au kuisoma ingeweza kuwatolea njia ya kuanzisha mazungumzo. Fikirieni kimbele vipingamizi vya kawaida ambavyo huenda mgekutana navyo, na mchukue mawazo machache akilini kuhusu jinsi mngeweza kujibu. Kisha chukueni dakika chache ili kujizoeza yale mtakayoyasema kwenye mlango.

⁴ Hudhurieni kila mkutano wa utumishi: Muda wa Mkutano wa Utumishi, sikilizeni kwa makini wakati madokezo yaliyotolewa katika Huduma Yetu ya Ufalme yanapozungumziwa, wakati yanaporudiliwa, na wakati yanapofanyiwa maonyesho. Andikeni mawazo ambayo mnahisi mngeweza kuingiza katika utoaji wenu. Kumbukeni baadhi ya hali za kawaida ambazo mlikutana nazo katika huduma, na mfikirie njia ambazo katika hizo mngeweza kutoa ushahidi kwa matokeo zaidi. Zungumzieni mambo hayo pamoja na wahubiri wengine kabla na baada ya mkutano.

⁵ Mnaweza kuwa hakika kwamba ikiwa nyinyi ‘mnajitayarisha kwa kila kazi njema,’ thawabu yenu itakuwa furaha kubwa zaidi na matokeo makubwa zaidi katika kusaidia wengine wapate njia iongozayo kwenye uhai.—2 Tim. 2:21.