Je, Unatimiza Fungu
Lako Ili Ripoti Sahihi Itolewe?
1 Masimulizi mengi ya Biblia yanatia ndani hesabu kamili; jambo hilo linasaidia kutoa picha iliyo wazi ya yale yaliyotukia. Kwa mfano, Gideoni alishinda kambi ya Wamidiani akiwa na wanaume 300 tu. (Amu. 7:7) Malaika wa Yehova aliua askari Waashuru 185,000. (2 Fal. 19:35) Kwenye Pentekoste 33 W.K., watu karibu 3,000 walibatizwa, na muda mfupi baadaye hesabu ya waamini ikaongezeka kufikia watu 5,000 hivi. (Mdo. 2:41; 4:4) Ni wazi kutoka masimulizi hayo kwamba watumishi wa kale wa Mungu walifanya jitihada nyingi ili kukusanya maandishi kamili na yaliyo sahihi.
2 Leo, tengenezo la Yehova linatuagiza turipoti utendaji wetu katika utumishi wa shambani kila mwezi. Kushirikiana kwetu kwa uaminifu na mpango huo kunafanya usimamizi wenye matokeo wa kazi ya kuhubiri uwezekane. Ripoti zinaweza kufunua kwamba sehemu fulani ya huduma inahitaji uangalifu au kwamba wafanyakazi zaidi wanahitajiwa katika sehemu fulani ya shamba. Katika kutaniko, ripoti za utumishi wa shambani zinasaidia wazee watambue wale walio na uwezo wa kupanua huduma yao, na pia wale ambao huenda wakahitaji msaada. Na ripoti kuhusu maendeleo ya kazi ya kuhubiri Ufalme hutoa kitia-moyo kwa undugu mzima wa Kikristo. Je, unatimiza fungu lako ili kufanya ripoti sahihi itolewe?
3 Daraka Lako Binafsi: Mwishoni mwa mwezi, je, unaona kuwa jambo gumu kukumbuka yale uliyofanya katika huduma? Ikiwa ndivyo, kwa nini usiandike utendaji wako kila wakati unaposhiriki katika utumishi wa shambani? Watu fulani hutumia kalenda au kitabu cha kumbukumbu za matukio ya kila siku. Wengine huchukua karatasi ya ripoti ya utumishi wa shambani iliyo wazi. Mwishoni mwa mwezi, toa bila kukawia ripoti yako kwa mwangalizi wako wa funzo la kitabu. Au, ukipenda, unaweza kutia ripoti yako katika kisanduku cha ripoti kwenye Jumba la Ufalme. Ikiwa unasahau kutoa ripoti yako, mwone mwangalizi wako wa funzo la kitabu bila kukawia badala ya kungoja yeye aje kukuona. Kuripoti utendaji wako kwa kudhamiria kunaonyesha heshima kwa mpango wa Yehova na ufikirio wenye upendo kwa ndugu waliopewa mgawo wa kukusanya ripoti.—Luka 16:10.
4 Daraka la Mwangalizi wa Funzo la Kitabu: Akiwa mchungaji aliye macho na mwangalifu, mwangalizi wa funzo la kitabu anapendezwa na utendaji wa kikundi tangu mwanzo mpaka mwisho wa mwezi. (Mez. 27:23) Anajua ikiwa kila mhubiri anashiriki vya kutosha, kwa ukawaida, na kwa furaha, naye anatoa msaada kwa uharaka ikiwa kuna yeyote ambaye hakushiriki muda wa mwezi mzima. Mara nyingi, neno lenye kutia moyo, pendekezo lenye kutumika, au mwaliko wa kuandamana naye katika utumishi wa shambani unatosha.
5 Mwishoni mwa mwezi, mwangalizi wa funzo la kitabu anahakikisha kwamba wote katika kikundi wametimiza daraka lao la kuripoti utendaji wao ili mwandishi aweze kutoa ripoti ya kutaniko iliyo sahihi kwa ofisi ya tawi kabla ya tarehe sita za mwezi unaofuata. Mwisho wa mwezi unapokaribia, linaweza kuwa jambo lenye kusaidia ikiwa anakumbusha kikundi na kufanya karatasi za ripoti zipatikane mahali wanapofanyia funzo la kitabu. Ikiwa kuna wale wanaosahau kuripoti utendaji wao, anaweza kutoa kitia-moyo na vikumbusha vinavyofaa.
6 Kutoa ripoti zetu za utumishi wa shambani bila kukawia kunafanya iwezekane kutoa ripoti inayoonyesha kwa usahihi yale yaliyotimizwa shambani. Je, utatimiza fungu lako kwa kuripoti utendaji wako bila kukawia kila mwezi?