Je, Familia Yako Inajitayarisha kwa Ajili ya Wokovu?

¹ Kutimia kwa unabii wa Biblia kunatusadikisha kabisa kwamba mwisho wa ulimwengu huu mwovu unakaribia sana. Tunaishi sasa nyakati za hatari zenye kufanana sana na zile zilizokuwapo mbele ya Garika. (Mt. 24:37-39) Noa aliokoka uharibifu wa ulimwengu huo wa zamani kwa kuwa “alitembea pamoja na Mungu wa kweli.” (Mwa. 6:9) Ni wazi kwamba Noa alifundisha washiriki wa familia yake njia za Yehova kwa kuwa wao pia waliokoka garika. Namna gani tunaweza kumwiga Noa na kutayarisha washiriki wa familia yetu ili kuokoka mwisho wa ulimwengu huu mwovu?

² Mhubiri wa Uadilifu: Noa alivumilia kwa muda wa miaka 40 ao 50 hivi, akiwa “mhubiri wa uadilifu.” (2 Pet. 2:5) Ni wazi kwamba majirani wake, iwe walichochewa na malaika waovu waliovaa mwili wa kibinadamu ao hapana, walimchekelea alipowahubiri. Katika kazi yetu ya kuhubiri, mara nyingi tunakutana na watu wasiopendezwa na wenye kutuchekelea, jambo linaloonyesha kwamba ulimwengu huu unakaribia mwisho wake. (2 Pet. 3:3, 4) Hata hivyo, tofauti na watu wa siku za Noa, wengi wanakubali ujumbe wetu tunapojikaza kuwahubiria na ‘wanamiminika’ kwenye ibada ya Yehova. (Isa. 2:2) Ikiwa tu tunaendelea kuvumilia tutajiokoa ‘sisi wenyewe na wale wanaotusikiliza’. (1 Tim. 4:16) Ni jambo la maana sana wazazi wafundishe watoto wao kuhusu uharaka wa kazi ya kuhubiri kupitia maneno na kupitia mfano wao.—2 Tim. 4:2.

³ Alifanya “Vivyo Hivyo”: Noa na familia yake waliokoka kwa kuwa walifuata kwa uangalifu maagizo ya Yehova. (Mwa. 6:22) Leo, ni jambo la lazima sisi pia tuwe “tayari kutii” mwongozo wa Biblia na wa mtumwa mwaminifu. (Yak. 3:17) Watoto wakubwa katika familia moja wanakumbuka jinsi baba yao alivyotumia maagizo yanayotolewa na tengenezo la Yehova. Kwa mfano, aliongoza funzo la familia kila juma na alihubiri pamoja na familia yake kila Siku ya Posho na Siku ya Yenga, kama inavyopendekezwa. Alijikaza kuhubiri na mtoto mmoja kila juma. Ushikamanifu wake katika kufanya “vivyo hivyo” uligusa mioyo ya watoto wake, na wote sita wakawa watumishi waaminifu wa Yehova.

⁴ Mwisho wa ulimwengu huu utakuja bila kutazamia. (Luka 12:40) Tukimwiga Noa na kuwa na imani kwa ajili ya wokovu, sisi na familia zetu tutakuwa tayari kabisa!—Ebr. 11:7.