Namna Rangi Inavyoweza Kukuchochea

Unapoangalia mambo yanayokuzunguka, macho yako na ubongo wako vinatumika pamoja ili kupata habari. Unaona tunda karibu yako na unaamua ikiwa unapenda kulikula ao hapana. Unaangalia angani na unasema kwamba mvua haitanyesha. Unaona maneno haya ambayo unasoma sasa na unaelewa maana yake. Kwa kweli, rangi inakusaidia. Je, ni kweli rangi inakusaidia?

Rangi ya tunda unaloona inakusaidia kujua ikiwa ni tunda lenye kukomaa na lenye kupendeza. Rangi ya anga na mawingu inakusaidia kujua hali ya hewa. Unaposoma maneno ya habari hii, macho yako yanakusaidia kutofautisha rangi ya maandishi na rangi ya karatasi. Kwa kweli, labda bila kujua, unatumia rangi mara nyingi ili kukusaidia kujua habari juu ya mambo yanayokuzunguka. Lakini rangi inaweza pia kukugusa moyo na kukuchochea kufanya jambo fulani.

NAMNA RANGI INAVYOWEZA KUMUGUSA MUTU MOYO

Unapotembea ndani ya duka ao katika soko, unazungukwa na vitu ambavyo vinakusudiwa kuvutia macho yako. Iwe unatambua jambo hilo ao hapana, watu wanaofanya matangazo ya biashara wanachagua kwa uangalifu rangi na muchanganyiko wa rangi ili rangi hizo zipatane na tamaa yako, na hali yako, ni kusema, ikiwa wewe ni mwanaume ao mwanamuke, na pia zipatane na miaka yako. Watu wanaopamba nyumba, watu wanaotengeneza nguo, na wachoraji wa picha wanajua pia kwamba rangi zinaweza kumugusa mutu moyo na kumuchochea kufanya jambo fulani.

Watu wanaweza kueleza maana ya rangi kwa njia mbalimbali kwa sababu ya desturi na asili za watu wa mahali fulani. Kwa mufano, watu fulani huko Asia wanahusianisha rangi nyekundu na mambo mazuri na sikukuu, lakini katika sehemu fulani za Afrika, rangi nyekundu ni rangi ya kilio. Hata hivyo, ijapokuwa malezi yao, wanadamu wanaguswa moyo na kuchochewa na rangi fulani kwa namna moja. Tuzungumuzie basi rangi tatu na namna zinaweza kuwa na matokeo juu yako.

RANGI NYEKUNDU ni rangi inayoonekana waziwazi sana. Mara nyingi rangi nyekundu imehusianishwa na nguvu, vita, na hatari. Ni rangi yenye kugusa moyo sana na inaweza kuongeza uwezo wa mwili wa kuyeyusha chakula, kuongeza nguvu ya kupumua, na inaweza kupandisha nguvu inayosukuma damu katika mwili.

Katika Biblia, neno la Kiebrania linalotafsiriwa “nyekundu” linatokana na neno ambalo linamaanisha “damu.” Biblia inatumia rangi nyekundu nyangavu, ao nyekundu sana, ili kueleza picha ya pekee sana ya kahaba muuaji anayevaa nguo za rangi ya zambarau na nyekundu anayepanda juu ya ‘munyama​-mwitu mwenye rangi nyekundu aliyejaa majina ya makufuru.’​—Ufunuo 17:1-6.

RANGI YA KIJANI KIBICHI inafanya mutu atende tofauti na namna anavyoweza kutenda wakati anaona rangi nyekundu, kwa sababu inapunguza uwezo wa mwili wa kuyeyusha chakula, na inamutuliza mutu. Rangi ya kijani kibichi ni rangi yenye kutuliza na mara nyingi inahusianishwa na utulivu. Tunajisikia wenye kutulia wakati tunaona bustani na milima za kijani kibichi. Habari juu ya uumbaji inayozungumuziwa katika kitabu cha Biblia cha Mwanzo inasema kwamba Mungu aliumba majani mabichi na mimea kwa ajili ya wanadamu.​—Mwanzo 1:11, 12, 30.

RANGI NYEUPE mara nyingi inahusianishwa na nuru, usalama, na usafi. Pia inahusianishwa na sifa ya wema, kutokuwa na kosa, na kutakata. Rangi nyeupe ndiyo inayotajwa mara nyingi katika Biblia. Katika maono, wanadamu na malaika wanaonyeshwa wakiwa wenye kuvaa nguo nyeupe ili kukazia haki na usafi wa kiroho. (Yohana 20:12; Ufunuo 3:4; 7:9, 13, 14) Farasi weupe pamoja na wapandaji wao wenye kuvaa kitani bora cheupe wanafananisha vita ya haki. (Ufunuo 19:14) Mungu anatumia rangi nyeupe ili kukazia kwamba yuko tayari kusamehe zambi: ‘Hata zambi zenu zikiwa nyekundu, zitafanywa kuwa nyeupe kama teluji.’​—Isaya 1:18.

RANGI INASAIDIA MUTU KUKUMBUKA MAMBO FULANI

Kwa kuwa Biblia inatumia rangi, hilo linaonyesha kwamba Mungu anaelewa kuwa rangi zinaweza kumugusa mutu moyo na kumuchochea kufanya jambo fulani. Kwa mufano, kitabu cha Biblia cha Ufunuo kinatabiri hali za ulimwengu ambazo wanadamu wanapambana nazo leo, kutia ndani vita, njaa, na kifo kisicho cha kawaida ambacho kinatokana na upungufu wa chakula na magonjwa. Ili kutusaidia kukumbuka mambo hayo, onyo lisilo la kawaida linatuonyesha watu wenye kupanda farasi ambao si wa kawaida na wenye rangi mbalimbali.

Kwanza, kuna farasi mwenye rangi nyeupe​-safi, ambaye anafananisha vita ya haki ya Kristo Yesu. Kisha, tunaona farasi mwenye rangi ya moto, ambaye anafananisha vita kati ya mataifa. Farasi huyo anafuatwa na farasi mweusi mwenye kuogopesha, ambaye anafananisha njaa. Kisha tunaona “farasi wa rangi ya kijivu; na yeye anayeketi juu yake alikuwa na jina Kifo.” (Ufunuo 6:1-8) Rangi ya kila farasi inaweza kutugusa moyo na kutokeza hali fulani ndani yetu inayolingana na kile ambacho farasi huyo anafananisha. Tunaweza kukumbuka kwa vyepesi farasi hao wenye rangi mbalimbali na kile ambacho wanatufundisha kuhusu siku zetu.

Biblia inatumia mifano mingi ya rangi inayoeleza mambo ambayo hatuwezi kusahau kwa vyepesi. Kwa kweli, Muumbaji wa nuru, rangi, na macho ya mwanadamu anatumia kwa ufundi rangi kuwa chombo cha kufundisha wasomaji mifano ambayo inaeleweka na ambayo hawawezi kusahau. Rangi inatusaidia kukusanya na kujua habari fulani. Rangi inatugusa moyo. Rangi inaweza kutusaidia kukumbuka mawazo ya maana. Rangi ni zawadi yenye upendo ambayo Muumbaji wetu alitupatia ili kutusaidia tufurahie maisha.