பைபிள் எப்படிப்பட்ட புத்தகம்?

கடவுளுடைய வார்த்தை என்ன சொல்கிறது?

“வேதவசனங்கள் எல்லாம் கடவுளுடைய சக்தியின் தூண்டுதலால் கொடுக்கப்பட்டிருக்கின்றன.”—2 தீமோத்தேயு 3:16, புதிய உலக மொழிபெயர்ப்பு.

இதைத் தெரிந்துகொள்வதால் உங்களுக்கு என்ன நன்மை?

வாழ்க்கையின் மிக முக்கியமான கேள்விகளுக்குத் திருப்தியான பதில் கிடைக்கும்.—நீதிமொழிகள் 2:1-5.

அன்றாட வாழ்க்கைக்கு நம்பகமான ஆலோசனை கிடைக்கும்.—சங்கீதம் 119:105.

எதிர்காலம் பிரகாசமாக இருக்குமென்ற நம்பிக்கை கிடைக்கும்.—ரோமர் 15:4.

கடவுளுடைய வார்த்தை சொல்வதை நம்பலாமா?

நிச்சயம் நம்பலாம். மூன்று காரணங்களுக்காக:

• முரண்பாடில்லாத புத்தகம். சுமார் 1,600 வருட காலப்பகுதியில் ஏறக்குறைய 40 மனிதர்கள் பைபிளை எழுதினார்கள். அவர்களில் நிறைய பேர் ஒருவரை ஒருவர் பார்த்ததே இல்லை. என்றாலும், பைபிள் புத்தகங்கள் ஒன்றோடொன்று ஒத்துப்போகின்றன; ஒரே கருத்தை மையமாக வைத்து முழு பைபிளும் எழுதப்பட்டிருக்கிறது!

• நேர்மையான எழுத்தாளர்கள். உலகச் சரித்திராசிரியர்கள் தங்கள் நாட்டு மக்களின் தோல்விகளைக் குறிப்பிடாமல் மறைத்துவிடுவார்கள். ஆனால், பைபிள் எழுத்தாளர்கள் தாங்கள் செய்த தவறுகளையும் தங்கள் நாட்டு மக்கள் செய்த தவறுகளையும் மறைக்காமல் பதிவு செய்திருக்கிறார்கள்.—2 நாளாகமம் 36:15, 16; சங்கீதம் 51:1-4.

• நம்பகமான தீர்க்கதரிசனங்கள். பூர்வ பாபிலோன் நகரத்தின் அழிவைப் பற்றி சுமார் 200 வருடங்களுக்கு முன்பே பைபிள் முன்னறிவித்தது. (ஏசாயா 13:17-22) பாபிலோன் எந்த விதத்தில் கைப்பற்றப்படும் என்று மட்டுமல்ல, அதை யார் கைப்பற்றுவார் என்றும்கூட சொன்னது! —ஏசாயா 45:1-3.

  பைபிளில் இன்னும் ஏராளமான தீர்க்கதரிசனங்கள் இருக்கின்றன. அதில் சொல்லப்பட்ட நுணுக்கமான விவரங்கள்கூட நிறைவேறின. கடவுள் கொடுத்த புத்தகம் இப்படித் துல்லியமாக இருக்க வேண்டும் என்றுதானே நாம் எதிர்பார்ப்போம்?—2 பேதுரு 1:21.