நினைவுநாள் ஆசரிப்பு நினைப்பூட்டுதல்கள்

நினைவுநாள் ஆசரிப்பு சம்பந்தமாகப் பின்வரும் காரியங்களுக்கு மூப்பர்கள் கவனம் செலுத்த வேண்டும்:

◼ சூரிய அஸ்தமனத்திற்கு முன்பு சின்னங்கள் பரிமாறப்பட்டுவிடாதபடி நிச்சயப்படுத்திக் கொள்ள வேண்டும்.

◼ தகுந்த அப்பத்தையும் திராட்சை ரசத்தையும் தயாராய் வைக்க வேண்டும்.​—⁠பிப்ரவரி 15, 2003, காவற்கோபுரம், பக். 13-15-ஐக் காண்க.

◼ தட்டுகள், திராட்சை ரசக் கோப்பைகள், பொருத்தமான மேஜை, மேஜைவிரிப்பு ஆகியவற்றை முன்னதாகவே மன்றத்திற்குக் கொண்டுவந்து அவற்றுக்குரிய இடத்தில் வைக்க வேண்டும்.

◼ ராஜ்ய மன்றத்தை அல்லது கூட்டம் நடக்கவிருக்கிற இடத்தை முன்னதாகவே நன்கு சுத்தம் செய்ய வேண்டும்.

◼ அட்டண்டன்ட்டுகளையும் பரிமாறுபவர்களையும் தேர்ந்தெடுத்து, அவரவருடைய பொறுப்புகளையும் அதைச் செய்ய வேண்டிய சரியான முறையையும் கண்ணியமான உடை மற்றும் தோற்றத்தின் அவசியத்தையும் பற்றி முன்னதாகவே அவர்களிடம் சொல்லிவைக்க வேண்டும்.

◼ அபிஷேகம் செய்யப்பட்டவர்களில் யாராவது வியாதியாக அல்லது ஆஜராக முடியாமல் இருந்தால் அவருக்கும் சின்னங்களைப் பரிமாற ஏற்பாடுகள் செய்ய வேண்டும்.

◼ ஒரே ராஜ்ய மன்றத்தை ஒன்றுக்கும் மேற்பட்ட சபைகள் உபயோகிக்கத் திட்டமிட்டிருந்தால் அவை ஒருங்கிணைந்து செயல்படுவது அவசியம். அப்போதுதான் மன்றத்தின் வாசலிலோ, வராண்டாவிலோ, நடைபாதையிலோ, வாகனங்கள் நிறுத்துமிடங்களிலோ தேவையில்லாமல் நெரிசல் ஏற்படுவதைத் தவிர்க்க முடியும்.

◼ வேறொரு மன்றத்தில் இக்கூட்டத்தை நடத்தினால், அங்கே தகுந்த ஒலி அமைப்புக்கான ஏற்பாடுகளைச் செய்யுங்கள்; அப்போதுதான் பேச்சைக் கேட்க வந்திருப்பவர்களால் பேச்சாளர் சொல்வதை நன்கு கேட்க முடியும்.