விசுவாசத்துக்காக சிறைவாசம்—கிரிமியா

ரஷ்ய அதிகாரிகள் யெகோவாவின் சாட்சிகள்மேல் நடத்திவரும் கொடூரமான தாக்குதல்கள் இப்போது கிரிமியாவிலும் தொடங்கிவிட்டன. ரஷ்ய அரசாங்கம் சாட்சிகளுடைய சட்டப்பூர்வ நிறுவனங்களைத் தடை செய்திருக்கிறது. அதுமட்டுமல்ல, அவர்களுடைய கடவுளை அவர்கள் அமைதியாக வணங்குவதைத் தடுத்து நிறுத்துவதில் குறியாக இருக்கிறது. ஏப்ரல் 2017 தடையுத்தரவுக்குப் பிறகு, சாட்சிகள் எங்கெல்லாம் ஒன்றுகூடி வந்தார்களோ அங்கெல்லாம் ரஷ்ய அதிகாரிகள் நிறைய சோதனைகளை நடத்தியிருக்கிறார்கள். அதனால், ரஷ்யா முழுவதும் நிறைய சாட்சிகள் கைது செய்யப்பட்டு சிறையில் அடைக்கப்பட்டிருக்கிறார்கள். இப்போது கிரிமியாவில் இருக்கும் யெகோவாவின் சாட்சிகளுக்கும் அதே விதமான கடுமையான தாக்குதல் ஆரம்பித்துவிட்டது.

நவம்பர் 15, 2018-ல், கிரிமியாவிலேயே முதல் தடவையாக பெரிய அளவிலான சோதனைகள் டிசான்காயில் நடத்தப்பட்டன. கிட்டத்தட்ட 200 போலீசாரும் சிறப்புப் படை அதிகாரிகளும் எட்டு வீடுகளைச் சோதனை செய்தார்கள். அங்கே சாட்சிகள் பைபிளைப் படிக்கவும் அதைப் பற்றிக் கலந்துபேசவும் சிறு தொகுதிகளாக ஒன்றுகூடி வருவது வழக்கம். ஆறு சாட்சிகள் ஒன்றுகூடி வந்த செர்கே ஃபிலடோவ் என்பவரின் வீட்டுக்குள் கிட்டத்தட்ட 35 அதிகாரிகள் ஆயுதங்களோடும் முகமூடியோடும் அத்துமீறி நுழைந்து பயங்கரமாகத் தாக்கினார்கள். அங்கிருந்த சாட்சிகள் அதைப் பார்த்து மிரண்டுபோய்விட்டார்கள். அங்கிருந்த 78 வயதான ஒருவரை சுவரோடு சுவராக மோதி தரையில் தள்ளிவிட்டார்கள். பிறகு, அவருடைய கைகளில் விலங்குகளை மாட்டி, அவரைப் பயங்கரமாக அடித்தார்கள். அதனால் அவரை அவசரமாக ஆஸ்பத்திரிக்குத் தூக்கிக்கொண்டு போக வேண்டியதாகிவிட்டது. அங்கு நடந்ததைப் பார்த்து பீதியடைந்த வயதான இரண்டு ஆண்களுக்கு இரத்த அழுத்தம் ரொம்பவே அதிகமாகிவிட்டதால் அவர்களையும் அவசரமாக ஆஸ்பத்திரிக்குத் தூக்கிக்கொண்டு போக வேண்டியதாகிவிட்டது. இன்னொரு வருத்தமான விஷயம் என்னவென்றால், ஒரு இளம் பெண்ணின் வீட்டில் சோதனை நடத்தப்பட்டபோது அவருக்குக் கருச்சிதைவு ஆகிவிட்டது.

அந்தச் சோதனைக்குப் பிறகு, ரஷ்ய குற்றவியல் சட்டப் பிரிவு 282.2(1)-ன் அடிப்படையில், ஒரு “தீவிரவாத அமைப்பின்” செயல்களை ஏற்பாடு செய்ததாகச் சொல்லி செர்கியை குற்றம்சாட்டினார்கள். மார்ச் 5, 2020 அன்று, குற்றவாளிகளுக்கென்று ஒதுக்கப்பட்ட முகாமில் செர்கி ஆறு வருஷங்கள் இருக்க வேண்டுமென்று கிரிமியாவின் மாவட்ட நீதிமன்றம் தீர்ப்பு அளித்தது. அந்தத் தீர்ப்பு அளிக்கப்பட்டதுமே அவரை முகாமுக்குக் கூட்டிக்கொண்டு போய்விட்டார்கள்.

டிசான்காயில் 2018-ல் நடத்தப்பட்ட சோதனைக்கு பின்பு, சிறப்புப் படை அதிகாரிகள் தீவிரவாத செயல்களில் ஈடுபடுவதாக சந்தேகித்து சாட்சிகளுடைய வீடுகளில் அத்துமீறி நுழைந்து சோதனை செய்வது தொடர்கிறது. இப்படிப்பட்ட ஒரு சம்பவம் சமீபத்தில், ஆகஸ்ட் 7, 2024-ல் நடந்தது. அன்று முகமூடி அணிந்த ஆயுதமேந்திய பல போலீஸ் அதிகாரிகள் ஐந்து சாட்சிகளின் வீடுகளில் சோதனை நடத்தினார்கள். இதில் ரஸ்டோல்னோய் கிராமத்தைச் சேர்ந்த 68 வயதான தமரா பிராட்சேவாவின் வீடும் ஒன்று. தீவிரவாத அமைப்பின் நடவடிக்கைகளை ஒழுங்கமைத்ததாக குற்றம் சாட்டப்பட்டு தமரா தற்போது விசாரணையில் உள்ளார். அக்டோபர் 2024-ல், யூரி கெராஷ்சென்கோ மற்றும் செர்கி பார்ஃபெனோவிச் என்ற இரண்டு சாட்சிகளுக்கு ஆறு ஆண்டுகள் சிறையிருப்பு காலனிக்கு செல்லும் தண்டனை விதிக்கப்பட்டது. இதற்கு முன்பு அவர்களுக்கு இடைநிறுத்தப்பட்ட தண்டனைகள் வழங்கப்பட்டிருந்தன. ஆனால் அரசாங்க வக்கீல் கடுமையான தண்டனை வழங்க சொல்லி வலியுறுத்தினார். நீதிமன்றம் அதை ஏற்று தண்டனை வழங்கியது. உடனடியாக அவர்கள் நீதிமன்ற அறையிலேயே கைது செய்யப்பட்டு பின்னர் சிறையில் அடைக்கப்பட்டனர். இப்படி, வீடுகளைச் சோதனை செய்து, விசாரணை செய்து, குற்றவாளிகள் என்று தீர்ப்பளித்ததால் 14 சாட்சிகள் (ஆண்கள்) ஆறரை வருஷங்கள் வரை சிறை தண்டனை அனுபவித்து வருகிறார்கள். இவர்கள் எல்லாரும் தீவிரவாத அமைப்பின் செயல்களை ஆதரித்ததாக குற்றம்சாட்டப்பட்டிருக்கிறார்கள்.

மத நம்பிக்கையின் காரணமாக சிறையில் அடைக்கப்பட்டவர்

யூரி கெரஷ்சென்கோ

யூரி கெரஷ்சென்கோ 1979-ல் உக்ரைனின் லுட்ஸ்க் நகரில் பிறந்தார். அவருடைய அம்மாதான் தனியாக அவரை வளர்த்தார். அவருக்கு நான்கு வயது இருந்தபோது, குடும்பமாக கிரிமியாவுக்கு குடிமாறினார்கள். சிறுவயதில், யூரிக்கு கால்பந்து, ஹாக்கி மற்றும் ஜிம்னாஸ்டிக்ஸில் ஈடுபாடு அதிகம். அவர் கைது செய்யப்படும் வரை, மின் பொறியாளராக வேலை செய்தார்.

தந்தை இல்லாமல் வளர்ந்த யூரிக்கு, யெகோவா தன் தந்தை மற்றும் பாதுகாவலர் என்பதை பைபிளிலிருந்து அறிந்தது மனதை தொட்டது. மேலும், பைபிள் சொன்ன தீர்க்கதரிசனம் துல்லியமாக நிறைவேறுவதை பார்த்தபோது, அது நம்பகமான வழிகாட்டி என்று உறுதியாக நம்பினார். அவர் 2000-ல் ஞானஸ்நானம் எடுத்து யெகோவாவின் சாட்சியாக ஆனார்.

2002-ல் யூரி, யெகோவாவின் சாட்சியான இரினாவை திருமணம் செய்தார். அவர்கள் இயற்கையை ரசிப்பதிலும் கிரிமியா தீபகற்பத்தின் புதிய இடங்களை சுற்றிப்பார்ப்பதிலும் ஆர்வம் கொண்டவர்கள்.

யூரியின் குற்றவியல் வழக்கு மற்றும் சிறையிருப்பு அவர்களுடைய வாழ்க்கையை கடுமையாக பாதித்திருக்கிறது, பல சிரமங்களை ஏற்படுத்தியிருக்கிறது. ஆனாலும், அவர்கள் நம்பிக்கையான மனநிலையோடு இருக்க முயற்சி செய்கிறார்கள். தனது மத நடவடிக்கைகளுக்காக யூரி சிறையில் இருப்பதை நண்பர்கள், அக்கம்பக்கத்தார் மற்றும் கூட வேலை செய்பவர்களால் புரிந்துகொள்ள முடியவில்லை. ஏனென்றால், அவர்கள் அவரை நல்ல, இரக்கமுள்ள மற்றும் அமைதியான மனிதராக தெரிந்துவைத்திருக்கிறார்கள். அவர் டிசம்பர் 2029-ல் சிறையிலிருந்து விடுவிக்கப்படுவார்.

காலவரிசை

மே 19, 2025

கிரிமியாவில் இப்போது பதினான்கு யெகோவாவின் சாட்சிகள் சிறையில் இருக்கிறார்கள்.
அக்டோபர் 3, 2023

யூரி கெராஷ்சென்கோ மற்றும் செர்கி பார்ஃபெனோவிச் என்ற இரண்டு சாட்சிகளுக்கு ஆறு ஆண்டுகள் சிறையிருப்பு காலனிக்கு தண்டனை விதிக்கப்பட்டது.
ஆகஸ்ட் 7, 2024

அலுஷ்டா, ரஸ்டோல்னோய் மற்றும் செனோகோஸ்னோய் போன்ற இடங்களில் காவல்துறை அதிகாரிகள் ஐந்து யெகோவாவின் சாட்சிகளின் வீட்டில் சோதனை நடத்தினார்கள். தமரா பிராட்சேவா மீது கிரிமினல் வழக்கு போடப்பட்டது.
ஆகஸ்ட் 5, 2021

எட்டு யெகோவாவின் சாட்சிகளின் வீடுகளில் சோதனை நடத்தப்பட்டது. அலெக்ஸாண்டர் டூபோவென்கோவும், அலெக்ஸாண்டர் லிட்வின்யுக்கும் கைது செய்யப்பட்டார்கள்.
அக்டோபர் 1, 2020

செவாஸ்டோபோலில் ஒன்பது வீடுகளில் சோதனை நடத்தப்பட்டது. ஐகோர் ஷ்மிட் கைது செய்யப்பட்டு, விசாரணைக்குமுன் காவலில் வைக்கப்பட்டார்.
ஜூன் 4, 2019

சிறப்புப் படை அதிகாரிகள் செவாஸ்டோபோலில் இருக்கும் பத்து யெகோவாவின் சாட்சிகளுடைய வீடுகளில் சோதனை நடத்தினார்கள். அந்த சோதனைக்குப் பிறகு, விக்டர் ஸ்டாஷெவ்ஸ்கி தீவிரவாத செயல்களை ஏற்பாடு செய்ததாகக் குற்றம்சாட்டப்பட்டார்.
மார்ச் 20, 2019

சிறப்புப் படை அதிகாரிகள் அலுப்கா, யால்டா ஆகிய நகரங்களில் இருந்த எட்டு சாட்சிகளுடைய வீடுகளைச் சோதனை செய்தார்கள். அதோடு, ஆர்ட்டம் கெரசிமோவை விசாரணை செய்து, தீவிரவாத செயல்களை ஏற்பாடு செய்ததாகச் சொல்லி குற்றம்சாட்டினார்கள்.
நவம்பர் 15, 2018

கிட்டத்தட்ட 200 போலீசாரும் சிறப்புப் படை அதிகாரிகளும் டிசான்காயில் இருந்த எட்டு வீடுகளைச் சோதனை செய்தார்கள். செர்கி ஃபிலடோவின் வீட்டையும் சோதனை செய்தார்கள்.