பைபிள் தரும் பதில்கள்

நாம ஏன் இயேசுவின் மரணத்தை நினைச்சு பார்க்கணும்?

மனுஷனை எந்த குறையும் இல்லாம கடவுள் படைச்சார்; வியாதியும் மரணமும் இல்லாத வாழ்க்கையை கொடுத்தார். (ஆதியாகமம் 1:31) ஆனா, முதல் மனுஷன் ஆதாம், பாவம் செஞ்சதுனால நாம எல்லாருமே பாவிகளாயிட்டோம், அதனால கஷ்டப்படுறோம். இயேசு நமக்காக உயிரை கொடுத்ததுனாலதான் நமக்கு பாவத்தில இருந்தும் மரணத்தில இருந்தும் விடுதலை கிடைக்கப்போகுது. கடவுள் ஆசைப்பட்ட மாதிரியே நாம சந்தோஷமா வாழப்போறோம். அதனால, இயேசுவுடைய மரண நாளை நாம நினைச்சு பார்க்கணும்; அது ரொம்ப முக்கியமான நாள்.—மத்தேயு 20:28; ரோமர் 6:23-ஐ வாசிங்க.

கடவுள் நம்ம மேல ரொம்ப அன்பு வெச்சிருக்கிறார். அதனாலதான் அவருடைய மகனையே நமக்காக கொடுத்தார். (1 யோவான் 4:9, 10) இயேசு, தன்னோட மரணநாளை நினைச்சு பார்க்கணும்னு சீடர்கள்கிட்ட சொன்னார். அந்த நாள்ல, ரொட்டியையும் திராட்சமதுவையும் பயன்படுத்தி எளிமையான ஒரு நிகழ்ச்சியை செய்ய சொன்னார். கடவுள்மேலயும் இயேசுமேலயும் அன்பு இருந்தா நாமளும் இந்த நிகழ்ச்சியில ஒவ்வொரு வருஷமும் கலந்துக்குவோம்.—லூக்கா 22:19, 20-ஐ வாசிங்க.

ரொட்டியையும் திராட்சமதுவையும் யாரெல்லாம் சாப்பிடலாம்?

சாகுறதுக்கு முந்தின இரவு, சீடர்களோடு இயேசு ஒரு ஒப்பந்தம் செஞ்சார். (மத்தேயு 26:26-28) அந்த ஒப்பந்தம் செஞ்சதுனால, சிலருக்கு பரலோகத்துக்கு போறதுக்கான வாய்ப்பு கிடைச்சுது. பரலோகத்துக்கு போறவங்க, இயேசுவோட சேர்ந்து ராஜாக்களாகவும் குருமார்களாகவும் சேவை செய்வாங்க. ஒவ்வொரு வருஷமும் இயேசுவின் நினைவுநாள் நிகழ்ச்சிக்கு கோடிக்கணக்கான மக்கள் வருவாங்க. ஆனா, அந்த ஒப்பந்தத்தில இருக்கிறவங்கதான் ரொட்டியையும் திராட்சமதுவையும் சாப்பிடுவாங்க.—வெளிப்படுத்துதல் 5:10-ஐ வாசிங்க.

இயேசுவோட யாரெல்லாம் ஆட்சி செய்யணும்னு, சுமார் 2,000 வருஷமா யெகோவா தேர்ந்தெடுத்திட்டு இருக்கிறார். (லூக்கா 12:32) அவங்க மட்டும்தான் பரலோகத்துக்கு போவாங்க. மத்தவங்க எல்லாரும் பூமியில வாழ்வாங்க.—வெளிப்படுத்துதல் 7:4, 9, 17-ஐ வாசிங்க. (w15-E 03/01)