Yaandikilue na Mateo

13 Bobo busiku, Yesu waafumine ku nsesi ni kuya kwikala ku mbali lyezi. 2 Bantu bengi sana baakolongheene ni kumupalama Yesu, waapilukile mu bwato ni kwikala, ni babo bantu bonse babanga baimeene ku musenga. 3 Kisia, waababwilile bintu bingi wabombia mifuano, walanda evi: “Unvue, mulimi umo waaile kumiina nghano. 4 Lwabanga wamiina, mbezu inge yaaponeene mu mbali musebo, kisia toni twaaizile ni kulia ezio mbezu. 5 Inge yaaponeene pa bulongo bwa pa kitalabue palia pasibanga pali bulongo bwingi. Kabili te yaakokwele kumena pantu te pabanga pali bulongo bwingi. 6 Inzi, koba lukaasaamine sana, yaaziile ni kufumpa, pantu misila te yaali yaingiile sana pansi. 7 Inge yaaponeene mu myunga. Myunga luyaaleepele, yaaletele butonsi ku ezio mbezu yaali yamenene. 8 Ni mbezu inge yaaponeene pa bulongo buweme. Yaatendekele kutwama mara ingi sana kupita elia yaamiininue: Imo, mia imo (100), inge makumi sita (60) ni inge makumi atatu (30). 9 Emue, olia ali ni matui, onvue.”

10 Kisia, basambi baamupaleeme ni kumulanda evi: “Juu ya ki uli mukulanda nabo wabombia mifuano?” 11 Waabaasukile evi: “Mwemue mupeelue buvinde bwa kunvua siri itakatifu ya Bukolo bwa ku muulu, inzi bene te baapeelue bobo buvinde. 12 Pantu olia akwete kantu, wakapeelua bingi ni kuvuziiziwa. Inzi olia asikwete kantu, ata sie kaalia kaali nako wakapokua. 13 I kyalengia ndande nabo nabombia mifuano. Bali bakenta inzi bila bamona ata kantu, bali batwilizia inzi bila baunvua ata kantu, ao sie kunvua mana ya belia bili byalandua. 14 Kabili, bunabi* bwakue Isaya buli mukufikiliziiwa pa lwabo. Bulandile evi: ‘Kakiine mwakonvua, inzi temukenika mana ya belia byakalandua, kakiine mwakakenta, inzi temukamona. 15 Pantu mitima ya baaba bantu yaakyuma nga libue, bali mukunvua, inzi bila kuya baasuka. Kabili, bali mukuzibata evi te kunti bamone ata kanini na menso abo, kabili te kunti bonvue ata kanini na matui abo, evi te kunti benike ata kanini na mitima yabo mana ya belia bili byalandua, ni kubwela kuli nene evi mbakosie.’

16 Bali ni nsansa ni mwemue pantu menso enu ali amona, ni matui enu ali aunvua. 17 Kakiine, namilanda nangue ba nabi* bengi pamo ni babombi bengi bakue Leeza baatonene bamone bintu bimuli mukumona, inzi te baabimwene, kabili baatonene kunvua bintu bimuli mukunvua, inzi te baabyunvwile.

18 Ale unvue mana ya olia mufuano wa mulimi. 19 Elia mbezu yaaponeene mu mbali musebo, i olia muntu waunvua mulandu wa Bukolo, inzi bila kunvua mana yakue; kisia Sataana* waiza ni kutwama mbezu yaakibyalua mu mutima wakue ozo muntu. 20 Elia yaabyelue mu bulongo bwa pa kitalabue, i olia muntu waunvua mulandu, ni bila kukokola waupokelela kwa nsansa. 21 Ata sie evio, tali ata na misila mukati mwakue, inzi watwalilila kuya walipo musita fulani. Kisia kwemiiwa ao kutesua juu ya ozu mulandu, penka papo walekela kale kuzumina mulandu. 22 Elia yaabyelue mu myunga, i olia muntu waunvua mulandu, inzi kwema kwa mu bwikazi bwa mu onu musita pamo ni bulayo bwa bufi bwa kunonka bili byaleta butonsi ku mulandu, ni ozo mulandu uli walekela kutwama matunda. 23 Ni elia yaabyelue pa bulongo buweme, i olia muntu watwilizia mulandu ni kunvua mana yakue. Kakiine, ozu i olia ali watwama ni kufumia matunda engi, kumo mara mia imo (100), kunge mara makumi sita (60), ni kunge mara makumi atatu (30).”

24 Waabaleteele mufuano unge walanda evi: “Bukolo bwa ku muulu buli nga evelia muntu waabyele mbezu iweme mu bukaba bwakue. 25 Bantu lubaali baleele, mulwani wakue waaizile ni kumiina mu nghano mbezu ya bikusi bya mu kisonso,* ni kuya. 26 Lubezu lwa nghano lulwaamenene ni kutwama misokoti, ni belia bikusi bya mu kisonso byaamwenekele. 27 Ku mwisio, babombi bakue mukulu wa miilo baaizile ni kumulanda evi: ‘We mukulu, te waabyelemo abe mbezu iweme mu bukaba bobe? Ale bikusi bya mu kisonso byaizamo syani?’ 28 Waabalandile evi: ‘Muntu umo olia ansuulile i waamiininemo ezio mbezu.’ Babombi bakue baamwipuziizie evi: ‘Eba, utonene tuye tutukune belia bikusi?’ 29 Waabaasukile evi: ‘Ata, pantu lumuli kuya mwatukuna bikusi bya mu kisonso, kunti mwaatukwininina kumo ni nghano. 30 Lekelele byonse bikulile pamo mpaka musita wa kuzombola. Mu kipindi kya kuzombola, nakabalanda evi bantu ba kuzombola: Tukunenkemo bikusi bya mu kisonso, kisia mubikake mu bisi-bisi ni kubizizia, mane muteete nghano ni kuibiika mu butala.’”*

31 Waabaleteele mufuano unge walanda evi: “Bukolo bwa ku muulu buli nga evelia ka lubezu kakanini sana* kaatweme muntu umo ni kuya kubyala mu bukaba bwakue. 32 Kakiine, kaaka ka lubezu i kanini sana pakati ka mbezu yonse. Inzi kine kamena, kali kaleepa kupita mbezu yonse ya sasa ni kwaluka kimuti, mpaka ni toni twa mu muulu twaiza kukitamo binsua mu misambo ni kwiamamo koba.”

33 Waababwilile unge mufuano walanda evi: “Bukolo bwa ku muulu buli nga evelia levire yaabuulile mwanakazi umo ni kukandilila ku meka itatu ikata ya bunga mpaka bwali bonse bwaavimbile.”

34 Yesu waalandile bebio bintu byonse ku bantu bengi sana, wabombia mifuano. Kakiine, taali walanda nabo bila kubombia mufuano, 35 evi kufikilizia belia byaalandilue kupitila nabi,* olia waalandile evi: “Nakalanda nabombia mifuano, kabili nakapunda bintu byaafiikilue ntangia kutendeka kwa kyalo.”*

36 Kisia kusia babo bantu bengi sana, waaile kwingila mu nsesi. Basambi bakue baamupaleeme ni kumulanda evi: “Tubwile mana ya olia mufuano wa bikusi bya mu kisonso bili mu bukaba.” 37 Yesu waabaasukile evi: “Olia waabyele mbezu iweme i Mwana mwina muntu; 38 bukaba i kyalo. Elia mbezu iweme i baana ba Bukolo. Inzi, belia bikusi bya mu kisonso i baana bena Sataana.* 39 Ni olia mulwani waabibyele i Kibanda. Buzombozi i mpela ya kenu kyalo,* ni ba kuzombola i ba malaika. 40 Kukila pa kako, nga evelia sie bikusi bya mu kisonso vibyaakolonghaniiziwe ni kuziziiwa mu mulilo, i vikyakakitika ni ku mpela ya kenu kyalo.* 41 Mwana mwina muntu wakatuma ba malaika bakue, ni bene bakakolonghania belia bili byalengia bantu bange bakite lizambi, pamo ni bantu bali bakita bibipile, ni kubafumia mu Bukolo bwakue, 42 kabili, bakabapoza mu mulilo ukata. Momo, i mu bakalila ni kusyenkania meno abo. 43 Pa ozo musita, bantu baalia betabiilue na Leeza bakabeeka nga koba mu Bukolo bwakue Baba wabo. Emue, olia ali ni matui, onvue.

44 Bukolo bwa ku muulu buli nga evelia bunonsi bufiikilue mu bukaba, bolia bwaapatile muntu umo, kisia wabwela kubufiika. Kabili pantu waaunvwile nsansa, waaile ni kusisia kila kintu kyabanga wali nakio ni kusita bobo bukaba.

45 Kabili, Bukolo bwa ku muulu buli nga evelia musulu abanga waendooka wakeba busanga* buweme. 46 Lwaapatile busanga bwa bei ikata, waaile ni kuleenga kusisia bintu byakue byonse ni kusita bobo busanga.

47 Kabili, Bukolo bwa ku muulu buli nga evelia bukila bwaapozelue pa lyezi ni kukwata kasabi ka kila aina. 48 Musita bobo bukila lubwaaizwile, baabukuliile ku musenga. Lubaaikeele, baabambile kutolelamo tusabi tuweme babiika mu biyombo, inzi tolia tubipile baali batupoza. 49 Evio, i vikyakaba ni ku mpela ya kenu kyalo.* Ba malaika bakaya ni kubafumia bantu babipile pa bantu basili na kilubo. 50 Kabili, bakabapoza bantu babipile mu mulilo ukata. Momo i mu bakalila ni kusyenkania meno abo.

51 “Eba, mwaunvua mana ya bebi bintu byonse?” Basambi baamwasukile evi: “Een.” 52 Kisia, waabalandile evi: “Kansi, kila mwalimu wa bantu olia asambiliziiziwe palua Bukolo bwa ku muulu, ali nga mwine nsesi ali wafumia mu butala* bwakue bintu bya lenu ni bya kale.”

53 Yesu lwaapwile kulanda ezio mifuano, waafuminepo. 54 Lwaafikile mu kazonga ka kwabo, waatendekele kubasambilizia bantu mu ma sinagogi abo, ku mwisio baapapile balanda evi: “Eba, ozu muntu waakifumia pi ozu mulangue ni bobu buvinde bwa kukita bintu bya kupapia? 55 Eba, ozu te mwana mwina olia fundi wa biyombo bya mbao?* Eba, mama wakue te i olia ali wakuutua Maria, ni balabakue te ba Yakobo, Yosefu, Simoni ni Yuda? 56 Eba, ni balabakue bonse banakazi te tuli nabo penka panu? Ale bebi byonse, wene waakibipata pi?” 57 Pa kako, baakeene kumuzumina. Inzi, Yesu waabalandile evi: “Nabi* ali wakindikua fwasi yonse, inga sie mu kazonga kakue ni mu nsesi yakue.” 58 Pa kako, ku ezio fwasi Yesu taakitileko bintu bingi bya kupapia, pantu te baali na kiketekelo.