Yaandikilue na Mateo
2 Kisia Yesu kuvyalua mu Betlehemu ya ku Yudea mu nsiku yakue likolo Herode, mona! bantu baalia babanga batoosia* ntanda ni kulanda bintu byakaba kukitika baafumine kutula-koba ni kwiza ku Yerusalemu, 2 baalandile evi: “Olia likolo wa Bayuda waakivyalua ali ku pi? Pantu, twaakimona lutanda lwakue lutwakiba twali kutula-koba, kabili twaiza tumufwinamine.”* 3 Musita Likolo Herode lwaapatile ezio mpunda, waavulungheene mu mano, wene pamo ni bantu bonse ba mu Yerusalemu. 4 Waabakolonghaniizie bakulu bonse ba ba makoani ni ba kasambilizia ba sheria, ni kubepuzia kolia kwaali kwapalile kuvyalilua Kristu.* 5 Baamwasukile evi: “Ku Betlehemu ya ku Yudea, pantu nabi* waandikile evi: 6 ‘Ni wewe, We Betlehemu ya mu kyalo kya Yuda, te uli muzi unini sana pakati ka ba kateeka ba ku Yuda, pantu muli wewe i mwakaba kufuma ntunguluzi olia wakaba kubasunga Baisraeli bantu bane.’”
7 Kisia, Herode waabakuutile mu kinfikini* bantu baalia babanga batoosia* ntanda ni kulanda bintu byakaba kukitika, ni kubalanda bamubwile musita wine ubaakimwenapo lolia lutanda. 8 Lwaabatumine ku Betlehemu, waabalandile evi: “Endo mwaye mumukebe ozo mwana mwapozeleko mano. Kabili, kine mwamupata mukabe kwiza kumbwila evi ni nene nkabe kuya kumufwinamina.”* 9 Kisia kunvua malaizio abaapeelue na likolo, baaile. Kabili mona! lolia lutanda lubaamwene lubabanga bali kutula-koba, lwaaile ntanzi yabo mpaka lwafika lwaimana pa muulu nsesi yaalimo ozo mwana. 10 Lubaamwene lolo lutanda, baaunvwile sana makola. 11 Lubaaingiile mu nsesi, baamumwene ozo mwana pamo ni mama wakue Maria, baafukeeme ni kumufwinamina.* Kabili, baakakwile tufunda twabo twaalimo bunonsi ni kumupeela bupe—oro, ubani ni manemane. 12 Inzi, pantu Leeza waabasokele mu kilooto te kunti babwele kuli Herode, baapitile mu nzila inge ni kubwela mu kyalo kyabo.
13 Babo bantu lubaaile, mona! malaika wakue Yehova waamulapukiile Yosefu mu kilooto ni kumulanda evi: “Buuka, mutwame ozu mwana pamo ni mama wakue mubutukile ku Misri. Kabili, mukabe kwikala koko mpaka nkakubwile, pantu Herode ali kumukeba ozu mwana evi amwipaye.” 14 Pa kako, Yosefu waabuukile ni kumutwama mwana pamo ni mama wakue kwa ozo mwana musita wa busiku ni kuya ku Misri. 15 Waaikeele koko mpaka musita Herode lwaafwile. Kekio, kyaafikiliziizie milandu yakue Yehova elia yaalandile kupitila nabi* wakue, waalandile evi: “Naamukuutile mwana wane afume ku Misri.”
16 Kisia, Herode lwaamwene nangue bantu baalia babanga batoosia* ntanda ni kulanda bintu byakaba kukitika baamubepele, waaunvwile sana kipuki. Kabili, waabatumine bantu evi baye bepaye baana bonse balalume ba mu Betlehemu ni ba mu ma fwasi onse a mu mbali Betlehemu, kutendekela pa myaka ibili wakooka, kukonkana ni musita wine ubaamusininkiziiziepo na bantu baalia babanga batoosia ntanda ni kulanda bintu byakaba kukitika. 17 Ku mwisio, milandu elia yaalandile nabi* Yeremia yaafikiliziiziwe, waalandile evi: 18 “Mizoa yaaunvwikile ku Rama, malilo ni kuloosia kukata. Raheli i abanga walila baana bakue, kabili waakeene kuteekiiwa mutima pantu baana baafwile.”
19 Musita Herode lwaafwile, mona! malaika wakue Yehova waamulapukiile Yosefu mu kilooto lwabanga wali ku Misri 20 ni kumulanda evi: “Buuka, mutwame ozu mwana pamo ni mama wakue ni kubwela mu kyalo kya Israeli, pantu baalia bakiba bakeba kumwipaya* ozu mwana baakifua.” 21 Pa kako, Yosefu waabuukile ni kumutwama mwana pamo ni mama wakue kwa ozo mwana ni kubwela mu kyalo kya Israeli. 22 Inzi, lwaaunvwile nangue Arkelao ali mukuteeka mu Yudea pa fwasi yakue Herode baba wakue, waaunvwile mwenzo wa kuya koko. Kukila pa kako, pantu Leeza waamusokele mu kilooto, waaile mu kazonga ka Galilaya. 23 Kabili, waaile kwikala mu muzi uli wakuutua Nazareti, evi kufikilizia mulandu waalandile ba nabi* nangue, “Wene wakakuutua Munazareti.”*