Yaandikilue na Marko
2 Inzi, kisia nsiku fulani Yesu waaingiile kabili mu Kapernaumu, ni mpunda yaasalangheene nangue abanga wali mu nsesi. 2 Pa kako, bantu bengi baakolongheene mu nsesi mpaka ni fwasi yaapwile ata sie ku mulyango, ni Yesu waabambile kubasimikila mpunda iweme. 3 Kwaaizile bantu bana baalia babanga batweme muntu umo wa bulebe evi bamutwale kuli Yesu. 4 Inzi, pantu kubanga kwali bantu bengi, baandilue kumufikia pa fwasi pabanga pali Yesu, pa kako baavimbwile mutenge lya pa fwasi pabanga paikaliile Yesu, kisia baamukoosiizie ozo muntu wa bulebe waleele pa kitanda.* 5 Yesu lwaamwene kiketekelo kyabo, waamulandile evi olia muntu wa bulebe: “We mwana, mazambi obe aeleelua.” 6 Ba kalemba bamo ba sheria babanga bali papo. Babanga baikeele bali mukuwaza evi mu mitima yabo: 7 “Juu ya ki ozu muntu ali mukulanda evi? Ali mukumufuupula Leeza. Te kuli ata muntu ali kuvinda kweleela mazambi, inga sie Leeza bunke.” 8 Inzi bila kukokola, Yesu waainikile mu mutima wakue belia bibabanga bawaza pakati kabo, kisia waabalandile evi: “Juu ya ki muli mukuya mwawaza bebi bintu mu mitima yenu? 9 Pakati ka kumulanda ozu muntu wa bulebe nangue, ‘Mazambi obe aeleelua,’ ni kumulanda nangue, ‘Buuka, twama kitanda* kyobe wende’, kiki kyakilapo kuleenga? 10 Inzi, evi mumane nangue Mwana mwina muntu ali ni buvinde bwa kweleela mazambi pa kyalo—” waamulandile evi olia muntu wa bulebe: 11 “Nakulanda nangue, Buuka, twama kitanda* kyobe ni kuya ku nsesi yobe.” 12 Ozo muntu waabuukile, ni bila kukokola waatweme kitanda* kyakue ni kufuma waenda ni bantu bonse bamwene. Pa kako, bantu bonse baapapile ni kumutasia Leeza, balanda evi: “Tetunamonepo ata limo kintu nga keki.”
13 Kabili, Yesu waaile ku mbali lyezi lya Galilaya, ni bantu bengi baali baya kuli wene. Kisia, waabambile kubasambilizia. 14 Lwaali wapita koko, waamumwene Lawi mwana mwina Alfayo waikeele mu biro ya kusonkiziamo bitansi,* waamulandile evi: “Aluka musambi wane.” Ozo Lawi waaimeene ni kumukonka. 15 Kisia papo, Yesu lwabanga wali mukulia* mu nsesi yakue ozo Lawi, ba kasonkia bengi ba bitansi* ni bantu ba mazambi babanga bali mukulia* pamo ni Yesu ni basambi bakue, pantu bengi pakati kabo babanga bamukonka. 16 Inzi, ba kalemba ba Bafarisayo lubaamwene nangue Yesu abanga wali mukulia pamo ni bantu ba mazambi ni ba kasonkia ba bitansi,* baabambile kubalanda evi basambi bakue: “Eba, Mwalimu wenu ali walia pamo ni ba kasonkia ba bitansi* ni bantu ba mazambi?” 17 Yesu lwaaunvwile evio, waabalandile evi: “Baalia balumine te bali na lazima ya munghanga, inzi baalia balwele i bali ni lazima yakue. Nsyaaizile kukuuta bantu bolokele, inzi ba mazambi.”
18 Basambi bakue Yoane pamo ni Bafarisayo babanga baizilika. Pa kako baaizile kumwipuzia evi Yesu: “Juu ya ki basambi bakue Yoane ni basambi ba Bafarisayo bali baizilika, inzi basambi bobe te bezi kwizilika?” 19 Pa kako Yesu waabaasukile evi: “Musita sibwinga lwali pamo nabo, benakue kwa sibwinga te bali na nsambu ya kwizilika, te i evio? Lubakili pamo ni sibwinga, te bavinda kwizilika. 20 Inzi, nsiku ili mukwiza musita sibwinga lwasikaba pamo nabo, bobo busiku i bubakezilika. 21 Te kuli muntu ali wasonenena kilaka kya ngubo ya lenu ku ngubo ya kale ya panze. Kine wene wakita evio, kilaka kya lenu kili kukulika pa ezio ngubo ya kale ni kulengia ikile kuzabuka. 22 Kabili, te kuli muntu ali wabiika divai ya lenu mu kisupa kya kale kya kipapa. Kine wene wakita evio, divai ili kupasula kipapa, kisia divai ili kwitika ni kipapa kili kwinooneka, inzi divai ya lenu ili yabiikua mu kisupa kya kipapa kya lenu.”
23 Lwabanga wali mukupita mu makaba a nghano busiku bwa Sabata, basambi bakue baabambile kuputula misokoti ya nghano lubaali bapita. 24 Pa kako, Bafarisayo baamwipuziizie evi: “Mona koko! Juu ya ki bali mukukita kelia kisipalile kukitua mu busiku bwa Sabata?” 25 Inzi Yesu waabepuziizie evi: “Eba, temunasomepo ata limo kelia kyaakitile Daudi musita lwaapwiliilue na byakulia, kabili wene ni balalume baali pamo nakue lubaaunvwile nzala? 26 Eba, mu mpunda pa lwakue koani mukulu Abiatari, temunasomepo nangue Daudi waaingiile mu nsesi yakue Leeza ni kulia mikate itakatifu, kisia waabapeelako ni balalume baalia babanga bali pamo nakue? Kukonkana ni sheria, te kwaali muntu abanga wapalile kulia ezio mikate, inga sie ba makoani. 27 Kisia waabalandile evi: “Sabata yaalukileko juu ya muntu, apana muntu juu ya Sabata. 28 Pa kako, Mwana mwina muntu i Mulopue ata sie wa Sabata.”