Yaandikilue na Marko
9 Kukila pa kako, waabalandile evi: “Kakiine namyana nangue kuli bamo pakati ka baaba bemeene panu, te bakatompa lufu ata kanini mpakanke bakamone Bukolo Bwakue Leeza bwali mukwiza kuteeka na maka.” 2 Kisia nsiku sita, Yesu waamutweme Petro, Yakobo ni Yoane, ni kuya nabo ku lupili lwaleepele evi baye baliko sie bunke. Kisia, waalulukile ntanzi yabo; 3 maubo akue a panze aabambile kubeeka, aaswetele sana. Panu pa kyalo, te pali ata muntu ali wafula maubo olia ali kuvinda kuaswesia evio. 4 Kisia, Eliya pamo ni Musa baabalapukiile, kabili babanga balanziana ni Yesu. 5 Kusyali Petro wamulanda evi Yesu: “Rabi, kyawama kuli fwefue kuya twali panu. Ele twimikepo maema atatu, limo lyobe, linge lyakue Musa ni linge lyakue Eliya.” 6 Kakiine, Petro taamwene ka kulanda pantu baaunvwile sana mwenzo. 7 Kabili, kwaaizile lilezi lyaabavimbile, kisia lizui lyaafumine mu lelio lilezi lyalanda evi: “Ozu ni Mwana wane, uuntonene. Mutwilizie.” 8 Penka papo, basambi baakentele koku ni koku bila kumona ata muntu abanga wali pamo nabo, inga sie Yesu.
9 Lubaali bakooka bafuma ku lupili, waabakaniizie sana te kunti babwileko ata muntu belia bibaamwene mpaka Mwana mwina muntu akafufuluenke kufuma ku bafwile. 10 Ezio milandu, baaisungile mu mutima,* inzi babanga balondolola pakati kabo kine koko kufufulua kufuma ku bafwile kubanga kwali na mana ki. 11 Kabili, baabambile kumwipuzia evi Yesu: “Juu ya ki ba kalemba ba sheria bali balanda nangue Eliya apalilenke eze?” 12 Waabaasukile evi: “Kakiine, Eliya wakezanke, kabili wakateania bintu byonse; inzi, ale juu ya ki Malembo ali alanda nangue Mwana mwina muntu apalile kutesua sana ni kuzyelekaniiwa? 13 Inzi, namyana nangue kakiine Eliya waaizile, kabili baamukitiile kila kintu kibaali batonene nga evelia sie vili vyalanda Malembo pa lwakue.”
14 Lubaafikile ku baalia bange basambi, baamwene bantu bengi sana babazyungulukiile. Kabili, pa babo bantu bengi sana pabanga pali ni ba kalemba ba sheria bali mukubisiana ni basambi. 15 Inzi, babo bantu bonse lubaamumwene, baapapile; kabili baakundukile baya kuli wene evi bamupozie. 16 Kisia, Yesu waabepuziizie evi basambi: “Muli mukuya mwabisiana nabo palua ki?” 17 Muntu umo olia abanga wali pa babo bantu bengi waamwasukile evi: “Mwalimu, nakuletelanga mwana wane mwalalume pantu ali ni mupasi uli wamwalula kameme. 18 Lyonse mupasi luuli wamwingila, uli wamupoza pansi; kabili ali wafulumia bifulo ku kanua, ali wasyenkania meno, ni maka ali amupua. Nabalandanga basambi bobe baukuumbe, inzi te bavindanga.” 19 Yesu waabalandile evi: “Mwe kizazi kisili* na kiketekelo, nakaba kutwalilila kuya nali pamo ni mwemue mpaka musita ki? Nakaba kumisipikizia mpaka musita ki? Mulete panu.” 20 Pa kako, baamutwaliile kako ka mulumendo. Inzi, ozo mupasi luwaamumwene Yesu, waamuponiizie ni kumuzukumbia ovio sana ozo mwanike. Kisia kuponena pansi, waabambile kwivulunga wafumia bifulo ku kanua. 21 Kisia papo, Yesu waamwipuziizie evi baba wakue kwa ozo mwana: “Ezi aali yaatendekele kumukita evi ntangia musita ki?” Waalandile evi: “Ntangia ku bwanike. 22 Kabili, lingi ozo mupasi uli wamupoza pa mulilo ni mu menda evi umwipaye. Kine kunti wakitapo ni kantu, tunvwileko nkumbu, tukwasie.” 23 Yesu waamulandile evi: “Juu ya ki walanda nangue, ‘Kine kunti’? Pantu ku olia ali ni kiketekelo, bintu byonse bili byavindikana.” 24 Penka papo, baba wakue kwa ozo mwana waasamwine, walanda evi: “Ndi ni kiketekelo! Nkwasie palia pa ndi ni lazima ya kiketekelo!”
25 Yesu lwaabamwene bantu bengi bali mukwiza lubilo kubabanga bali, waausasiliile ozo mupasi ufiitile, waulanda evi: “We mupasi olia uli wamulengia aaluke kameme ni mpokoto, nakulanda nangue fuma muli wene, kabili te kumwingila linge!” 26 Kisia kusamuna ni kumuzukumbia ovio sana mara ingi, mupasi waafumine. Kabili, ozo mwana waamwenekele kusia wafua, ni bantu bengi baabambile kulanda nangue “Wafua!” 27 Inzi, Yesu waamukwete ku kuboko, wamubuusia ni wene waimana. 28 Kisia kwingila mu nsesi, basambi bakue baamwipuziizie evi bali kwa bunke: “Ale juu ya ki fwefue twaanduanga kukuumba olia mupasi ubipile?” 29 Yesu waabalandile evi: “Mupasi wa evi uli wakuumbua sie kupitila lipepo.”
30 Baafumine koko ni kuya kupita mu Galilaya, inzi Yesu taatonene muntu ata umo amane 31 pantu abanga watonene kubasambilizia basambi bakue. Abanga wabalanda evi: “Mwana mwina muntu wakaba kubiikua mu minue ya balwani bakue, kabili bakaba kumwipaya. Inzi, ata sie kine wakaba kwipaiwa, wakaba kufufulua kisia nsiku itatu.” 32 Ata sie evio, basambi te baainikile belia byabanga walanda, kabili baaunvwile mwenzo wa kumwipuzia.
33 Kisia, baafikile ku Kapernaumu. Lubabanga bali mu nsesi, Yesu waabepuziizie evi: “Mwile mwabisiana ki mu nzila?” 34 Baasyele sie bataleele, pantu lubaali mu nzila babanga babisiana bakeba kumana kine nani mukulupo sana pakati kabo. 35 Pa kako, Yesu waaikeele ni kubakuuta batumua wabalanda evi: “Kine muntu watona kuya wali wa kwanza, apalile kuya wali wa mwisio pa bonse ni kuya wababombela bonse.” 36 Kisia, Yesu waamutweme mwanike umo ni kumwimika pa bukata bwabo; kabili wamukwete pa bikoope ni kubalanda evi: 37 “Kila muntu olia ali wamupokelela mwanike munini ali nga ozu juu ya liina lyane, ali wampokelela ni nene; kabili, kila muntu olia ali wampokelela nene, tampokeleele sie nene, inzi ali wamupokelela ni Olia waantumine.”
38 Yoane waamulandile evi: “Mwalimu, twamonanga muntu umo evi wali mukukuumba mipasi ibipile wabombia liina lyobe, kabili twaezianga kumukaania, pantu tezi kutukonka.” 39 Inzi, Yesu waalandile evi: “Tekwezie kumukaania, pantu te kuli ata muntu wa kukita kimpezia mano mu liina lyane ni wenka ozo musita alande bintu bibipile juu yane. 40 Pantu, kila muntu olia asizi kutupinga, ali ku lubali lwetu. 41 Kabili, kila muntu olia wamipeela likopo limo lya menda a kumina pantu muli bakue Kristu, kakiine namyana nangue takazezia ata kanini malipo akue. 42 Inzi, kila muntu olia ali wamuponia umo pa baaba banini bali ni kiketekelo, kili bwino sana kuli wene kine libue lya kupelelako lili lyazyungulusia punda lyabiikua mu mukosi wakue, kisia apozue pa lyezi.
43 Kine kuboko kobe kwakulengia uluvie, kuputule. Kili bwino sana kuli wewe upate bukose wali kipumputu, kuliko kwingila wali ni maboko abili mu Gehena,* mu mulilo olia usizi kuzimiiwa. 44* —— 45 Kabili, kine kuulu kobe kwakulengia uluvie, kuputule. Kili bwino sana kuli wewe upate bukose wali kilema, kuliko upozue mu Gehena* wali ni maulu abili. 46* —— 47 Kabili, kine linso lyobe lyakulengia wiputale, lipoze kule. Kili bwino sana kuli wewe wingile mu Bukolo Bwakue Leeza wali ni linso limo, kuliko upozue mu Gehena* wali ni menso abili, 48 molia musizi kufua molo ni mulilo bila wazima.
49 Pantu, kila muntu apalile kubiikuako* mukele kupitila mulilo. 50 Mukele uli bwino, inzi kine mukele wasuuka, muli kuusonsia na ki? Muye mwabiikilueko mukele, kabili sunge mutende pakati kenu.”