Mukanda ku Baroma
4 Ale tuli kulanda nangue ni kiki kyaapatile kikolue wetu Abrahamu? 2 Kabenge Abrahamu waapundilue kuya waolokele kupitila bintu byaakitile, waasiile kwaluka ni nsambu ya kwitanka, inzi apana ntanzi yakue Leeza. 3 Lilembo lili lyalanda syani? “Abrahamu waamuketekeele Yehova,* kabili waamwenue kuya waolokele.” 4 Malipo a muntu olia ali wabomba te ezi kumonua kuya ali bupe,* inzi ali amonua nga kintu kyapalile kupeelua.* 5 Ku lubali lunge, kiketekelo kya muntu olia asizi kubomba, inzi koku wamuketekeele Leeza olia ali wamupunda muntu abipile kuya waolokele, kili kyamonua kuya kyaolokele. 6 Ni Daudi walanda evi palua nsansa ya muntu olia amwenue na Leeza kuya waolokele, apana juu ya bintu byali wakita: 7 “Bali ni nsansa ni baalia beleelue bintu bibali bakita belia bipuseene ni sheria, kabili baalia baakivimbilua* mazambi abo. 8 Ali ni nsansa ni olia asikaba kupendelua lizambi lyakue na Yehova.”*
9 Eba, baalia batairiiwe i bonvwile sie ezio nsansa, ao ni baalia basitairiiwe ni bene bonvwile ezio nsansa? Pantu tuli twalanda nangue: “Abrahamu waamwenue kuya waolokele juu ya kiketekelo kyakue.” 10 Eba, wene waamwenue kuya waolokele mu aali ki? Eba, waamwenue evio wasyatairiiwe ao, tanatairiwe? 11 Kabili waapokeleele alama, i kulanda, kutairiwa, evi iye yali nga kashe ya* kulangilila nangue olokele kupitila kiketekelo kyabanga wali nakio musita lwabanga wali tanatairiwe. Kyaali evio, evi aye wali baba wa baalia bonse bali ni kiketekelo ata sie kine tebanatairiwe juu ya kunti bamonue kuya baolokele. 12 Kabili, waalukile baba wa kizazi kitairiiwe.* Taalukile evio ku baalia sie batairiiwe, inzi kabili ni ku baalia bali baenda bakonkele ntanfu ya kiketekelo kyakue baba wetu Abrahamu, musita lwabanga wali tanatairiwe.
13 Abrahamu ao bantu ba mu kizazi kyakue* te baapokeleele bulayo bwa kupyana kyalo kupitila sheria. Inzi, kyaali evio juu ya kooloka kwakue kupitila kiketekelo. 14 Kine bantu bakapyana bulayo kupitila sheria, kansi, kiketekelo kyaaluka kya bule, kabili ni bulayo bolia bwaapeelue Abrahamu tebukiya bwali na mana. 15 Kakiine, kutyona Sheria kuli kwalengia muntu alapiziiwe, inzi palia pasili sheria te pali kilubo ata kimo.
16 Kekio i kilengiizie tuye twali ni bulayo kupitila kiketekelo, pantu bwene ni bupe bwa kwa bule kufuma kuli Leeza, evi kizazi kyonse kyakue Abrahamu kikabe* kupata bulayo, apana baalia sie bali banakila Sheria, inzi kabili ni baalia bali ni kiketekelo kyakue Abrahamu, baba wetu fwe bonse. 17 (Kekio kili sie nga evelia vili vyalanda Malembo nangue: “Naakusaakwile kwaluka baba wa ntundu ingi.”) Abrahamu waalangiliile kekio kiketekelo ntanzi yakue Leeza olia ali walengia bafwile baaluke ni bukose, kabili olia ali walanda palua bintu bisinabeko nga evelia sie biliko mbela.* 18 Abrahamu tabanga wali na nsambu ya kuya wali ni kiswapilo kya kupata baana. Inzi, kupitila kiswapilo, waali waketekeele nangue wakaaluka baba wa ntundu ingi kukonkana ni belia byaalandilue na Leeza nangue: “Evi i vyakaaluka kizazi kyobe.”* 19 Ata sie kine kiketekelo kyakue te kyaatopele, waali watontonkania palua mubili wakue olia ubanga wali sie nga ufwile, (pantu abanga wasyali na myaka mia imo (100) evi). Kabili, waali wamanine nangue Sara taali na buvinde bwa kuvyala baana.* 20 Inzi, juu ya bulayo bwakue Leeza, taalukilepo ata kanini na masyaka ao kupusa kiketekelo. Kuliko kukita evio, waalukile ni maka kupitila kiketekelo kyakue, kabili waamupeele Leeza bulumba. 21 Waali wasininkiziizie kakiine nangue Leeza abanga wali ni buvinde bwa kufikilizia belia byaalaile. 22 Pa kako, kupitila kiketekelo kyakue, “waamwenue kuya waolokele.”
23 Ata sie kine kyaali evio, milandu elia ilandile nangue “waamwenue,” te yaandikilue sie pa lwakue bunke, 24 inzi kabili yaandikilue ni pa lwetu. Ni fwefue twakamonua kuya twaolokele pantu tuzumiine muli Leeza, olia waamufufwile Yesu Mulopue wetu kufuma ku bafwile. 25 Waafumiiziwe afue juu ya mazambi etu, kabili waafufwilue evi atupunde kuya twaolokele.