Mukanda wa Kwanza ku Bakorinto
11 Konke mufuano wane, nga evelia nene vinkonkele mufuano wakue Kristu.
2 Namitasia pantu muli mwandanguluka mu bintu byonse, kabili pantu mukwete na maka malaizio* anaamipeele. 3 Inzi, ntonene mumane nangue Kristu i mutue wa kila mwalalume, kabili mwalalume i mutue wa mwanakazi, ni Leeza i mutue wakue Kristu. 4 Kila mwalalume olia ali wapepa ao ali wafumia bunabi* ni koku wavimbile kintu ku mutue, waumonia busoni mutue wakue. 5 Inzi, kila mwanakazi olia ali wapepa ao ali wafumia bunabi* ni koku bila wavimbile mutue, waumonia busoni mutue wakue, pantu kili sie nga evelia atebwilue ku mutue. 6 Pantu, kine mwanakazi tavimbile mutue wakue, kansi atebulue misisi; inzi pantu kili kyaleta busoni ku mwanakazi kutebulua misisi ao kakuuzu, apalile kuvimba mutue wakue.
7 Mwalalume tapalile kuvimba mutue wakue, pantu wene i bulumba bwakue Leeza ni mufuano wakue. Inzi, mwanakazi i bulumba bwa mwalalume. 8 Pantu, mwalalume taafumine ku mwanakazi, inzi mwanakazi i waafumine ku mwalalume. 9 Kukila pa kako, mwalalume taabumbilue juu ya mwanakazi, inzi mwanakazi i waabumbilue juu ya mwalalume. 10 Juu ya ezio nsambu, kabili juu ya ba malaika, mwanakazi apalile kuvimba kintu ku mutue evi kulangilila nangue ekoosiizie.
11 Kukila pa kako, pakati ka basambi bakue Mulopue, mwalalume ali ni lazima ya mwanakazi, ni mwanakazi ali ni lazima ya mwalalume. 12 Nga evelia sie mwanakazi vyaafumine ku mwalalume, balalume ni bene bavyelue na banakazi. Inzi, kila kintu kifumine kuli Leeza. 13 Pingule mwe bene: Eba, kipalile mwanakazi kupepa kuli Leeza bila wavimbile mutue wakue? 14 Kukonkana ni vili mubili wa muntu, eba te kya nsoni ku mwalalume kuya wali ni misisi yaleepele? 15 Inzi, kine mwanakazi ali ni misisi yaleepele, kekio kili kyamuletela bulumba. Mwanakazi waapeelue misisi evi iye yali nga kintu kya kuvimba mutue. 16 Ata sie kine kili evio, kine muntu onse watona kukankabula palua kekio evi kusakila desturi inge, fwefue pamo ni bilonghaano byakue Leeza te tuli na desturi inge.
17 Inzi, musita undi mukufumia aza malaizio, nsili mukumitasia, pantu te mwizi kukolonghana juu ya kukita bintu biweme, inzi muli mwakolonghana juu ya kukita bintu bibipile sana. 18 Kya kwanza, naunvua nangue lumuli mwaiza ku kulonghaana, mwemue muli mwasangua mwakasanikile pakati kenu. Kabili, mu nzila imo naitabizia nangue ni kisinka. 19 Pantu, kakiine pakati kenu pakaba kwaluka ni bikundi bikasanikile,* inzi kekio kyakaba kulengia baalia betabiilue na Leeza bakabe kumanika.
20 Musita umuli mwakolonghana pa fwasi imo, kakiine te juu ya kulia Kyakulia kya Lyungulo Kyakue Mulopue. 21 Pantu, musita wa kulia kekio kyakulia luuli wafika, kila muntu ali walianke kyakulia kya lyungulo kyakue mwine, ni pa kako umo ali wasangua wasuminue na nzala, inzi unge ali wasangua wakolelue. 22 Eba, te mukwete masesi a kuya mwaliilamo ni kumininamo? Ao, eba muli mukuzyelekania kilonghaano kyakue Leeza ni kulengia baalia basili na kantu bonvue busoni? Milande ki? Eba, mpalile kumitasia? Nsivinda kumitasia palua kako.
23 Bintu binaasambiliziiziwe kuli Mulopue i belia binaamisambiliziizie ni mwemue. Mu nsita ya busiku, molia mwaali mwapalile kupaanua* Mulopue Yesu, waabuulile mukate, 24 kisia kutasia, waaumokwele ni kulanda evi: “Ozu ulangiliile mubili wane olia ufumiiziwe juu yenu. Twalilile kukita evi, juu ya kundanguluka nene.” 25 Waakitile enka evio ni palua kikombe. Kisia kulia kyakulia kya lyungulo, waalandile evi: “Keki kikombe kilangiliile mapatano a lenu* alia akitilue kupitila milopa yane. Twalilile kukita evi, juu ya kundanguluka nene musita onse umuli mwamina keki kikombe.” 26 Pantu, lyonse lumuli mwalia ozu mukate ni kumina keki kikombe, muli mwatwalilila kupunda lufu lwakue Mulopue mpaka musita wene lwakaba kwiza.
27 Pa kako, onse ali walia mukate ao kumina kikombe kyakue Mulopue mu nzila isipalile, ali waaluka ni kilubo kya lizambi palua mubili ni milopa yakue Mulopue. 28 Kila umo apalilenke kwitoosia mwine wapozeleko mano evi kumona kine apalile, kisia kunti walia mukate ni kumina kikombe. 29 Olia walia ni kumina bila wainikile mana ya mubili, walia ni kumina bupinguzi pa lwakue mwine. 30 Kekio i kilengiizie bengi pakati kenu baye bali batope, ni kuya balwele, kabili bengi bafwile.* 31 Inzi, twinikenge fwe bene vituli, nga te twaakipingulua. 32 Inzi, musita utuli twapingulua, kekio kili kyalangilila nangue Yehova* ali mukutulapizia evi te kunti tupingulue pamo ni kyalo. 33 Pa kako mwe ba lupua, musita umuli mwakolonghana pamo evi kulia Kyakulia kya Lyungulo Kyakue Mulopue, muye mwapembelana. 34 Kine muntu umo ali ni nzala, alie ku nsesi yakue evi te kunti mupingulue musita umuli mwasaakaana pamo. Nakaba koolola* bintu binge bisyeleko lunakaba kwiza koko.