Mukanda wa Kwanza ku Batesalonika
2 Mwe ba lupua, mumanine kakiine nangue lutwaaizile kumyendela, kekio kyaaletele matunda. 2 Mumanine nangue twaaemiiziwenke ni kuzyelekaniiwa mu Filipi. Inzi, Leeza wetu waatupeele mibele ya kusipa evi tumipundile mpunda yakue iweme ata sie kine twaapingilue sana.* 3 Bintu bituli twamikinkizia kukita te bya bufi, kabili te twizi kubifumia twali ni mipango ibipile ao juu ya kumizezia, 4 inzi, tuli twabifumia pantu twaaitabiilue na Leeza kuya twapalile kupeelua mpunda iweme. Kabili, te twizi kulanda juu ya kusansamusia bantu, inzi tuli twakita evio juu ya kumusansamusia Leeza, olia ali watoosia mitima yetu.
5 Kakiine, mumanine nangue te twaabombiizie ata kanini bulanzi bwa kulavikizia ao sie kuya twali banafiki twasonseziiziwe na pupa; Leeza asininkiziizie evio! 6 Kabili, te twaali twakeba kutasiiwa na bantu, ao na mwemue ao sie na bantu bange. Pantu tuli batumua bakue Kristu, twaasiile kwaluka kifunda kikata kuli mwemue. 7 Kupusana ni kekio, twaalangiliile ntono ni buwame pakati kenu, nga evelia mama ali waonsia vyali waemena bwino baana bakue. 8 Pa kako, pantu tubanga twamitonene sana, twaapingwile* kumipeela, apana sie mpunda iweme yakue Leeza, inzi kabili kumipeela ni bukose bwetu,* pantu mwemue mwaalukile bantu batwaali twatonene sana.
9 Mwe ba lupua, kakiine mulangulukile vitwaali twabomba kwa mute ni kwikwinda sana. Tubanga twabomba busiku ni koba evi te kunti twaluke mutembo ku muntu ata umo pakati kenu musita utubanga twamisimikila mpunda iweme yakue Leeza. 10 Mwemue pamo ni Leeza, muli bakasininkizia kukonkana ni vitwaasyele twali ba kisinka, twaolokele, kabili bila kilubo kuli mwemue bazumiine. 11 Mumanine bwino nangue twaatwaliliile kumikinkizia, kumiteekia mutima ni kusoka kila umo pakati kenu nga evelia sie baba vyali wabakitila baana bakue. 12 Twaakitile evio evi mutwalilile kwenda mu nzila ipalile kuli Leeza, olia waamikuutile evi mwingile mu Bukolo bwakue ni mu bulumba bwakue.
13 Kakiine, kekio i kilengiizie tutwalilile kumutasia Leeza, pantu musita umwaapokeleele mulandu wakue Leeza, olia umwaaunvwile kufuma kuli fwefue, te mwaaupokeleele nga mulandu wa bantu, inzi mwaaupokeleele nga vyuli kakiine, mulandu wakue Leeza, olia uli mukubomba kabili muli mwemue bazumiine. 14 Mwe ba lupua, mwaakonkele mufuano wa bilonghaano byakue Leeza bya mu Yudea belia bili mu buumo ni Kristu Yesu, pantu mwaaemiiziwe na bekala kyalo nenu nga enka evelia bebio bilonghaano vibili mukwemiiwa na Bayuda. 15 Bayuda baamwipaile ni Mulopue Yesu, ni ba nabi,* kabili baatutesele ni fwefue. Kukila pa kako, te bali mukumusansamusia Leeza, inzi bali mukupinga bintu bili byabaletela faida bantu bonse, 16 kupitila kwezia kutwanzia evi te kunti tubasimikile bantu ba ntundu mpunda elia yakaba kubapususia. Kupitila kukita evio, lyonse bali mukukila kongezia mazambi abo. Inzi ku mpela yakue, kipuki kikata kyakue Leeza kyakaba kwiza pali bene.
17 Inzi, mwe ba lupua, lutwaalekeene* mu musita unini (kimubili, apana mu mitima yetu), twaaikwindile mu kila nzila evi twize tumimone kimubili,* pantu tubanga twali ni amu sana. 18 Palua kako, twaatonene kwiza kuli mwemue, kabili nene Paulo naaeziizie mara ibili kwiza kuli mwemue, inzi Sataana waakakile nzila yetu. 19 Eba, kiswapilo kyetu ao nsansa ao kisote kya bulumba kelia kyakaba kulengia tukabe kwitanka* ntanzi yakue Mulopue wetu Yesu mu busiku bwa kubapo kwakue, ni kiki? Eba, te mwemue abe? 20 Kakiine, mwemue i bulumba, kabili nsansa yetu.