Mukanda ku Baroma
12 Mwe ba lupua, pantu Leeza waakimilangilila nkumbu yakue, namipapaata mufumie mibili yenu iye yali zabiu ikosele, itakatifu kabili itabiilue na Leeza. Kukila pa kako, bombie buvinde bwenu bwa kutontonkania lumuli mukumubombela wene. 2 Lekele kubumbua na kenu kyalo.* Inzi, muleke Leeza aalulule nzila yenu ya kutontonkania, evi muye mwasininkiziizie mwe bene bintu biweme byakue Leeza, bitabiilue ni kutona kwakue kupwililikile.
3 Juu ya buwame bwakue Leeza* bunaapeelue, namikinkizia te kunti muye mwaifikiria sana mwe bene kuliko vimupalile kufikiria. Inzi, muye mwafikiria mu nzila ilangiliile nangue muli ni mano aweme kukonkana ni kipimo kya kiketekelo kimwaapeelue* na Leeza. 4 Mubili uli ni biungo bingi, inzi byonse tebizi kubomba miilo imonke. 5 I vituli ni fwefue, ata sie kine tuli bengi, tuli mubili umo mu buumo pamo ni Kristu. Inzi, kila umo wetu ni kiungo kya mwinakue. 6 Fwe bonse tuli ni bupe bupusene-puseene kukonkana ni buwame* butwaalangiliilue na Leeza. Pa kako, kine tuli ni bupe bwa bunabi,* tufumie bunabi* kukonkana ni kiketekelo kituli nakio, 7 kine twaapeelue miilo ya kusimikila, twikwinde sana evi kuibomba, ao kine bupe bwetu ni bwa kusambilizia, twikwinde sana evi kusambilizia, 8 ao kine tupeelue bupe bwa kukoselezia* bange, kansi tubakoselezie; kine ni kupeela* bange, tubapeele mu kwitonena; olia ali watungulula* apalile kukita evio kwa mute; olia ali walangililana luse apalile kukita evio kwa nsansa.
9 Ntono yenu te kunti iye yali ya bunafiki. Suule kibipile; kwatisie kiweme. 10 Muye mwatoneene, kabili langililane ntono ikata nga bantu ba mu lupua lumo.* Muye mwali ba kwanza mu kukindikana. 11 Bombe kwa mute, tekuye mwali bananghani. Lekele mupasi utakatifu umiizuzie maka. Mubombele Yehova* kwa mutima wenu onse. 12 Lekele kiswapilo kyenu kimiletele nsansa. Sipikizie musita umuli mu maavia. Tekulekele ata kanini kupepa. 13 Bapeeleko bantu bakue Leeza* bintu bibali nabio lazima. Konkezie lwendo lwa kupokelelana. 14 Twalilile kupaala* baalia bali bamyemia. Muye mwabapaala, apana kubalainia. 15 Sekelele pamo ni baalia bali mukusekelela, lile pamo ni baalia bali mukulila. 16 Muye mwaemena bange nga vimuli mwaiemena mwe bene. Tekupoze mano ku bintu bya pa muulu.* Inzi, muye mwatungululua na bintu bya pansi. Tekuye mwaimwene nangue muli ni mulangue kuliko muntu unge onse.
17 Tekubweziizie muntu ata umo bubifi kwa bubifi. Poze mano ku kintu kelia kimwenue na* bantu bonse kuya kyaweme. 18 Kine kyakitika, kite maka enu onse evi muye mwali ni mutende pamo ni bantu bonse. 19 Mwe batonua, tekuye mwabwezia kibwelezi. Inzi, musiile Leeza kibwelezi kyakue evi alangilile kipuki kikata palua bubifi. Malembo ali alanda evi: “‘Kibwelezi ni kyane, nakaba kulipa,’ i vyalanda Yehova.”* 20 Inzi, “kine mulwani obe onvwile nzala, mupeele kyakulia, kine onvwile kyaka, mupeele kyakumina. Kine wewe wakita evio, kunti wamupapia ni kufuukia mutima wakue.”* 21 Te kwilekelela uvindue na bubifi, inzi twalilila kuvinda bubifi kupitila biweme.