Mukanda ku Baroma
11 Pa kako, naipuzia evi: Eba, Leeza waabakeene bantu bakue? Bila! Ni nene wenka ndi Mwisraeli, wa mu kizazi kyakue* Abrahamu, mu mukoa wakue Benyamini. 2 Leeza taabakeene bantu bakue baalia baasaakwilue* ba kwanza na wene. Eba, te mumanine vilandile lilembo pa lwakue Eliya ni vyaali waitendooka kuli Leeza palua Baisraeli? 3 “We Yehova* baakipaya ba nabi* bobe, baakituuta mazabau obe. Ne bunke sie i asyelepo, kabili lonu, bali mukukeba kungipaya.”* 4 Inzi, Leeza waamwasukile syani? “Pasyele bantu bane elufu saba (7 000) baasyakifukamina Baali.” 5 I vikili ni lonu. Kuli kikundi kinini kya* baalia basaakwilue kufuma pakati ka Bayuda juu ya buwame bwakue Leeza.* 6 Kine lonu kili evio kupitila buwame bwakue Leeza,* te pantu twaakibombelapo; kine te evio, buwame bwakue busipalilue, te bwaasiile kabili kuya bwali kakiine buwame busipalilue.
7 Ale tuli kulanda syani? Baisraeli te baapatile kintu kiine kibaali bakeba sana. Inzi, baalia baasaakwilue i baakipatile. Bange baakeene kwitabila.* 8 Kili sie nga evelia vilandile Malembo nangue: “Leeza waabalengiizie bone sana tulo evi menso abo te kunti amone ni matui abo te kunti onvue, mpaka lwenka lonu.” 9 Kabili, Daudi walanda evi: “Lekela meza yabo yaluke muteo wa kukwatana evi bapone ni kulapiziiwa. 10 Lekela mu menso abo mwaluke kafinzi evi te kunti bamone, kabili kita misana yabo ifwiname lonse.”
11 Pa kako naipuzia evi, Musita Bayuda lubaaiputeele, eba baaponene ni kwinoonua? Ata, te evio. Inzi, kupitila kwiputala kwabo, bantu ba ntundu inge baakipusuka, kabili kekio kili kyasonsezia Bayuda baaluke ni bwivu. 12 Kine kwiputala kwabo kwaakinonsia kyalo, kabili kine kupunguka kwabo kwaakinonsia bantu basili Bayuda,* kansi mpaalo yakakilapo musita mpendua yabo yonse luyakakolonghaniiwa.
13 Lonu, namilanzia mwe bantu basili Bayuda.* Pantu mwene nangue ndi mutumua wa bantu basili Bayuda, nkindikile sana* miilo indi namubombela Leeza, 14 evi mone kine kunti nabasonsezia mu nzila imo bantu bane ne mwine* baaluke ni bwivu, ni kulengia bamo pakati kabo bapusuke. 15 Pantu baapozelue kule, kekio kyaakikwasia bange mu kyalo baaluke ni burafiki pamo* ni Leeza. Kine lonu Leeza etabiile bamo pakati ka Bayuda, kekio kyakaaluka nga evelia kubabwezia ku bukose kufuma ku bafwile. 16 Kine semu ya mukusu elia itwemue kuya yali bupe bwa matunda a kwanza imwenue kuya yali itakatifu, kansi ni mukusu onse ni utakatifu. Kabili, kine musila ni utakatifu, kansi misambo ni yene ni itakatifu.
17 Inzi, misambo inge yaateetelue ku kimuti. Ata sie kine wewe ubanga wali muzeituni wa mu kisonso, waakunikilue pakati ka misambo elia yaasyeleko. Lonu, ni wewe uli mukunonkelamo kupitila musila wakue. 18 Inzi, te kutontonkania nangue wewe uwamiisie kuliko ezio misambo inge. Kine wewe watontonkania nangue uwamiisie,* languluka nangue te uli mukukwasia musila, inzi musila i uli mukukukwasia wewe. 19 Bamo pakati kenu bakalanda evi: “Misambo inge yaateetelue evi nene nkunikuepo.” 20 Kekio ni kisinka. Juu ya kupusa kiketekelo, bene baateetelue, inzi wewe wimeene kupitila kiketekelo. Pa kako, te kuya waitanka, inzi uye wali ni mwenzo. 21 Kine Leeza taailangiliile luse misambo ya asili, eba wewe uli wawaza nangue wene wakaba kukulangilila luse? 22 Kunti wamona nangue Leeza aweme, kabili asasile. Asasile ku baalia baaponene juu ya kupusa kiketekelo. Inzi, Leeza aweme kuli wewe kine utwaliliile kuya wali mu buwame bwakue. Kine te evio, ni wewe kumo wakaba kuteetua. 23 Kabili, kine Bayuda batendeka kulangilila kiketekelo, bakabwela kukunikua ku kimuti, pantu Leeza ali ni buvinde bwa kubwela kubakunika. 24 Wewe, waateetelue ku kimuti kya muzeituni wa mu kisonso, kabili waakunikilue mu nzila isili ya kiasili ku kimuti kya muzeituni wa mu busitani. Kakiine, kyakaba kuya kyaleengele sana kubwela kukunika misambo ya kiasili ku kimuti kyabo kiine kya muzeituni!
25 Mwe ba lupua, ntonene muye mwamanine ezi siri itakatifu evi te kunti muye mwaimwene nangue muli ni mulangue: Mitima ya Baisraeli bange yaakifikiila kuuma mpaka mpendua yonse ya bantu basili Bayuda ingile, 26 kabili, evio i vyakapususiiwa Baisraeli bonse. Nga evelia sie vilandile Malembo nangue: “Mupususi wakafuma ku Sayuni ni kufumia bubifi bonse ku kizazi kyakue* Yakobo. 27 Kabili, azo i mapatano anakakita pamo nabo musita unakafumia mazambi abo.” 28 Bayuda bange, kakiine ni balwani ba mpunda iweme, ni kekio kyaakimiletela faida. Inzi, baasaakwilue na Leeza, kabili Leeza abatonene juu ya ba bikolue babo. 29 Leeza takanuuna juu ya bupe bwaafumiizie, kabili takanuuna juu ya kukuuta bantu baalia baakuutilue na wene. 30 Pantu, mwaali mwabeleziizie kusinakila Leeza, inzi lonu mwaakilangililua luse juu ya kusinakila kwa Bayuda. 31 Lonu, te bali mukunakila, ni pa kako Leeza waakimilangilila luse. Inzi, ni bene kunti balangililua luse nga evelia vimwaalangiliilue. 32 Pantu, Leeza waakibalengia bonse baaluke mu kifungo kya kusinakila evi abalangilile bonse luse.
33 Emue, bunonsi bwakue Leeza, mulangue ni kumana kwakue bizikile sana! Bupinguzi bwakue tebwizi kunvwika mu nzila ipwililikile, kabili nzila yakue teizi kwinikika! 34 Pantu, “Nani waakifikiila kumana mano akue Yehova,* kabili nani ali kuvinda kumusoka?” 35 Ao, “Nani waatendekelenke kumupeela Leeza kantu, evi Leeza aaluke ni lideni lya kumubweziizia?” 36 Pantu, bintu byonse bifumine kuli Leeza, kupitila wene, kabili juu yakue. Wene apalile kulumbaniiwa lonse. Amen.