Mukanda ku Baroma
5 Pa kako, pantu lonu twaakipundua kuya twaolokele juu ya kiketekelo, kansi tusekelele mutende pamo ni Leeza, kupitila Mulopue wetu Yesu Kristu. 2 Kumuketekela Yesu kwaakitulengia tumupalame Leeza ni kusekelela buwame bwakue busipalilue. Kansi, tusekelele pantu tuli ni kiswapilo kya kupata bulumba bwakue Leeza. 3 Kukila pa kako, tusekelele musita utuli mukwema, pantu tumanine nangue kwema kuli kwalengia tusipikizie, 4 ni kusipikizia kuli kwaleta aali ya kwitabilua na Leeza, aali ya kwitabilua ni yene, ili yaleta kiswapilo, 5 kabili kiswapilo tekizi kututyona mutima, pantu ntono yakue Leeza yaakiitilua mu mitima yetu kupitila mupasi utakatifu olia utwaapeelue na Leeza.
6 Kakiine, musita utubanga twakili sie bila muntu wa kutukwasia,* Kristu waafwile pa musita waali wabiikilue palua bantu babipile. 7 Pantu, kikolele sana ku muntu onse kwitabila kufua juu ya muntu olokele, inzi pange muntu kunti waitabila kufua juu ya muntu aweme. 8 Inzi, Leeza waakitulangilila ntono yakue mwine, pantu musita utubanga twakili sie ba mazambi, Kristu waafwile juu yetu. 9 Kukila pa kako, pantu lonu twaakipundua kuya twaolokele kupitila milopa yakue, twakaba kupusuka ku kipuki kikata kyakue Leeza. 10 Ata sie kine tubanga twali balwani bakue Leeza, twaapatanisiiziwe pamo ni wene kupitila lufu lwakue Mwana wakue. Kekio kyakila kusininkizia kakiine nangue twakaba kupususiiwa kupitila bukose bwakue Yesu, pantu lonu tupatanisiiziwe. 11 Te kekio sie, inzi tuli mukusekelela kabili muli Leeza kupitila Mulopue wetu Yesu Kristu. Pantu, kupitila wene, lonu tupatanisiiziwe.
12 Lizambi lyaaingiile mu kyalo kupitila muntu umo, ni lizambi lyaaletele lufu. Pa kako, lufu lwaasalangheene ku bantu bonse pantu bonse baakitile lizambi. 13 Lizambi libanga lyali mu kyalo ntanzi Sheria teinabeko, inzi kine te pali sheria, lizambi telizi kupendua ku muntu ata umo. 14 Ata sie kine kili evio, lufu lwaateekele nga likolo kubambila kuli Adamu mpaka kuli Musa. Lwaateekele ni ku baalia baasyakitile lizambi mu nzila elia yaakitiilemo Adamu. Adamu waali wapaleene ni olia abanga wali wa kwiza.
15 Inzi, bupe bwakue Leeza te buli nga lizambi lyakue Adamu. Kupitila kilubo kya ozo muntu umo, bantu bengi baafikiile kufua. Inzi, buwame* bwakue Leeza pamo ni bupe bwakue bwa kwa bule kupitila buwame bwa muntu umo, i kulanda, Yesu Kristu, bikilile kutana. Kupitila bobu bupe, Leeza wabaletela bantu bengi mpaalo ingi sana! 16 Kabili, bobo bupe bwa kwa bule te bupaleene ni bintu vibyaakitikile kupitila muntu umo olia waakitile lizambi. Kilubo kimo kyaapingwilue kuya kyali mulandu. Inzi, bupe bolia bwaaizile kisia bilubo bingi, bwaalengiizie bantu bapundue kuya bali basili na kilubo. 17 Lufu lwaateekele nga likolo kupitila lizambi lya ozo muntu. Inzi, kikilile kusininkiziiwa nangue baalia baapokeleele buwame bwingi bwakue Leeza* ni bupe bwa kwa bule bwa kooloka, bakeekala evi kuteeka bali ba makolo kupitila muntu umo, Yesu Kristu!
18 Nga evelia sie kupitila kilubo kya muntu umo bantu ba namuna yonse vibaamwenue kuya bali ni kilubo, enka evio kupitila kintu kimo kyolokele kyaakitilue, bantu ba namuna yonse baakipundua kuya baolokele evi kupeelua bukose. 19 Nga evelia sie bantu bengi vibaalukile ba mazambi kupitila kusinakila kwa muntu umo, enka evio kupitila kunakila kwa muntu umo bantu bengi bakaalulua kuya baolokele. 20 Sheria yaafumiiziwe evi kulangilila bantu vibabanga bali ba mazambi. Inzi, pantu kyaafikiile kumoneka paswetele mazambi viavulile, buwame bwakue Leeza* bwaakilile kongezeka. 21 Pa kako, nga evelia sie lizambi vilyaateekele nga likolo ni kuleta lufu, enka evio ni buwame bwakue Leeza* buli mukuteeka lonu nga likolo kupitila kooloka. Ni kekio kyakaleta bukose bwa lonse kupitila Yesu Kristu Mulopue wetu.