Yaandikilue na Marko
8 Mu ezio nsiku, bantu bengi sana baakolongheene kabili kuli Yesu. Pantu te babanga bali ata na kyakulia, Yesu waabakuutile basambi ni kubalanda evi: 2 “Baaba bantu bengi, nabonvwila nkumbu pantu bakita kale nsiku itatu bali pamo ni nene, kabili te bakwete ata kantu kakulia. 3 Kine nabalanda baye kwabo baunvwile nzala, bali kupenzuka mu nzila, ni bamo pakati kabo baakifuma kule.” 4 Inzi basambi bakue baamulandile evi: “Konu kutuli ni ku kaseeba. Tuli kupata pi mikate ingi ya kunti baaba bantu bekute?” 5 Yesu waabepuziizie evi: “Eba, mulipo na mikate inga papo?” Baamwasukile evi: “Saba.” 6 Kisia, waabalandile babo bantu bengi bekale pansi. Kusyali, wabuula elia mikate saba, wamutasia Leeza, kisia waamokwele ni kubapeela basambi bakue bakasanie. Ni basambi baakasaniizie ezio mikate ku babo bantu bengi. 7 Babanga bakwetepo ni tu kasabi tunini. Yesu waamutasiizie Leeza, kisia waabalandile basambi bakue babakasanie bantu ni toto tu kasabi. 8 Pa kako, bantu bonse baaliile ni kwikuta, kabili basambi baatolele bipande bya mikate byaasyeleko ni kwizuzia bipanda saba bikata. 9 Kubanga kwali balalume elufu ina (4 000) evi. Kisia, waabalandile babo bantu baye.
10 Bila kukokola, waapilukile mu bwato pamo ni basambi bakue ni kuya mu kazonga ka Dalmanuta. 11 Lwaafikile koko, Bafarisayo baaizile ni kubamba kubisiana nakue bamulomba akite alama imo kufuma ku muulu juu ya kunti bamwezie. 12 Inzi, Yesu waaunvwile sana bulanda mu mutima wakue ni kulanda evi: “Juu ya ki keki kizazi kili* mukukeba alama? Kakiine nalanda nangue, keki kizazi tekikaba kupeelua ata alama.” 13 Kisia papo, Yesu waabasiile, wapiluka kabili mu bwato ni kuya ku bwala bunge bwa lyezi.
14 Inzi, basambi baalabile kutwama mikate, kabili te babanga bali ata na kantu mu bwato, inga sie mukate umo. 15 Kabili, waabasokele bila kubafiika, walanda evi: “Twalilile kuya mwakentele; mwakengeele ni levire ya Bafarisayo ni levire yakue Herode.” 16 Pa kako, baatendekele kubisiana pantu te babanga bali ata na mikate. 17 Yesu waainikile kako ni kubalanda evi: “Juu ya ki muli mukubisiana nangue te muli ata na mikate? Eba, te mwinikile kelia kinkebele kumilanda? Eba ni lenu mano enu akikakikile sie? 18 Muli ni menso, ale mwaandua syani kumona? Muli ni matui, ale mwaandua syani kunvua? Te mulangulukile 19 lunaamokwele elia mikate isano yaaliile balalume elufu isano (5 000), mwaakolonghaniizie bipande byaasyeleko ni kwizuzia bipanda binga?” Baamwasukile evi: “Likumi na bibili.” 20 “Lunaamokwele elia mikate saba yaaliile balalume elufu ina (4 000), belia bipande bya mikate byaasyeleko, mwaaizuziizie bipanda* binga bikata?” Ni bene baamwasukile evi: “Saba.” 21 Pa kako, waabepuziizie evi: “Ni lenu temunaunvue?”
22 Kisia, baafikile ku Betsaida. Koko, Yesu baamuleteele muntu umo abanga wali mpofu, kabili baamupapaatile amukumie. 23 Yesu waamukwete ozo mpofu ku kuboko ni kuya nakue panze pa muzi. Yesu waamutiiliile mate ozo mpofu pa menso akue. Kisia, waabiikile minue pa menso akue ozo mpofu ni kumwipuzia evi: “Ati wamona ni kantu?” 24 Ozo muntu waakentele ku ntanzi ni kulanda evi: “Namona bantu, inzi bamwenekele kusia bimuti bili mukuya byaenda.” 25 Yesu waabwelele kabili kubiika minue yakue pa menso akue ozo muntu, ni ozo muntu waamwene bwino. Buvinde bwakue bwa kumona bwaabwelele, kabili waabambile kumona bwino kila kintu. 26 Kisia, Yesu waamulandile aye kwabo, waamwanine evi: “Te kwingila mu muzi.”
27 Kisia papo, Yesu pamo ni basambi bakue baafumine ni kuya mu mizi ya Kaisaria Filipi. Lubabanga bali mu nzila, waabambile kubepuzia evi basambi bakue: “Ati, bantu bali balanda nangue nene ndi ni?” 28 Baamwasukile evi: “Yoane Mubatizi, inzi bange bali balanda nangue Eliya, kabili bange bali balanda nangue umo wa ba nabi.”* 29 Kisia, waabepuziizie evi: “Ale mwemue muli mwalanda nangue nene ndi ni?” Petro waamwasukile evi: “Wewe uli Kristu.” 30 Pa kako, waabakaaniizie sana te kunti babwileko muntu ata umo pa lwakue. 31 Kabili, Yesu waabambile kubasambilizia wabalanda nangue Mwana mwina muntu apalile kutesua sana ni kusuulua na bantu bakotele, bakulu ba ba makoani, ba kalemba ba sheria, ni kwipaiwa, inzi busiku bwa butatu wakaba kufufulua. 32 Kakiine, waababwilile bebio bintu bila kubafiika. Inzi, Petro waamutweme ni kuya nakue pa mbali ni kubamba kumusasilila. 33 Kisia, Yesu waapilibukile, wabakenta basambi bakue ni kumusasilila Petro, walanda evi: “Pita ku nyuma yane we Sataana! pantu wewe uli mukuwaza mawazo a bantu, te akue Leeza.”
34 Yesu waabakuutile bantu bengi pamo ni basambi bakue ni kubalanda evi: “Kine muntu watona kunkonka, apalile kwikaana ye mwine ni kutwama kimuti kyakue kya mateso* ni kutwalilila kunkonka. 35 Pantu, kila muntu olia watona kupususia bukose bwakue wakabuzezia.* Inzi, kila muntu olia wazezia bukose bwakue* juu yane ni juu ya mpunda iweme, wakabupususia. 36 Kulanda kisinka, muntu kunti wapata faida ki kine wapata kyalo kyonse ni kuzezia bukose bwakue? 37 Kakiine, muntu kunti wafumia kintu ki kya kunti asintwileko na bukose bwakue? 38 Pantu kila muntu olia ali wangunvwila nene busoni pamo ni milandu yane mu keki kizazi kya bukende* ni kya mazambi, Mwana mwina muntu ni wene wakamunvwila busoni musita lwakeeza wali pamo ni ba malaika batakatifu wali ni buvinde bukata kufuma kuli Baba wakue.”