Mukanda wa Kwanza ku Bakorinto

10 Mwe ba lupua, lonu ntonene mumane nangue ba bikolue betu bonse babanga baali pensina lilezi, kabili bonse baapitile pa lyezi. 2 Kabili, bonse baabatiziiziwe muli Musa kupitila lilezi ni kupitila lyezi. 3 Bonse baaliile kyakulia kimonke kya kimupasi, 4 kabili bonse baaminine menda amonke a kimupasi. Baali bamina menda abanga afuma ku kilibue kya kimupasi kelia kyaali kyabakonkele, kabili kekio kilibue kibanga kyali Kristu. 5 Ata sie kine kibanga kyali evio, bengi pakati kabo te baaitabiilue na Leeza, pantu wene waabepaile mu kaseeba.

6 Bebio bintu byaakitikile kuli bene, byaalukile bya kutusambilizia* fwefue evi te kunti twaluke nga bene, baalia baalukile ni tama ya bintu bili byakisiana. 7 Te tupalile kuya twapupa mikisi nga vyaakitile bamo pakati kabo; nga evelia vilandile Malembo nangue: “Bantu baaikeele evi kulia ni kumina. Kisia, baaimeene evi kwisansamusia.” 8 Kabili, te tupalile kuya twakita bukambue* nga vyaakitile bamo pakati kabo, ni bantu makumi abili na batatu elufu (23 000) baafwile pakati kabo busiku bumo. 9 Te tupalile kumwezia Yehova* nga vyaakitile bamo pakati kabo, kabili baaipailue na bizoka. 10 Te tupalile kwitendooka nga vyaakitile bamo pakati kabo, kabili baaipailue na malaika ali wainoona. 11 Bebio bintu byaakitikile kuli bene evi kutusambilizia. Byaandikilue evi kutusoka fwefue bekeele ku mpela ya kenu kipindi.*

12 Kansi, olia ali wawaza nangue emeene, aye wailabukiile evi te kunti apone. 13 Bwezio bonse bumuli mwapata bwaabapatilepo kale ni bange. Inzi, Leeza ni wa kisinka, kabili takaba kumilekelela mweziiwe kupita vimuli kuvinda kusipikizia. Musita umuli mwaeziiwa, Leeza wakaba kumipeela nzila ya kufuma mu bobo bwezio evi muvinde kubusipikizia.

14 Pa kako, mwe batonua bane, butuke lupupo lwa mikisi. 15 Ndi mukumilanzia nga nene ali mukulanda na bantu bali ni buvinde bwa kwinika. Pingule pa lwenu mwe bene bintu bindi mukulanda. 16 Kikombe kya mpaalo kituli twapepelapo,* eba te kukwasia abe milopa yakue Kristu? Mukate utuli twamokola, eba te kukwasia abe mubili wakue Kristu? 17 Kuli sie mukate umo, pa kako ata sie kine tuli bengi, tuli sie mubili umo, pantu fwe bonse tuli twalia wenka ozo mukate.

18 Tontonkania bintu bili byakita Baisraeli: Musita ubali balia zabiu iletelue pa mazabau, eba te bezi kusekelela abe burafiki pamo ni Leeza? 19 Eba, ndi mukulanda nangue mukisi ni wa mana, ao nangue kintu kipeelue mukisi ni kya mana? 20 Ata, inzi ndi mukulanda nangue bantu ba ntundu inge* bali babipeela bibanda zabiu, apana Leeza. Kabili, nsitonene mwemue mukwasie bibanda. 21 Temuvinda kuya mwamina kikombe kyakue Yehova* ni kikombe kya bibanda. Temuvinda kuya mwalia ku “meza yakue Yehova”* ni ku meza ya bibanda. 22 Ao, eba ‘tuli mukumusonsezia Yehova* kwaluka ni bwivu’? Fwefue te tulumine kumupita wene. Eba, te evio?

23 Bintu byonse bitabiziiziwe,* inzi te byonse bili ni faida. Bintu byonse bitabiziiziwe, inzi te byonse bili byakoseleziana. 24 Kansi, kila muntu atwalilile kukeba, apana faida yakue mwine, inzi faida ya bange.

25 Lie mwali ni zamiri iweme kila kintu kili kyasisiiwa mu nsoko ya nama. Te muli na lazima ya kwipuzisia, 26 pantu Malembo alandile nangue: “Yehova* i mwine wa kyalo ni byonse bilimo.” 27 Kine muntu asizumiine wamyalika, kabili kine mwatona kuya, lie kila kintu kiteaniiziwe ntanzi yenu mwali ni zamiri iweme. Te muli na lazima ya kwipuzisia. 28 Inzi, kine muntu wamilanda nangue “Keki kintu kyaakifumiiwa kuya kyali zabiu,” tekulie juu ya olia wamibwilanga, kabili juu ya zamiri. 29 Nsili mukulandila palua zamiri yenu mwe bene, inzi palua zamiri ya muntu unge. Pantu, nsitonene kubombia uru wane, kisia mpingulue na zamiri ya muntu unge. 30 Kine ndi mukulia ni kumutasia Leeza palua byakulia, ale juu ya ki ngiye nalandilua ovio palua belia bindi namutasiiziapo Leeza?

31 Pa kako, kine muli mukulia ao muli mukumina ao muli mukukita kintu kinge kyonse, kite bintu byonse evi kumulumbania Leeza. 32 Tiine kwaluka bintu bya kulengia bange beputale,* baye bali Bayuda, ao Bagiriki ao baalia bali mu kilonghaano kyakue Leeza, 33 nga evelia vindi mukwezia kubasansamusia bantu bonse mu bintu byonse. Nsili mukukeba faida yane ne mwine, inzi faida ya bengi evi bakabe kupususiiwa.