Mukanda wa Kwanza ku Batesalonika

3 Pa kako, musita utwaandilue kutwalilila kusipikizia kekio, twaamwene kyali bwino sana kusyala bunke mu Atene; 2 kisia, twaamutumine lupua wetu Timoteo, kabili mubombi wakue Leeza* wa mpunda iweme pa lwakue Kristu, evi amilengie mwimanisie* ni kumiteekia mutima mu kiketekelo kyenu, 3 evi muntu ata umo te kunti atensiiwe* na lelio lyemo. Mumanine nangue tetuvinda kubutuka lelio lyemo.* 4 Pantu lutubanga twali pamo ni mwemue, tubanga twamibwilila mbela nangue twakatesua, kabili nga vimumanine, kyaakikitika enka evio. 5 Musita unaandilue kutwalilila kusipikizia, kekio i kyaalengiizie nene mulande Timoteo eze kwenu evi mpate mpunda palua bukisinka bwenu, pantu pange Kibanda* waakimyezia mu nzila imo ni kulengia kwikwinda kwetu kwaluke kwa mpuni.

6 Inzi, Timoteo waakifika sie lenu kufuma koko kwenu, kabili waakitupeela mpunda yaweme palua bukisinka bwenu ni ntono yenu, waakitubwila nangue lyonse mwemue mutwaliliile kutulanguluka sana, kabili nangue mutonene sana kutumona nga enka evelia fwefue vitutonene kumimona. 7 Pa kako, mwe ba lupua, mu maavia etu onse* ni mu lyemo lyetu lyonse, twaakiteekiiwa mutima kupitila mwemue ni kupitila bukisinka bumuli mwalangilila. 8 Lonu, pantu tumanine nangue mwimaniisie muli Mulopue, tuli mukukoseleziiwa.* 9 Kunti twamutasia syani Leeza pa lwenu ni palua nsansa ikata ituli nayo ntanzi yakue juu yenu? 10 Busiku ni koba, tuli twamulilila Leeza kwa mute mu mapepo etu, evi tuvinde kwiza kumimona* ni kumipeela bintu bimupusilue mu kiketekelo kyenu.

11 Kansi lonu, Leeza mwine, kabili Baba wetu, pamo ni Mulopue Yesu, batusebele nzila ya kwiza koko kwenu. 12 Kabili, tutonene Mulopue amilengie mongezie ntono yenu, een, mukile kutonana ni kutona bantu bonse nga evelia vituli twamikitila mwemue, 13 evi alengie mitima yenu iye yalumine, bila yali na kilubo, kabili yali itakatifu ntanzi yakue Leeza, kabili Baba wetu mu nsita ya kubapo kwakue Mulopue wetu Yesu pamo ni batakatifu bakue bonse.